“தவெகவின் பாசிசத் தன்மைக்கு விழுந்த அடி!” — சென்னை உயர் நீதிமன்ற உத்தரவு குறித்து திமுக தலைவர் மு.க.ஸ்டாலின் அதிரடி அறிக்கை!

“ஆணவம் அழிவுக்கு வழிவகுக்கும்; தொடர்ச்சியான ஆணவம் அழிவை விரைவுபடுத்தும்” எனச் சாடல்!

காவிரி நீர் உரிமை மீட்பு மற்றும் மேகதாது அணை விவகாரத்தில் தமிழக அரசின் அலட்சியப் போக்கைக் கண்டித்து தி.மு.க. சார்பில் தஞ்சையில் நடத்தப்பட்ட எழுச்சிமிகு கண்டன ஆர்ப்பாட்டமும், அதனைத் தொடர்ந்து எதிர்க்கட்சித் தலைவர் உதயநிதி ஸ்டாலின் கைது செய்யப்பட்ட விவகாரமும் தமிழக அரசியலில் பெரும் கொந்தளிப்பை ஏற்படுத்தியுள்ளது. இது தொடர்பாகக் கழகத் தலைவர் திரு. மு.க.ஸ்டாலின் அவர்கள் வெளியிட்டுள்ள கண்டன அறிக்கை விவரம் வருமாறு,

தஞ்சை ஆர்ப்பாட்டமும் விவசாயிகளின் கொந்தளிப்பும்
காவிரி உரிமையை நிலைநாட்டத் தவறியும், மேகதாது அணையத்தைத் தடுக்கத் திராணியின்றியும் உள்ள த.வெ.க. அரசின் அலட்சிய ஆணவப் போக்கைக் கண்டித்து தஞ்சையில் தி.மு.க. சார்பில் மாபெரும் கண்டன ஆர்ப்பாட்டம் நடைபெற்றது. இதில் கழக உடன்பிறப்புகளுடன் உழவர் பெருமக்களும் பொதுமக்களும் பெருமளவில் பங்கேற்றுத் தங்களது உணர்வுகளை வெளிப்படுத்தினர். இக்கூட்டத்தில் கலந்துகொண்டு உரையாற்றிய சட்டமன்ற எதிர்க்கட்சித் தலைவர் திரு. உதயநிதி, நிர்வாகத் திறனற்ற முதலமைச்சரின் கையாலாகாத்தனத்தை மிகக்கடுமையாக அம்பலப்படுத்தினார்.

“காவிரி நீரைக் கொண்டுவரவும் முடியவில்லை, மேகதாது அணை பற்றிக் பேசவும் முடியவில்லை; விவசாயிகள் கண்ணீர் வடித்துக் கொண்டிருக்கிறார்கள், ஆனால் அமைச்சர்களோ முதலமைச்சர் நடித்த படத்தைப் பார்த்து கண்ணீர் வடித்து ஜோக்கர் அமைச்சரவையாக வலம் வருகிறார்கள்” என்ற அவரது அடுக்கடுக்கான குற்றச்சாட்டுகளுக்கு இதுவரை ஆட்சியாளர்களால் பதில் அளிக்க முடியவில்லை. திசைதிருப்பும் நோக்கமும் அவசரக் கைது நடவடிக்கையும், காவிரி விவகாரத்தில் அரசின் தோல்வியை மறைக்கும் வகையிலும், நாளை சட்டமன்றத்தில் நிதிநிலை அறிக்கை தாக்கல் செய்யப்பட உள்ள வேளையில் தகுதிவாய்ந்த எதிர்க்கட்சித் தலைவர் அவையில் இருக்கக் கூடாது என்ற உள்நோக்கத்தோடும் உதயநிதி மீது காவல்துறை மூலம் பழிவாங்கும் நடவடிக்கை ஏவப்பட்டுள்ளது.

சென்னையிலேயே விசாரணை நடத்த வேண்டிய விசயத்தை, எந்தவித நியாயமும் இன்றி அவசரகதியாகத் தஞ்சாவூருக்கு அழைத்துச் சென்று, ஜாமீனில் வெளிவர முடியாத பல்வேறு பிரிவுகளில் வழக்குப் பதிவு செய்து மிரட்ட முயன்றுள்ளனர். மக்கள் மற்றும் கழகத் தொண்டர்களின் தீவிர எதிர்ப்புக்குப் பின், ‘விசாரணைக்குப் பின் விடுவிப்போம்’ என்று நீதிமன்றத்தில் அரசு தரப்பு கூறியதும், இறுதியில் ‘உதயநிதியை இன்றே விடுதலை செய்ய வேண்டும்’ என்று சென்னை உயர்நீதிமன்றம் உத்தரவிட்டிருப்பதும் த.வெ.க.வின் பாசிசத் தன்மைக்கு விழுந்த பேரிடியாகும்.

பாசிசத்தின் உச்சம் – தொடரும் அடக்குமுறைகள்
ஆட்சிக்கு வந்தது முதல் தன்னை விமர்சிப்போரைக் கைது செய்யும் நடவடிக்கைகளையே முதலமைச்சர் விஜய் முழுநேரப் பணியாகச் செய்து வருகிறார். அனிதா ராதாகிருஷ்ணன், மார்க்கண்டேயன் உள்ளிட்ட சட்டமன்ற உறுப்பினர்கள் மீதான கைது நடவடிக்கைகள், நீட் தேர்வுக்கு எதிராகப் போராடும் மாணவர்கள் மீதான தாக்குதல்கள், பூட்டப்பட்ட மெரினா கடற்கரை, விவசாயிகளின் தன்னெழுச்சிப் போராட்டங்களை முடக்குவது என அனைத்துமே பாசிசத்தின் உச்சகட்ட வெளிப்பாடுகளாகும். இதன் தொடர்ச்சியாகத்தான் விவசாயிகளுக்காகக் குரல் கொடுத்த எதிர்க்கட்சித் தலைவர் உதயநிதி கைது செய்யப்பட்டுள்ளார்.

விமர்சனங்களுக்குப் பதில் மற்றும் எச்சரிக்கை
உதயநிதியின் உரை குறித்து உண்மை அறியாமல் சில தலைவர்கள் கண்டனம் தெரிவித்திருப்பது வருந்தத்தக்கது. அவர் எந்த இடத்திலும் ஆபாசமாகப் பேசவில்லை; யாரையும் தனிப்பட்ட முறையில் குறிப்பிடவில்லை. பிரச்சினையைத் திசை திருப்புவதற்காகப் பரப்பப்படும் பொய்களை நம்பி ஏமாற வேண்டாம்.  ரீல்ஸ் கிரியேட்டராக மட்டுமே வலம் வரும் முதலமைச்சர் விஜய் தனது பொறுப்பை உணர்ந்து செயல்பட வேண்டும். போராட்டத்தில் கைது செய்யப்பட்டுள்ள அனைத்துக் கழக உடன்பிறப்புகளையும் உடனடியாக விடுதலை செய்ய வேண்டும் என்று வலியுறுத்தியுள்ள கழகத் தலைவர், “ஆணவம், அழிவுக்கு வழிவகுக்கும்; தொடர்ச்சியான ஆணவம், அழிவை விரைவுபடுத்தும்!” என்று தனது அறிக்கையில் எச்சரித்துள்ளார்.

அமைச்சா் அனிதா ராதாகிருஷ்ணன் சொத்துக்குவிப்பு வழக்கு தூத்துக்குடியிலேயே விசாரணை — உயர் நீதிமன்றம் உத்தரவு!