மாநகர பேருந்துகளில் UPI மூலம் டிக்கெட் பெறும் வசதி – சோதனை முறையில் அறிமுகம்

சென்னை மாநகரப் பேருந்துகளில் UPI வசதியை பயன்படுத்தி டிக்கெட் பெறும் வசதி சோதனை முறையில் அமல்படுத்தப்பட்டுள்ளது.

நாடு முழுவதும் டிஜிட்டல் மயமாகி வருகிறது. பெட்டி கடை முதல் நகைக் கடை வரை அனைத்து வணிக நடவடிக்கைகளும் யூபிஐ மூலம் நடைபெற்று வருகின்றன. இருந்த போதிலும் அரசு பேருந்து சேவைகளில் இன்னமும் டிக்கெட் பணம் செலுத்தி மட்டுமே பெறப்பட்டு வருகிறது. இதனிடையே சென்னை மாநகர பேருந்துகளில் UPI வசதியை பயன்படுத்தி டிக்கெட் பெறும் வசதியை அறிமுகப்படுத்த சென்னை மாநகர போக்குவரத்து கழகம் முடிவு செய்துள்ளது.

இந்த நிலையில், சென்னை மாநகரப் பேருந்துகளில் UPI வசதியை பயன்படுத்தி டிக்கெட் பெறும் வசதி சோதனை முறையில் அமல்படுத்தப்பட்டுள்ளது. முதல் கட்டமாக பல்லாவரம் பேருந்து பணிமனையின் கீழ் இயங்கும் பேருந்துகளில் UPI மற்றும் கார்டுகளை பயன்படுத்தி டிக்கெட் வழங்கப்படுகிறது. தொடுதிரை வசதி கொண்ட புதிய கருவியின் மூலம் பயணிகள் ஏறும் மற்றும் இறங்கும் இடங்களை தேர்வு செய்து டிக்கெட் வழங்கும் புதிய வசதி அறிமுகம் செய்யப்பட்டுள்ளது. இத்திட்டத்தின் செயல்பாடுகளை பொறுத்து சென்னை நகரில் உள்ள மற்ற பணிமனைகளில் உள்ள பேருந்துகளில் இத்திட்டம் விரிவுப்படுத்தப்பட உள்ளது.