டிட்வா புயல் காரணமாக கடலூர் மாவட்டத்தில் எடுக்கப்பட்ட முன்னெச்சரிக்கை நடவடிக்கை தொடர்பாக வேளாண் மற்றும் உழவர் நலத்துறை அமைச்சர் எம்.ஆர்.கே பன்னீர்செல்வம் செய்தியாளர்களை சந்தித்து பேட்டி அளித்துள்ளாா்.
அதில் “மழை முன்னெச்சரிக்கை நடவடிக்கையாக பொது மக்களை பாதுகாக்க மாவட்ட ஆட்சியர் தலைமையில் பல்வேறு ஆய்வுக்கூடம் நடத்தப்பட்டது. மழை வருவதற்கு முன்பாகவே துரிதமாக நடவடிக்கை எடுக்கப்பட்டு வருகிறது. குறிப்பாக மழையால் எந்தெந்த பகுதிகள் பாதிக்கப்படும் என 239 பகுதிகள் முன்கூட்டியே கண்டறியப்பட்டுள்ளது. அப்பகுதியில் உள்ள சுமார் ஒரு லட்சத்திற்கும் அதிகமானோர் தங்குவதற்கு இடம், உணவு ஏற்பாடு செய்ய நடவடிக்கை எடுக்கப்பட்டுள்ளது. அதேபோன்று பலத்த காற்றினால் விழும் மரங்களை அப்புறப்படுத்தவும், தாழ்வான பகுதியில் தேங்கியுள்ள மழை நீரை வெளியேற்றவும் நடவடிக்கை எடுக்கப்பட்டுள்ளது.
தேசிய பேரிடர் மீட்பு படை வரவழைக்கப்பட்டு தயார் நிலையில் உள்ளன. மருத்துவ உதவி தேவைப்படும் கர்ப்பிணிகள் 925 பேர் கண்டறியப்பட்டு அவர்களை மருத்துவமனையில் சேர்க்க நடவடிக்கை எடுக்கப்பட்டுள்ளது. கடலூர் மாவட்டத்தை பொருத்தவரை தற்சமயம் எந்த மீனவர்களும் கடல் பகுதியில் இல்லை. எந்தெந்த பகுதியில் விளைநிலங்கள் பாதிக்கப்பட்டுள்ளது என கண்டறிந்து தண்ணீரை வெளியேற்ற வேளாண் துறை மற்றும் நீர்வளத்துறை சார்பில் நடவடிக்கை எடுக்கப்பட்டு வருகிறது.
பயிர் காப்பீடு பொருத்தவரை வரும் 1 ஆம் தேதி வரை கால அவகாசம் உள்ளது. கடந்தாண்டு 18 லட்சம் ஏக்கர் பயிர் காப்பீடு செய்தனர். இந்த ஆண்டு அதைவிட கூட்டுதலாக 19 லட்சம் ஏக்கர் அளவுக்கு பயிர் காப்பீடு செய்யப்பட்டுள்ளது. மேலும் இந்த ஆண்டு முதல் கூடுதலாக குத்தகைதாரர்களும் பயிர் காப்பீடு செய்யலாம் என அறிவிப்பு வெளியிட உள்ளோம். விவசாயிகளுக்கு தேவையான உரத்தை பொருத்தவரை போதிய கையிருப்பு உள்ளது. ஒரு லட்சத்து 61 ஆயிரம் மெட்ரிக் டன் யூரியா உள்ளிட்ட அனைத்து உரங்களும் கையிருப்பு உள்ளது. கலப்பட உரம் சம்பந்தமாக வேளாண் துறை அதிகாரிகள் தீவிரமாக கண்காணித்து நடவடிக்கை எடுத்து வருகின்றனர்.
மேலும் தொடர்ச்சியாக உர கலப்படம், உரம் கடத்தல், பதுக்கல் சம்பந்தமாக துறை சார்பாக கண்காணிப்பு தீவிர படுத்தப்பட்டு, தவறு செய்யும் கடைகள் மீது நடவடிக்கை எடுப்பதுடன் அவர்களின் உரிமம் ரத்து செய்யப்படுகிறது. அந்த வகையில் 160-க்கும் மேற்பட்ட கடைகள் மீது சட்டப்படி நடவடிக்கை எடுக்கப்பட்டுள்ளது. என்எல்சியிலிருந்து வெளியேற்றப்படும் நீரினால் ஏற்படும் பாதிப்புகளை தடுக்க அனைத்து வகையான நடவடிக்கைகளும் எடுக்கப்பட்டுள்ளது. மேலும் என்எல்சி நிறுவனம் தண்ணீரை வெளியேற்றும் போது உரிய அனுமதி பெற்று மாவட்ட நிர்வாகத்திற்கு தகவல் அளிக்க வேண்டுமென அறிவுறுத்தப்பட்டுள்ளது” என்று வேளாண் மற்றும் உழவர் நலத்துறை அமைச்சர் எம்.ஆர்.கே பன்னீர்செல்வம் கூறியுள்ளாா்.
தவெக வேற மாதிரி மாறப்போகுது! செங்கோட்டையனை கவிழ்த்த பாஜக! எஸ்.பி.லட்சுமணன் நேர்காணல்!