கடந்த 2026 மார்ச் மாதம் மக்களவையில் அறிமுகப்படுத்தப்பட்ட வெளிநாட்டு பங்களிப்பு முறைப்படுத்தல் (FCRA) திருத்தச் சட்டத்தை ஒன்றிய அரசு உடனடியாகத் திரும்பப் பெற வேண்டும் என்று திமுக தலைவரும், தமிழக முதல்வருமான மு.க.ஸ்டாலின் வலியுறுத்தியுள்ளார். சிறுபான்மையினரின் உரிமைகளைப் பாதுகாக்கும் வகையில், நாடாளுமன்றத்தின் நடப்புக் கூட்டத்தொடரிலேயே இதற்கான உரிய நடவடிக்கைகளை எடுக்க வேண்டும் என்றும் அவர் கேட்டுக்கொண்டுள்ளார்.
சிறுபான்மையினர் நலனில் திமுகவின் உறுதியான நிலைப்பாடு
இது தொடர்பாகத் திமுக தலைவர் மு.க.ஸ்டாலின் வெளியிட்டுள்ள அறிக்கையில் குறிப்பிடப்பட்டுள்ள முக்கிய அம்சங்கள், FCRA திருத்தச் சட்டத்தை ரத்து செய்ய வேண்டும்: 2026 மார்ச் மாதம் மக்களவையில் கொண்டுவரப்பட்ட FCRA திருத்தச் சட்டத்தால் ஏற்படக்கூடிய தொலைநோக்கு பாதிப்புகளைக் கருத்தில் கொண்டு, இச்சட்டத் திருத்தத்தை தொடக்கம் முதலே திமுக தீவிரமாக எதிர்த்து வருகிறது.
கூட்டுக் குழுவின் பரிசீலனைக்கு அனுப்பக் கோரிக்கை: இந்தச் சட்ட மசோதாவை நாடாளுமன்றக் கூட்டுக்குழுவின் (Joint Parliamentary Committee) பரிசீலனைக்கு அனுப்ப வேண்டும் என்ற கோரிக்கையை திமுக முழுமையாக ஆதரிக்கிறது.
சிறுபான்மையினருக்கான கூட்டு நடவடிக்கை மன்றத்தின் கோரிக்கை: சிறுபான்மையினரின் உரிமைகளைப் பாதுகாக்கவும், அவர்களின் சமூக-பொருளாதார மேம்பாட்டை உறுதி செய்யவும் சிறுபான்மையினருக்கான கூட்டு நடவடிக்கை மன்றம் முன்வைத்துள்ள கோரிக்கைகளை ஒன்றிய அரசு பரிசீலிக்க வேண்டும்.
மத்திய உள் துறை அமைச்சரிடம் மனு அளிப்பு
முன்னதாக, இரண்டு நாட்களுக்கு முன்பு சிறுபான்மையினர் கூட்டு நடவடிக்கை குழுவின் சார்பில், திமுக மாநிலங்களவை உறுப்பினர் பி.வில்சன் எம்பி தலைமையில் குழுவினர் ஒன்றிய உள் துறை அமைச்சர் அமித் ஷாவை நேரில் சந்தித்து இது தொடர்பான மனுவை அளித்தனர் என்பது குறிப்பிடத்தக்கது. சிறுபான்மை சமூக மக்களின் உணர்வுகளுக்கும் உரிமைகளுக்கும் மதிப்பளித்து, நடப்பு நாடாளுமன்றக் கூட்டத்தொடரிலேயே FCRA திருத்தச் சட்டத்தைத் திரும்பப் பெறுவதற்கான நடவடிக்கைகளை ஒன்றிய அரசு துரிதப்படுத்த வேண்டும் என்று திமுக தரப்பில் மீண்டுமொருமுறை வலியுறுத்தப்பட்டுள்ளது.