தமிழகத்தில் ஒரே நாளில் 11 கொலைச் சம்பவங்கள் நடைபெற்றுள்ளதாக வெளியான தகவல்கள் அதிர்ச்சியளிப்பதாகவும், மாநிலத்தில் சட்டம் ஒழுங்கு முற்றிலும் சீர்குலைந்துவிட்டதையே இது காட்டுவதாகவும் இந்திய தவ்ஹீத் ஜமாஅத் அமைப்பின் பொதுச் செயலாளர் முஹம்மது ஷிப்லி தெரிவித்துள்ளார்.
இதுதொடர்பாக அவர் வெளியிட்டுள்ள அறிக்கையில், தமிழகத்தின் பல்வேறு மாவட்டங்களில் ஒரே நாளில் 11 பேர் கொலை செய்யப்பட்டுள்ளதாக வெளியாகியுள்ள செய்திகள் மாநிலத்தின் பாதுகாப்பு நிலை குறித்து பல்வேறு கேள்விகளை எழுப்புவதாகக் குறிப்பிட்டுள்ளார்.
தேனி சிறப்பு சார்பு ஆய்வாளர் உட்பட 11 பேர் கொலை
தேனி மாவட்ட சிறப்பு சார்பு ஆய்வாளர் செந்தில்குமார் கொலை செய்யப்பட்ட சம்பவம் உட்பட திருச்சியில் 3 பேரும், சிவகங்கையில் 2 பேரும் கொலை செய்யப்பட்டுள்ளதாக அறிக்கையில் தெரிவிக்கப்பட்டுள்ளது.
மேலும், சென்னை, திருவள்ளூர், கடலூர், தேனி, திண்டுக்கல் மற்றும் கள்ளக்குறிச்சி உள்ளிட்ட மாவட்டங்களில் தலா ஒருவர் கொலை செய்யப்பட்டுள்ளதாக வெளியாகியுள்ள தகவல்களையும் அவர் சுட்டிக்காட்டியுள்ளார்.
தமிழகம் அமைதிப் பூங்காவாகத் திகழ்கிறது என்று கூறிக்கொள்ளும் அரசின் ஆட்சியில், ஒரே நாளில் 11 கொலைகள் நடைபெற்றுள்ளதாக வெளியாகியுள்ள தகவல்கள் காவல்துறையின் செயல்பாட்டையும், அரசின் நிர்வாகத் திறனையும் கேள்விக்குள்ளாக்குவதாக அவர் விமர்சித்துள்ளார்.
குற்றங்கள் நடப்பதற்கு முன்பே தடுக்க வேண்டும்
கொலை, கொள்ளை உள்ளிட்ட குற்றச்செயல்களைத் தடுப்பது காவல்துறையின் முக்கியப் பொறுப்பு எனக் குறிப்பிட்டுள்ள முஹம்மது ஷிப்லி, குற்றங்கள் நடைபெற்ற பின்னர் குற்றவாளிகளைக் கைது செய்வதில் மட்டுமே கவனம் செலுத்தாமல், குற்றங்கள் நிகழ்வதற்கு முன்பே அவற்றைத் தடுக்கும் வகையில் காவல்துறை செயல்பட வேண்டும் என்று வலியுறுத்தியுள்ளார்.
தமிழக மக்களின் உயிருக்கும் உடைமைக்கும் பாதுகாப்பு வழங்க வேண்டியது அரசின் முதன்மையான கடமை என்றும் அவர் தெரிவித்துள்ளார்.
முதலமைச்சர் விஜய் அரசு நடவடிக்கை எடுக்க வலியுறுத்தல்
அரசியல் விளம்பரங்களுக்கும் அறிக்கைகளுக்கும் முக்கியத்துவம் அளிப்பதைவிட, மக்களின் பாதுகாப்புக்கும் சட்டம் ஒழுங்கைப் பாதுகாப்பதற்கும் முதலமைச்சர் ஜோசப் விஜய் தலைமையிலான அரசு உடனடியாக முன்னுரிமை அளிக்க வேண்டும் என்று முஹம்மது ஷிப்லி வலியுறுத்தியுள்ளார்.
தமிழகத்தில் தொடர்ந்து நடைபெற்று வரும் கொலைச் சம்பவங்களுக்கு முற்றுப்புள்ளி வைக்கும் வகையில், பொதுமக்கள் அச்சமின்றி வாழ்வதற்குத் தேவையான உறுதியான நடவடிக்கைகளை அரசு உடனடியாக மேற்கொள்ள வேண்டும் என்றும் தனது அறிக்கையின் வாயிலாக அவர் கேட்டுக்கொண்டுள்ளார்.
தலைநகரம் கொலை நகரமாக மாறிவிட்டது – தமிழக அரசுக்கு முன்னாள் அமைச்சர் சேகர்பாபு கடும் விமர்சனம்!