தமிழகம் முழுவதும் உள்ள முக்கிய மாநகராட்சி மற்றும் நகராட்சி அலுவலகங்களில் லஞ்ச ஒழிப்புத்துறை (DVAC) போலீசார் இன்று ஒரே நேரத்தில் அதிரடிச் சோதனையில் இறங்கினர். இதன் ஒரு பகுதியாகத் தூத்துக்குடி மாநகராட்சி மற்றும் சேலம் மாநகராட்சி கொண்டலாம்பட்டி மண்டல அலுவலகங்களில் புகுந்த லஞ்ச ஒழிப்புப் படையினர், கதவுகளைப் பூட்டி அதிரடி வேட்டை நடத்தியதால் உள்ளாட்சித் துறை அதிகாரிகள் மத்தியில் பெரும் பீதி ஏற்பட்டுள்ளது.
இச்சோதனைகளின் மாவட்ட வாரியான விபரம் வருமாறு:
தூத்துக்குடி மாநகராட்சி: நுழைவாயில் பூட்டப்பட்டு பைக்குகளுக்குள் சோதனை!
தூத்துக்குடி மாநகராட்சி அலுவலகத்தில் கணக்கில் வராத லஞ்சப் பணம் புழங்குவதாகத் தலைமை அலுவலகத்திற்கு ரகசியத் தகவல் கிடைத்தது. அதன்பேரில், இன்று மாலை தூத்துக்குடி லஞ்ச ஒழிப்புத்துறை டி.எஸ்.பி பீட்டர் பால் ஜோசப் தலைமையிலான காவல்துறையினர் திடீரென மாநகராட்சி அலுவலகத்திற்குள் புகுந்தனர்.
சோதனை தொடங்கப்பட்ட உடனே மாநகராட்சியின் பிரதான நுழைவு வாயில் கதவுகள் முழுமையாகப் பூட்டப்பட்டன. உள்ளே இருந்த அதிகாரிகள், ஊழியர்கள் மற்றும் பொதுமக்கள் யாரும் வெளியே செல்லவும், வெளியில் இருந்து யாரும் உள்ளே வரவும் தடை விதிக்கப்பட்டது. தொடர்ந்து, அலுவலக அறைகளில் சோதனை ஒருபுறம் நடக்க, மறுபுறம் மாநகராட்சி வளாகத்தில் நிறுத்தி வைக்கப்பட்டிருந்த ஊழியர்களின் இருசக்கர வாகனங்கள் மற்றும் கார்களிலும் லஞ்ச ஒழிப்பு போலீசார் சோதனையை விரிவுபடுத்தினர்.
இருசக்கர வாகனங்களின் சீட்டுகளைத் (Seat cover) திறந்து, அதற்குள் ஏதேனும் லஞ்சப் பணம் பதுக்கி வைக்கப்பட்டுள்ளதா எனப் போலீசார் தீவிரமாக அங்குலம் அங்குலமாகச் சோதனை நடத்தினர். இந்த அதிரடி நடவடிக்கையால் தூத்துக்குடி மாநகராட்சி வளாகம் முழுவதும் இன்று மாலை பெரும் பரபரப்புக் காடாக மாறியது.
சேலம் மாநகராட்சி: 16 பில் கலெக்டர்களிடம் கிடுக்கிப்பிடி விசாரணை!
இதேபோல, சேலம் மாநகராட்சியின் தாதகாப்பட்டி பகுதியில் அமைந்துள்ள கொண்டலாம்பட்டி மண்டல அலுவலகத்தில் லஞ்ச ஒழிப்புத்துறை போலீசார் இன்று அதிரடிச் சோதனையைத் தொடங்கினர். சேலம் மாநகராட்சியில் உள்ள 4 மண்டலங்களில் 16 கோட்டங்களை உள்ளடக்கிய பெரிய மண்டலமாக இந்த கொண்டலாம்பட்டி மண்டலம் விளங்குகிறது.
இங்குள்ள நிர்வாகத்துறை அலுவலக அறை, பிறப்பு மற்றும் இறப்பு சான்றிதழ் வழங்கும் பிரிவு மற்றும் மிக முக்கியமாக வரி வசூல் செய்யும் ‘பில் கலெக்டர்கள்’ (Bill Collectors) அறை ஆகிய இடங்களில் லஞ்ச ஒழிப்புத் துறையினர் பிரிந்து சென்று சோதனையிட்டனர்.
அங்கு பணியில் இருந்த 16 பில் கலெக்டர்களையும் ஒரே அறைக்குள் வைத்து, அவர்கள் இன்று பொதுமக்களிடம் வசூல் செய்த வரிப்பணம் எவ்வளவு, அவர்களின் கைவசம் உள்ள கணக்கில் வராத கூடுதல் ரொக்கப் பணம் எவ்வளவு என்பது குறித்துக் கணக்குப்புத்தகங்களை வைத்து லஞ்ச ஒழிப்பு போலீசார் கிடுக்கிப்பிடி தணிக்கை மேற்கொண்டனர்.
இதேபோல் மணலி, தாம்பரம், கும்பகோணம், கள்ளக்குறிச்சி, காரைக்குடி, ஓசூர், திண்டுக்கல் உள்பட தமிழகம் முழுவதும் உள்ள நகராட்சி அலுவலகங்களில் லஞ்ச ஒழிப்புத்துறை இன்று ஒரே நேரத்தில் நடத்திய இந்த “ஆபரேஷன்” காரணமாக, முக்கிய அதிகாரிகள் மற்றும் இடைத்தரகர்கள் கடும் பீதியில் ஆழ்ந்துள்ளனர். சோதனையின் முடிவில் கைப்பற்றப்பட்ட கணக்கில் வராத சொகுசுப் பணம் மற்றும் முக்கிய ஆவணங்கள் குறித்த விபரங்கள் நள்ளிரவில் வெளியாகும் என எதிர்பார்க்கப்படுகிறது.