திருவள்ளூர் அருகே நடைபெற்ற புதிய பள்ளிவாசல் திறப்பு விழாவில் பங்கேற்ற திராவிட வெற்றிக் கழகத் தலைவர் மல்லை சத்யா, செய்தியாளர்களைச் சந்தித்துப் பேசினார். அப்போது மதிமுக பொதுச்செயலாளர் வைகோவின் சமீபத்திய செயல்பாடுகள் மற்றும் கருத்துகளைக் கடுமையாக விமர்சித்தார்.
தனது சொந்தக் கட்சியின் மாவட்டச் செயலாளராக இருந்த கணேசமூர்த்தியின் இறுதி ஊர்வலத்தில் பங்கேற்காத வைகோ, மற்றொரு கட்சியைச் சேர்ந்த வி.எஸ்.பாபுவின் இறுதி ஊர்வலத்தில் பங்கேற்று, இன்னொரு கட்சியின் தலைவரைப் புகழ்ந்து பேசியிருப்பது வெட்கக்கேடானது என்றும் வேதனை அளிப்பதாகவும் மல்லை சத்யா தெரிவித்தார்.
கோவையில் செய்தியாளர்களிடம் வைகோ நடந்து கொண்ட விதம் ஆதிக்க வர்க்கத்தின் சனாதனத் திமிரை வெளிப்படுத்துவதாகக் குற்றம்சாட்டிய அவர், செய்தியாளர்களின் கேள்விகளுக்குப் பதிலளிக்காமல், “நான் மட்டும்தான் பதில் சொல்லுவேன்” என்று கூறுவது அவரது அணுகுமுறையை வெளிப்படுத்துவதாக விமர்சித்தார்.
வைகோ தன்னை முட்டாள் என்று வர்ணித்திருப்பதாகக் குறிப்பிட்ட மல்லை சத்யா, 32 ஆண்டுகளாகக் கண்மூடித்தனமாக வைகோவைப் பின்பற்றிய தாங்களும் முட்டாள்கள்தான் என்று வேதனையுடன் கூறினார்.
திரைத்துறையில் நடிகர் வடிவேலு இல்லாத இடத்தில், அரசியல் களத்தில் வைகோ நகைச்சுவை நடிகராக மாறிவிட்டது சோகமாக இருப்பதாகவும் அவர் விமர்சித்தார்.
தற்போது நடைபெற்று வரும் அரசியல் நிகழ்வுகளைத் திசைதிருப்பும் நோக்கத்திலேயே வைகோ இதுபோன்ற கருத்துகளைத் தெரிவித்து வருவதாகக் குற்றம்சாட்டிய மல்லை சத்யா, திருமண வீட்டிற்குச் சென்றாலும் தனக்குத்தான் மாலை அணிவிக்க வேண்டும், இறந்தவர் வீட்டிற்குச் சென்றாலும் தனக்குத்தான் முக்கியத்துவம் அளிக்க வேண்டும் என்ற தோரணையில் வைகோ செயல்படுவதாகச் சாடினார்.
கூட்டணிக் கட்சியைச் சேர்ந்த போக்குவரத்துத் துறை அமைச்சர் விஜய் பார்த்திபன் யார் என்று தெரியவில்லை என வைகோ கூறியிருப்பது வெட்கக்கேடானது என்றும் வேதனைக்குரியது என்றும் தெரிவித்தார்.
தமிழ்நாட்டில் கொலை, கொள்ளை, பாலியல் வன்கொடுமைகள் உள்ளிட்ட குற்றச் சம்பவங்கள் நாள்தோறும் நடைபெற்று வருவதாகக் குறிப்பிட்ட அவர், அவற்றிலிருந்து மக்களின் கவனத்தைத் திசைதிருப்பும் வகையில் வைகோ போலியான நாடகத்தை அரங்கேற்றி வருவதாகக் குற்றம்சாட்டினார்.
திருப்பரங்குன்றம் தீபத் தூணில் ஒருமுறை மட்டுமே தீபம் ஏற்ற வேண்டும் என்ற உச்சநீதிமன்றத் தீர்ப்பு குறித்துப் பேசிய மல்லை சத்யா, அதற்கு எதிராகக் கடுமையான விமர்சனத்தை முன்வைத்தார்.
அந்தத் தீர்ப்பில் தனக்கு மாறுபட்ட கருத்து இருப்பதாகக் குறிப்பிட்ட அவர், நாட்டின் சமூக ஒருமைப்பாடு, மத நல்லிணக்கம், தமிழ்நாட்டின் ஜீவாதார உரிமைகள் மற்றும் மாநில சுயாட்சிக்கு எதிரானதாக இந்தத் தீர்ப்பு அமைந்துள்ளதாகக் கூறினார்.
திருப்பரங்குன்றத்தில் தீபம் ஏற்றுவதற்காகத் துணை ராணுவப் படையினரை அழைத்துச் செல்ல வேண்டும் என்று கூறுவது மாநில சுயாட்சிக்கு எதிரானது எனத் தெரிவித்த அவர், அங்கு தீபம் ஏற்றுவது தொடர்பாகப் பழைய நடைமுறையையே பின்பற்ற வேண்டும் என்றும் வலியுறுத்தினார்.
காவிரி ஆற்றின் குறுக்கே மேகதாது அணை கட்டுவோம் என்று கர்நாடக முதலமைச்சர் டி.கே.சிவக்குமார் கூறியிருப்பது இந்தியாவின் இறையாண்மை மற்றும் ஒருமைப்பாட்டுக்கு வேட்டு வைக்கும் செயலாக அமையும் என மல்லை சத்யா தெரிவித்தார்.
மேகதாது அணை கட்டுவதற்கு ஒன்றிய பாஜக அரசு அனுமதி அளிக்கக் கூடாது என்றும், அனுமதி அளித்தால் அதனால் ஏற்படும் விளைவுகளுக்கு ஒன்றிய அரசே பொறுப்பேற்க வேண்டும் என்றும் அவர் எச்சரித்தார்.
மீனவர் நலன் குறித்துப் பேசிய அவர், படகோட்டிகளாக வாழ்ந்து வரும் மீனவர்களை நாடோடிகளாக மாற்றும் வகையில் அரசு செயல்பட்டு வருவதாகக் குற்றம்சாட்டினார்.
மீனவர் நலனில் அக்கறை கொண்டவராகக் காட்டிக்கொண்டவர்கள் தற்போது மீனவர்களுக்கு எதிராகச் செயல்படுவது வேதனை அளிப்பதாகவும் தெரிவித்தார்.
சென்னை முதல் சேலம் வரையிலான சாலைத் திட்டம் ரத்து செய்யப்பட்டதைப் போல, பட்டினப்பாக்கத்தில் புதிய தலைமைச் செயலகம் கட்டும் திட்டத்தையும் ரத்து செய்ய வேண்டிய சூழல் ஏற்படலாம் என்று கூறிய மல்லை சத்யா, அந்தத் திட்டத்தை அரசு மறுபரிசீலனை செய்ய வேண்டும் என வலியுறுத்தினார்.
மேலும், பொருளாதாரத்தை மேம்படுத்த வேண்டும் என்று நினைக்கும் அரசு, பரந்தூர் விமான நிலையத் திட்டத்தை ஏன் ரத்து செய்தது என்றும் கேள்வி எழுப்பினார்.
பட்டினப்பாக்கத்தில் புதிய தலைமைச் செயலகம் அமைக்கும் திட்டம் மற்றும் பரந்தூர் விமான நிலையத் திட்டம் தொடர்பாக அரசின் நிலைப்பாட்டை விமர்சித்த அவர், பல்வேறு அரசியல் மற்றும் மக்கள் நலன் சார்ந்த பிரச்சினைகள் குறித்து தனது கருத்துகளைத் தெரிவித்தார்.
