எதிர்வரும் சட்டமன்றத் தேர்தலில் எடப்பாடி பழனிசாமியை எதிர்த்து, அன்புமணி போட்டியிட வேண்டும். எடப்பாடியை பலவீனப்படுத்துவதன் மூலம் 2029 தேர்தலில் அவர் மத்திய அமைச்சராக வாய்ப்பு உள்ளது என்று அரசியல் விமர்சகர் ரவீந்திரன் துரைசாமி தெரிவித்துள்ளார்.
அதிமுக – பாஜக கூட்டணியின் தற்போதைய நிலை மற்றும், அக்கூட்டணியில் உள்ள மற்ற கட்சிகளின் நிலைப்பாடு குறித்து அரசியல் விமர்சகர் ரவீந்திரன் துரைசாமி அளித்த நேர்காணலில் தெரிவித்துள்ளதாவது:-எடப்பாடி பழனிசாமியின் பொதுக்கூட்டங்களுக்கு மக்கள் அதிகளவில் வருகிறார்கள். காரணம் தமிழ்நாட்டில் இரண்டாவது பெரிய கட்சி அதிமுக தான். குறிப்பாக வடமாவட்டங்களில் எடப்பாடி பழனிசாமிதான் பெரிய தலைவர். அதற்கு காரணம் வன்னியர்களுக்கு 10.5 சதவீத உள்ஒதுக்கீடு வழங்கியதாகும். தனக்கு கூடுகிற மக்கள் கூட்டத்தை பார்த்து ஸ்டாலின் பயந்துவிட்டார் என்றும், அதனால் ஆம்புலன்ஸ் வாகனங்களைவிட்டு இடைஞ்சல் செய்வதாகவும் எடப்பாடி பழனிசாமி குற்றம் சாட்டியுள்ளார். அப்படி சொல்வதில் தவறு கிடையாது.
ஓபிஎஸ், பாஜக – அதிமுக கூட்டணிக்கு மீண்டும் வருவதற்கு மறுப்பு தெரிவித்துள்ளார். ஒருவேளை எடப்பாடி பழனிசாமி முதலமைச்சர் வேட்பாளர் இல்லை என்று அறிவித்தால், அவர் மீண்டும் கூட்டணிக்கு வருவார். தினகரனும் கிட்டத்தட்ட கூட்டணியை விட்டு வெளியேறியது போன்ற நிலைதான் உள்ளது. பாஜக மாநிலத் தலைவர் நயினார் நாகேந்திரன், தினகரன், சசிகலாவுக்கும் மிகவும் நெருக்கமானவர். தினகரன் கேட்டிருந்தால், நயினார் சந்திக்க ஏற்பாடு செய்து கொடுத்திருப்பார். ஆனால் தினகரனும் கேட்கவும் இல்லை. பிரதமரை அவர் சந்திக்கவும் இல்லை. கடைசியாக கடந்த ஆண்டு சேலத்தில் நடைபெற்ற நிகழ்ச்சியில் மோடியுடன் பங்கேற்று இருந்தார். இந்நிலையில், தற்போது அவர் என்டிஏ கூட்டணியில் உள்ளாரா? என்பது கேள்விக்குரியதாகவே உள்ளது.
அன்புமணி, தேர்தலில் தனித்து நின்று எடப்பாடியின் அதிமுகவை பாதிப்படைய செய்தால்தான் உண்மையான சமூகநீதி மலரும். அன்புமணி அல்லது சௌமியா ஆகியோர் எடப்பாடி தொகுதியில் வன்னியர் உள்ஒதுக்கீட்டை முன்வைத்து எடப்பாடி பழனிசாமியை எதிர்த்து போட்டியிட்டால் அது வன்னியர்களின் உணர்வுகளை பொருத்து சரியானதாகும். அன்புமணியை பொருத்தவரை, வன்னியர் உள்ஒதுக்கீடு விவகாரம் தான் சரியான பாதையாகும். அன்புமணியை குறிப்பிட்டு சொல்வதற்கு காரணம் அவர் திமுகவுக்கு எதிரான நிலைப்பாட்டில் உறுதியாக உள்ளார். ஆனால் மருத்துவர் ராமதாஸ், திமுக வெற்றிக்கூட்டணி என்றும், அதனால் அங்கு செல்லும் மனநிலையில் உள்ளதாக தெரிகிறது.
எடப்பாடி தொகுதியில் எடப்பாடி பழனிசாமி இருமுறை தோல்வியை தழுவியுள்ளார். 10.5 உள்ஒதுக்கீடு விவகாரத்தில் எடப்பாடி பழனிசாமி இரட்டை நிலைப்பாட்டுடன இருக்கிறார் என்பதை மக்கள் மனதில் பதிய வைத்தாலே எடப்பாடியால் நிற்க முடியாது. அதேவேளையில் அன்புமணி, எடப்பாடி பழனிசாமியுடன் கூட்டணிக்கு சென்றால் மற்ற சமுதாயத்தினர் வாக்களிக்க மாட்டார்கள். எப்படி வெற்றி பெறுவார்கள். தற்போது எடப்பாடியை எதிர்த்து போட்டியிட்டு அவரை பலவீனப்படுத்தினால், 2029ல் அன்புமணி மத்திய அமைச்சராகும் வாய்ப்பு உள்ளது. எடப்பாடியை நம்பி சென்று தோல்வி அடைந்தால், சி.வி.சண்முகம், கே.பி.முனுசாமி, அன்பழகன், வீரமணி போன்றவர்கள் தலைவர் ஆகிவிடுவார்கள்.
சி.பி.ராதாகிருஷ்ணனை, துணை ஜனாதிபதி வேட்பாளராக அறிவித்ததன் மூலம் எடப்பாடி பழனிசாமிக்கு நெருக்கடி தரப்படுவதாக கூறப்படுகிறது. 20 சதவீதம் வாக்குகள் உள்ள ஒரு தலைவர் பாஜக கூட்டணிக்கு வருவது நல்ல விஷயம்தான். ஆனால் அவரை 25-30 சதவீதம் வாக்குகள் கொண்டவராக வளர்த்துவிட்டால், அவர் 2029 தேர்தலில் காங்கிரசுக்கு 20 தொகுதிகளை வழங்குவார். அப்போது அவரை முடக்கிப் போட 20 சீட்டுகள் வாங்கி, அதற்குள்ளாக அவரை கட்டுப்படுத்த வேண்டும். அல்லது சீமானை முன்னிலைப்படுத்தி, 18க்குள் கட்டுப்படுத்த வேண்டும். அதற்கு பின்னர் அவரால் நாடாளுமன்றத்திற்கு தனித்து நிற்க முடியாது. அப்போது அவர் பாஜகவிடம் வந்துதான் ஆக வேண்டும். எனவே எடப்பாடியின் அளவுக்கு அவரை நிறுத்த வேண்டும். அதை மீறி சென்றார் என்றால், மற்றொருவரை முதலமைச்சராக சொல்லி 150 தொகுதிகளில் மூன்றாவது இடத்திற்கு தள்ள வேண்டும். இதுதான்வியூகம்.
ஒருவேளை எடப்பாடி பழனிசாமி, சீட் பங்கீடு விவகாரத்தில் கடைசி நேரத்தில் விலகி விஜயுடன் கூட்டணிக்கு செல்லும்பட்சத்தில் பலம் நிருபிக்காத விஜய்க்கு, இடம் வழங்கினால் எடப்பாடி பழனிசாமிக்கு தான் பாதிப்பு. விஜய் தரப்பு தங்களை பெரிதாக காட்டிக்கொண்டு குறைவான இடங்களை வாங்கினால் அவர்களுக்கும் பாதிப்பு. தற்போதைய சூழ்நிலையில் முதலமைச்சர் மு.க.ஸ்டாலினுக்கு தான் அட்வான்டேஜ் உள்ளது. ஸ்டாலின் Vs மற்றவர்கள் என்கிற நிலையில்தான் தமிழ்நாடு அரசியல் உள்ளது. ஸ்டாலின் கொடுக்கும் இடங்கள் எல்லாம் எம்.பி. சீட், எம்எல்ஏ சீட் என்பதால் கூட்டணியில் இருந்து யாரும் செல்ல மாட்டார்கள். அதேவேளையில் எடப்பாடி பழனிசாமியால் வாக்குகளை வெற்றியாக மாற்ற முடியாது, இவ்வாறு அவர் தெரிவித்தார்.