தவெகவில் கட்சி கட்டமைப்பு இல்லை. போதிய அனுபவம் இல்லை என்று விமர்சனங்கள் உள்ளபோது செங்கோட்டையனின் வருகை அக்கட்சிக்கு ஒரு வரமாக இருக்கும் என்று மூத்த பத்திரிகையாளர் எஸ்.பி. லட்சுமணன் தெரிவித்துள்ளார்.
செங்கோட்டையன் தவெகவில் இணைந்துள்ளது குறித்து மூத்த பத்திரிகையாளர் எஸ்.பி.லட்சுமணன் யூடியூப் சேனலுக்கு அளித்த நேர்காணலில் தெரிவித்துள்ளதாவது: தவெக ஒரு வளர்கிற கட்சி, அரசியல் தெரியவில்லை, விஜய் முதற்கொண்டு அரசியல் அடிப்படை என்ன? என்று புரியவில்லை என பல்வேறு விமர்சனங்களை விஜய் எதிர் கொண்டுள்ளார். இந்த சூழலில் அந்த தகுதிகள் படைத்த செங்கோட்டையன் போய் இணைகிற போது, விஜய்க்கும், தவெகவுக்கும் மிகப்பெரிய பலமாக இருக்கும். என்ன செய்வது என்று தெரியாமல் அவர்கள் தவிக்கிறார்கள் என்று நாம் சொல்கிறோமோ, அந்த விஷயங்களுக்கு செங்கோட்டையன் மிகப் பெருவாரியாக உதவுவார். அந்த கட்சியின் கட்டமைப்பை உருவாக்குவதில் தொடங்கி, நிகழ்ச்சிகளை எப்படி நடத்துவது, பொதுக்குழு – செயற்குழுவில் தீர்மானங்களை எப்படி இயற்றுவது என்பன உள்ளிட்ட அடிப்படை விஷயங்களை சொல்லித்தருவார். விஜய் இரட்டை இலக்கத்தில் வாக்கு சதவீதம் பெருவார் என்பதை யாரும் மறுக்கவில்லை. 10 -15 சதவீதம் வாக்குகள் பெறுவதற்கான கள சூழல் இருக்கிறது. ஆனால் கட்சியில் போதிய கட்டமைப்புகள் இல்லை என்று பலர் வருத்தப்பட்டனர். அத்தகைய சூழ்நிலையில் தவெகவுக்கு ஒரு வரமாக செங்கோட்டையனுடைய வரவு அமைந்துள்ளது. 
மறுபுறம் செங்கோட்டையனுக்கு இது பெருமைக்குரிய முடிவு அல்ல. எம்ஜிஆர், ஜெயலலிதா, ஓபிஎஸ், எடப்பாடி என 4 முதலமைச்சர்களிடம் கட்சி வேலையும், நிர்வாக வேலையும் பார்த்த செங்கோட்டையன், தன்னுடைய அரசியல் அனுபவத்திற்குரிய வயதுடைய விஜயிடம் சேர்ந்துள்ளார். அவரை தள்ளி நின்று பார்க்கிற எங்களை போன்றவர்களால் இதனை உடனடியாக ஏற்றுக்கொள்ள முடியாது. தன்னை கட்சியில் இருந்து நீக்கி வேதனைக்கு உள்ளாக்கிய எடப்பாடிக்கு பாடம் கற்பிக்க வேண்டும் என்று செங்கோட்டையன் நினைத்தால், அவருக்கு வேறு வாய்ப்பு இல்லை. அதிமுகவை வீழ்த்துகிற வல்லமை உள்ள கட்சி தவெக என்பதால் செங்கோட்டையன் அதில் இணைந்திருக்கலாம். செங்கோட்டையனுக்கு கட்சியில் வழங்கப்படும் பதவியை விட, அவருக்கு கொடுக்கப் போகிற சுதந்திரம்தான் முக்கியமானது. அவரை சுதந்திரமாக செயல்பட விட்டு, ஆலோசனைகளை கேட்டு நடந்தால் அரசியல்வயப்படுவதை நோக்கி அந்த கட்சி பயணிக்கும். செங்கோட்டையன அங்கு சென்றதே கட்சியில் சிலருக்கு எரிச்சலை கொடுத்திருக்கும். விஜய் தன்னுடைய அரசியல் பாணியை மாற்றிக்கொள்ள வேண்டும். சினிமாத்தனத்தில் இருந்து விஜய் இன்னும் வெளியே வரவில்லை. செங்கோட்டையனின் முதல் சவால். அவசியமான காரியம் அதுவாக தான் இருக்கும்.
செங்கோட்டையனின் முன்னெடுப்புகளுக்கு, தவெகவில் உள்ள இளைஞர்கள் ஒத்துழைப்பார்களா என்பது போக போக தான் தெரியும். செங்கோட்டையன், ஜெயலலிதாவின் சுற்றுபயண திட்டங்களை எல்லாம் சிறப்பாக போட்டவர். அப்போது அதிமுக தொண்டர்கள் ஒத்துழைப்பு வழங்கினார்கள். தவெகவில் செங்கோட்டையன் எடுக்கப்போகிற முன்னெடுப்புகளுக்கு இளைஞர்கள் எவ்வளவு தூரம் ஒத்துழைப்பு தருவார்கள் என்பதை பொருத்திருந்து தான் பார்க்க வேண்டும். செங்கோட்டையன் வரவால் அதிமுகவுக்கு சரிவு இருக்கிறது. ஊர் அறிந்த பிரபலம், தமிழ்நாடு முழுவதும் தலைவர்கள், தொண்டர்களிடம் நல்ல தொடர்பில் இருக்கும் செங்கோட்டையன், மற்றொரு இயக்கத்தில் இருந்துகொண்டு, தன்னை அவமானப்படுத்திய எடப்பாடிக்கு ஒரு பாடம் புகட்டாமல் சும்மா இருக்க மாட்டார். அப்போது, அங்கு வருத்தத்திலும், வேதனையிலும் இருப்பவர்களை தொடர்புகொண்டு செங்கோட்டையனும் பேசுவார். அதிமுகவில் வாய்ப்பு கிடைக்காது என்று நினைப்பவர்கள், செங்கோட்டையன் மூலமாக தவெகவில் இணைவார்கள். அந்த வேகம் இனி அதிகமாகும். அதனால் பாதிக்கப் போகிற கட்சி அதிமுகவாக தான் இருக்கும்.
பாஜகவை நம்பி போனால், அவர்கள் எப்படி நட்டாற்றில் விடுவார்கள் என்பதற்கு சமீபத்திய உதாரணம்தான் செங்கோட்டையன். தெரிந்தும் தெரியாமலும் அவரை டெல்லிக்கு வரவழைத்தும், சில நேரம் சென்னையிலும் ரகசிய சந்திப்புகளை நடத்தி, அவருக்கு சில நம்பிக்கைகளை கொடுத்து கலாட்டாவை ஆரம்பியுங்கள் என்று சொன்னார்களா என தெரியாது. ஆனால் ஏதோ ஒன்று நடந்துள்ளது என்பதை பாஜகவினரே மறுக்க மாட்டார்கள். அப்படி பண்ண செங்கோட்டையனுக்கு, கடந்த 10 நாட்களாக பாஜக ஒரு மௌனத்தை கடைபிடிக்கிறது. செங்கோட்டையன் ஏதோ ஒரு முடிவு எடுக்கப்போகிறார் என்று தெரிந்து இருந்தும் பாஜக நேரடியாகவோ, மறைமுகமாகவோ எந்த முயற்சியும் எடுக்கவில்லை. அப்போது அவர்களை நம்பி சென்றால் இதுதான் நிலை என்று எல்லா தமிழ்நாட்டு அரசியல்வாதிகளும் புரிந்துகொள்ள வேண்டும்.
விஜய் அரசியலுக்கு வந்தபோது திமுக உள்ளிட்ட அனைத்துக்கட்சிகளுக்கும் தான் பாதிப்பு ஏற்படும். ஆனால் அரசியல் தெரிந்த பிரபலங்கள் போய் சேர்வதை, ஆட்சியை தக்க வைக்க நினைக்கும் திமுக சற்றுகூடுதல் பதற்றத்தோடு கவனிக்க வேண்டும். தவெக என்கிற இயக்கம் விஜயை மையப்படுத்தியதாகும். அவர் தன்னுடைய அரசியல் பாணியை மாற்றிக்கொள்ள வேண்டும். செங்கோட்டையனை எந்த அளவுக்கு மரியாதையை நடத்துகிறார்கள் என்பதை பொறுத்துதான் மற்ற பிரபலங்கள் வந்து சேர்வார்கள். தேர்தல் கைக்கு எட்டுகிற தூரத்திற்கு வந்துவிட்டது. விஜய் உஷராகா இல்லாவிட்டால் 15 சதவீத வாக்கு என்பதெல்லாம் கனவாக போய் முடியும், இவ்வாறு அவர் தெரிவித்தார்.