சென்னை அண்ணாநகர் பகுதியில் மக்கள் நடமாட்டம் அதிகம் உள்ள குடியிருப்புப் பகுதியில் அமைந்துள்ள ஒரு பழைய இரும்புப் பொருட்கள் சேமிப்புக் கிடங்கில் (Scrap Godown) இன்று இரவு திடீரென பயங்கர தீ விபத்து ஏற்பட்டது.
அண்ணாநகர் O பிளாக், முதலாவது நிழற்சாலை (First Avenue) பகுதியில் இந்த பழைய இரும்பு குடோன் இயங்கி வந்தது. இன்று (டிசம்பர் 28) இரவு சுமார் 7:30 மணியளவில், குடோனின் ஒரு பகுதியில் இருந்து கரும்புகை வெளியேறத் தொடங்கியது. அடுத்த சில நிமிடங்களிலேயே தீ மளமளவென பரவி, குடோன் முழுவதும் கொழுந்துவிட்டு எரியத் தொடங்கியது.
தீ விபத்து குறித்து தகவல் அறிந்தவுடன், அண்ணாநகர், கீழ்ப்பாக்கம் மற்றும் வில்லிவாக்கம் உள்ளிட்ட பகுதிகளில் இருந்து 7-க்கும் மேற்பட்ட தீயணைப்பு வாகனங்களில் வீரர்கள் சம்பவ இடத்திற்கு விரைந்தனர். குடோனில் பிளாஸ்டிக், இரும்பு மற்றும் எளிதில் தீப்பற்றக்கூடிய பொருட்கள் இருந்ததால், தீயைக் கட்டுப்படுத்துவதில் கடும் சவால் நிலவியது.
தீயணைப்பு வீரர்கள் தண்ணீரை பீய்ச்சி அடித்து தீ மேலும் பரவாமல் தடுக்கும் முயற்சியில் ஈடுபட்டனர்.அடர்ந்த கரும்புகை அப்பகுதி முழுவதையும் சூழ்ந்ததால், அக்கம் பக்கத்தில் உள்ள குடியிருப்பு வாசிகள் மூச்சுத்திணறல் மற்றும் அச்சத்திற்கு உள்ளாகினர். முதற்கட்ட தகவல்களின்படி, இந்த விபத்தில் நல்வாய்ப்பாக உயிர்ச் சேதம் ஏதும் ஏற்படவில்லை எனத் தெரியவந்துள்ளது.
விபத்திற்கான காரணம் குறித்து போலீசார் விசாரணை நடத்தி வருகின்றனர். குடோனுக்கு அருகில் பட்டாசு வெடித்தபோது விழுந்த தீப்பொறியால் விபத்து ஏற்பட்டிருக்கலாம் அல்லது மின் கசிவு (Short Circuit) காரணமாக இருக்கலாம் என சந்தேகிக்கப்படுகிறது.
தீ விபத்து காரணமாக அண்ணாநகர் முதலாவது நிழற்சாலை பகுதியில் போக்குவரத்து தற்காலிகமாக நிறுத்தி வைக்கப்பட்டு, வாகனங்கள் மாற்றுப் பாதையில் திருப்பி விடப்பட்டன.
தீயணைப்பு வீரர்கள் தொடர்ந்து தீயை அணைக்கும் பணியில் ஈடுபட்டுள்ளனர். விபத்து நடந்த பகுதியில் போலீசார் பாதுகாப்புப் பணியில் ஈடுபட்டுள்ளதோடு, மக்கள் அப்பகுதிக்கு வருவதைத் தவிர்க்குமாறு அறிவுறுத்தியுள்ளனர்.