மருத்துவப் படிப்புகளுக்கான இளநிலை நீட் (NEET-UG) நுழைவுத் தேர்வில் மிகப் பெரிய மாற்றத்தை மத்திய கல்வி அமைச்சகம் அறிவித்துள்ளது. வினாத்தாள் கசிவு மற்றும் முறைகேடுகளைத் தடுக்க, இனிவரும் காலங்களில் நீட் தேர்வு முழுக்க முழுக்க கணினி வழித் தேர்வாக (CBT – Computer Based Test) நடத்தப்படும் எனத் தெரிவிக்கப்பட்டுள்ளது.
மத்திய கல்வி அமைச்சர் தர்மேந்திர பிரதான் இன்று செய்தியாளர்களிடம் பேசுகையில், “தேர்வின் நம்பகத்தன்மையை உறுதி செய்யவும், வெளிப்படைத்தன்மையை அதிகரிக்கவும் 2027-ஆம் ஆண்டு முதல் நீட் தேர்வு முற்றிலும் ஆன்லைன் முறையில் (Computer Based Mode) நடத்தப்படும்” என்று உறுதிப்படுத்தினார்.
தற்போதுள்ள பேனா-பேப்பர் (OMR) முறையில் வினாத்தாள் கசிவதற்கான வாய்ப்புகள் அதிகம் இருப்பதால், உயர்மட்டக் குழுவின் பரிந்துரையின் பேரில் இந்த வரலாற்றுச் சிறப்புமிக்க முடிவு எடுக்கப்பட்டுள்ளது
சமீபத்தில் மே 3-ஆம் தேதி நடைபெற்ற நீட் தேர்வில் முறைகேடுகள் நடந்ததாக எழுந்த புகாரைத் தொடர்ந்து, அந்தத் தேர்வு ரத்து செய்யப்பட்டு ஜூன் 21, 2026 அன்று மறுதேர்வு நடைபெறவுள்ளது. இந்த மறுதேர்வில் சில முக்கிய மாற்றங்கள் அமல்படுத்தப்பட்டுள்ளன:
டிஜிட்டல் வினாத்தாள்கள்: அச்சிடப்பட்ட வினாத்தாள்களுக்குப் பதிலாக, தேர்வு தொடங்குவதற்குச் சில நிமிடங்களுக்கு முன்புதான் தேர்வு மையங்களுக்கு ‘டிஜிட்டல் முறையில் குறியாக்கம் செய்யப்பட்ட’ (Digitally Encrypted) வினாத்தாள்கள் அனுப்பப்படும்.
கூடுதல் நேரம்: மாணவர்களின் நலன் கருதி தேர்வு நேரம் 15 நிமிடங்கள் அதிகரிக்கப்பட்டுள்ளது (மதியம் 2:00 மணி முதல் மாலை 5:15 மணி வரை).
மையங்களைத் தேர்ந்தெடுக்கும் வசதி:
மாணவர்கள் தங்களுக்கு விருப்பமான தேர்வு மையங்களை மீண்டும் தேர்வு செய்ய வாய்ப்பு வழங்கப்பட்டுள்ளது.
வினாத்தாள் கசிவு போன்ற விவகாரங்களால் மன உளைச்சலுக்கு ஆளான மாணவர்களுக்கும் பெற்றோர்களுக்கும், இந்த ஆன்லைன் முறை மாற்றம் ஒரு நிரந்தர தீர்வாக அமையும் என எதிர்பார்க்கப்படுகிறது. இருப்பினும், கிராமப்புற மாணவர்களுக்குக் கணினி வழித் தேர்வு குறித்து போதிய பயிற்சி வழங்கப்பட வேண்டும் என்ற கோரிக்கையும் எழுந்துள்ளது.
ஜூன் 21-ல் நீட் மறுதேர்வு நடைபெறும் – தேசிய தேர்வு முகமை அறிவிப்பு