திருமண நாளன்று அதிகாலையில் நேர்ந்த கோர விபத்தில் படுகாயமடைந்து மருத்துவமனையின் தீவிர சிகிச்சைப் பிரிவில் (ICU) அனுமதிக்கப்பட்டிருந்த மணப்பெண்ணுக்கு, திட்டமிட்ட சுபமுகூர்த்த நேரத்தில் மணமகன் தாலி கட்டிய நெகிழ்ச்சியான சம்பவம் கேரளாவில் அரங்கேறியுள்ளது. திரைப்படக் காட்சிகளை மிஞ்சும் வகையில் நடந்த இந்த உண்மைச் சம்பவம் சமூக வலைத்தளங்களில் வைரலாகி, பலரையும் நெகிழச் செய்துள்ளது.
அலங்காரத்திற்குச் சென்றபோது நேர்ந்த துயரம்
ஆலப்புழா மாவட்டம் கொம்மாடியைச் சேர்ந்த ஆவணி என்ற ஆசிரியருக்கும், சேர்த்தலை பகுதியைச் சேர்ந்த பொறியியல் கல்லூரி உதவிப் பேராசிரியர் ஷரோன் என்பவருக்கும் இருவீட்டாரின் சம்மதத்துடன் திருமணம் நிச்சயிக்கப்பட்டிருந்தது.
இதற்கான திருமண வரவேற்பு நிகழ்ச்சி கடந்த வியாழக்கிழமை இரவு விமரிசையாக நடந்து முடிந்தது. மறுநாள் வெள்ளிக்கிழமை மதியம் 12.15 மணி முதல் 12.30 மணிக்குள் திருமண முகூர்த்தம் குறிக்கப்பட்டிருந்தது. இதனால், வெள்ளிக்கிழமை அதிகாலை 3 மணியளவில் மணப்பெண் அலங்காரத்திற்காக (Bridal Makeup) ஆவணி, தனது அத்தை மற்றும் உறவினர்களுடன் காரில் கோட்டயம் நோக்கிச் சென்று கொண்டிருந்தார்.
குமரகம் என்ற இடத்திற்கு அருகே சென்றபோது, கட்டுப்பாட்டை இழந்த கார் எதிர்பாராதவிதமாக சாலையோர மரத்தில் பயங்கரமாக மோதி விபத்துக்குள்ளானது. இந்த விபத்தில் காரில் இருந்த அனைவரும் படுகாயமடைந்தனர்.
உடனடியாக அங்கிருந்தவர்கள் அவர்களை மீட்டு கோட்டயம் மருத்துவக் கல்லூரி மருத்துவமனையில் அனுமதித்தனர். பின்னர் மேல் சிகிச்சைக்காக கொச்சியில் உள்ள பிரபல தனியார் மருத்துவமனைக்கு (VPS Lakeshore Hospital) ஆவணி மாற்றப்பட்டார். பரிசோதனையில், ஆவணியின் முதுகுத்தண்டுவடத்தில் (Spinal Cord) பலத்த காயம் ஏற்பட்டுள்ளது தெரியவந்தது.
திருமண மண்டபத்தில் உறவினர்கள் அனைவரும் கூடியிருந்த வேளையில், இந்த விபத்து செய்தி இரு குடும்பத்தினரையும் பெரும் அதிர்ச்சியிலும் சோகத்திலும் ஆழ்த்தியது. ஆனால், மணமகன் ஷரோன் இந்த இக்கட்டான சூழ்நிலையிலும் ஒரு உறுதியான முடிவை எடுத்தார். “எக்காரணத்தைக் கொண்டும் திருமணம் தள்ளிப்போகக் கூடாது, இந்தச் சூழ்நிலையில் ஆவணிக்கு என்னுடைய ஆதரவு தான் மிக முக்கியம்” என்று கூறி, திட்டமிட்டபடியே அவளைத் திருமணம் செய்துகொள்ளப் போவதாக அறிவித்தார்.
இதையடுத்து, இருவீட்டாரும் மருத்துவமனை நிர்வாகத்திடம் பேசி சிறப்பு அனுமதி பெற்றனர். மருத்துவர்களின் தீவிர கண்காணிப்புடன், தீவிர சிகிச்சைப் பிரிவில் (ICU) ஸ்ட்ரெச்சரில் படுத்திருந்த மணப்பெண் ஆவணியின் கழுத்தில், சுபமுகூர்த்த நேரத்தில் மணமகன் ஷரோன் தாலி கட்டினார்.
“நாங்கள் நீண்ட நாட்களாக காதலித்து வந்தோம். இந்த விபத்து எங்களை உலுக்கியிருந்தாலும், ஆவணி விரைவில் குணமடைய அவளுக்கு என் முழு ஆதரவும் அரவணைப்பும் தேவை. அதனால்தான் இந்த முடிவை எடுத்தோம்.” மணமகன் ஷரோன் உருக்கமாக தெரிவித்துள்ளார்.
மணமகன் மற்றும் முக்கிய உறவினர்கள் மருத்துவமனையில் திருமணச் சடங்குகளை நடத்திக் கொண்டிருந்த அதே நேரத்தில், ஆலப்புழாவில் உள்ள திருமண மண்டபத்திற்கு வந்திருந்த விருந்தினர்களுக்கு, ஏற்கனவே திட்டமிட்டபடி திருமண விருந்து (Sadya) பரிமாறப்பட்டது. மணமக்கள் இல்லாமல் உறவினர்கள் மட்டும் சோகத்துடனும், அதே சமயம் மணமகனின் காதலைப் பாராட்டியபடியும் உணவருந்திச் சென்றனர்.
தற்போது ஆவணிக்கு முதுகுத்தண்டுவட அறுவை சிகிச்சை செய்யப்பட உள்ளதாகவும், அவரது உடல்நிலை சீராக இருப்பதாகவும் மருத்துவர்கள் தெரிவித்துள்ளனர். ஆபத்தான நிலையிலும் தனது காதலியைக் கைவிடாமல், ICU-விலேயே தாலி கட்டிய மணமகனின் இந்தச் செயல், “உண்மையான காதலுக்கு இலக்கணம்” என்று சமூக வலைத்தளங்களில் பலராலும் பாராட்டப்பட்டு வருகிறது.
தலைகீழாக நின்று சிவ தாண்டவ ஸ்தோத்திரம்: 8 வயது சிறுவன் உலக சாதனை!