சமீபத்தில் நடந்து முடிந்த 2026 சட்டமன்ற பொதுத் தேர்தல் முடிவுகள், தமிழக அரசியல் களத்தையே ஒட்டுமொத்தமாக புரட்டிப்போட்டுள்ளன. குறிப்பாக அதிமுகவில் ஏற்பட்டுள்ள உட்கட்சிப் பூசல்களும், சட்டமன்ற உறுப்பினர்களின் அடுத்தடுத்த ராஜினாமாக்களும் தமிழக அரசியலில் பெரும் புயலைக் கிளப்பியுள்ளன. வரலாற்றில் இல்லாத பின்னடைவாக 47 இடங்களில் மட்டுமே வெற்றி பெற்று, சட்டப்பேரவையில் 3-வது இடத்திற்குத் தள்ளப்பட்ட அதிமுக, தற்போது அடுத்தடுத்த எம்.எல்.ஏ-க்களின் ராஜினாமாவால் மேலும் பலவீனமடைந்து வருகிறது.
பிளவின் பின்னணி:
‘தவெக’ அரசுக்கு ஆதரவும், கொறடா உத்தரவு மீறலும்
தேர்தலில் யாருக்கும் பெரும்பான்மை கிடைக்காத இக்கட்டான சூழ்நிலையில், தமிழக வெற்றி கழகத்தின் (தவெக) தலைவர் விஜய், அதிமுகவின் முக்கியத் தலைவர்களான எஸ்.பி.வேலுமணி மற்றும் சி.வி.சண்முகம் தரப்பைச் சந்தித்து ஆதரவு கோரினார். இதனைத் தொடர்ந்து, அதிமுகவின் 25 எம்.எல்.ஏ-க்கள் எடப்பாடி பழனிசாமிக்கு (இபிஎஸ்) எதிராகத் தனி அணியாகச் செயல்படத் தொடங்கினர். இபிஎஸ் தரப்புக்கு 22 எம்.எல்.ஏ-க்களின் ஆதரவு மட்டுமே இருந்தது.
தமிழக வெற்றி கழக அரசு கொண்டு வந்த நம்பிக்கை தீர்மானத்தின் மீதான வாக்கெடுப்பில், வேலுமணி மற்றும் சி.வி.சண்முகம் தலைமையிலான 25 எம்.எல்.ஏ-க்கள் கட்சித் தலைமையின் கொறடா உத்தரவை மீறி, தவெக அரசுக்கு ஆதரவாக வாக்களித்தனர். இதனால், இரு தரப்பும் சபாநாயகரிடம் மாறி மாறி கட்சித் தாவல் தடைச் சட்டத்தின் கீழ் நடவடிக்கை எடுக்கக் கோரி மனுக்களை அளித்தன.
அடுத்தடுத்து சரிந்த எம்.எல்.ஏ-க்களின் எண்ணிக்கை :
அரசியல் பரபரப்புகளுக்கு இடையே, வேலுமணி தரப்பில் இருந்த முக்கியச் சட்டமன்ற உறுப்பினர்களான மரகதம் குமரவேல், ஜெயக்குமார், சத்யபாமா மற்றும் இசக்கி சுப்பையா ஆகிய 4 பேர் தங்களது பதவிகளை அதிரடியாக ராஜினாமா செய்தனர். இதனால் அதிமுகவின் பலம் 47-லிருந்து 43 ஆகக் குறைந்தது.
இதற்கிடையே நடந்த சமாதானப் பேச்சுவார்த்தையில், வேலுமணி தரப்பு எம்.எல்.ஏ-க்கள் இபிஎஸ்ஸிடம் மன்னிப்புக் கடிதம் வழங்கியதால், கட்சித் தாவல் நடவடிக்கைக்கான கடிதங்கள் சபாநாயகரால் திரும்பப் பெறப்பட்டன. இருப்பினும், முரண்பாடுகள் ஓயவில்லை.
தொடர்ந்து, டெல்டா மற்றும் தென் மாவட்டங்களின் முக்கிய முகமான முன்னாள் சுகாதாரத் துறை அமைச்சர் சி.விஜயபாஸ்கர் தனது பதவியை ராஜினாமா செய்தார் (பலம்: 42). இதன் தொடர்ச்சியாக, இன்றைய தினம் கரூர் சட்டமன்ற உறுப்பினர் எம்.ஆர்.விஜயபாஸ்கர் சபாநாயகர் ஜே.சி.டி.பிரபாகரை நேரில் சந்தித்துத் தனது ராஜினாமாவை வழங்கியுள்ளார். அவரது ராஜினாமா ஏற்றுக்கொள்ளப்பட்டதாக சபாநாயகர் அறிவித்ததை அடுத்து, அதிமுகவின் சட்டமன்ற உறுப்பினர்கள் எண்ணிக்கை தற்போது 41 ஆகக் குறைந்துள்ளது.
இபிஎஸ் மீது அதிருப்தி: புதிய பதவிகளால் வெடித்த மோதல்
அரசுக்கு ஆதரவாக வாக்களித்த எம்.எல்.ஏ-க்களின் கட்சிப் பதவிகளை எடப்பாடி பழனிசாமி பறித்திருந்தார். அதன் பின்னர், அவர்களுக்கு மீண்டும் மாவட்டச் செயலாளர் போன்ற முக்கியப் பொறுப்புகள் வழங்கப்படும் என எதிர்பார்க்கப்பட்டது.
ஆனால், கடந்த வியாழக்கிழமை அறிவிக்கப்பட்ட புதிய நிர்வாகிப் பட்டியலில் தங்களுக்குத் தகுந்த முக்கியத்துவம் கிடைக்காததால் சட்டமன்ற உறுப்பினர்கள் கடும் அதிருப்தியில் உள்ளனர்.
கட்சியின் தோல்விக்கு இபிஎஸ்ஸின் தன்னிச்சையான செயல்பாடுகளே காரணம்.
பிரிந்து சென்றவர்களை ஒன்றிணைக்க இபிஎஸ் எந்த முயற்சியும் எடுக்கவில்லை.
அதிருப்தியில் உள்ள நிர்வாகிகளை நேரில் அழைத்துச் சமாதானப்படுத்தத் தலைமை முன்வரவில்லை என்பது போன்ற அடுக்கடுக்கான குற்றச்சாட்டுகளை நிர்வாகிகள் முன்வைத்து வருகின்றனர்.
வேலுமணி தரப்பின் அடுத்தகட்ட திட்டம் என்ன? தவெக-வில் ஐக்கியமா?
பதவி திருப்தி அளிக்காததால், தங்களுக்கு வழங்கப்பட்ட புதிய பொறுப்புகளைத் திரும்ப ஒப்படைக்கவும், தங்களுக்கு மீண்டும் ‘மாவட்டச் செயலாளர்’ பொறுப்பை வழங்கக் கோரியும் கூட்டு கடிதம் ஒன்றை இபிஎஸ்ஸிடம் வழங்க வேலுமணி தரப்பினர் திட்டமிட்டு வருகின்றனர்.
மறுபுறம், ராஜினாமா செய்துள்ள எம்.எல்.ஏ-க்கள் மற்றும் ராஜினமா செய்யத் திட்டமிட்டுள்ள மேலும் சில சட்டமன்ற உறுப்பினர்கள் தவெக-வில் தங்களுக்கு முக்கியத்துவம் கிடைக்கும் என்றும், இடைத்தேர்தலில் மீண்டும் போட்டியிட வாய்ப்பு கிடைக்கும் என்றும் நம்புகின்றனர்.
தொடர் சரிவைச் சந்தித்து வரும் அதிமுகவை முட்டுக் கொடுத்து நிறுத்த எடப்பாடி பழனிசாமி அதிருப்தி நிர்வாகிகளின் கோரிக்கையை ஏற்பாரா? அல்லது அதிமுக மேலும் பலவீனமடையப் போகிறதா? என்பதைப் பொறுத்திருந்துதான் பார்க்க வேண்டும்.