“தோஷம் கழித்தால் மூட்டு வலி குணமாகும்” – உளுந்தூர்பேட்டையில் பெண்ணிடம் 1 பவுன் நகை பறித்த மருமகன், மாமியார் கைது!

மூட்டு வலி குணமாகத் தங்கம் வைத்துத் தோஷம் கழிக்க வேண்டும் என்று கூறி, 53 வயதுப் பெண்ணை ஏமாற்றி 1 பவுன் தங்க நகையைப் பறித்துச் சென்ற வாலிபரையும், அவரது மாமியாரையும் திருநாவலூர் போலீசார் அதிரடியாகக் கைது செய்துள்ளனர்.​

​​கள்ளக்குறிச்சி மாவட்டம் உளுந்தூர்பேட்டை அடுத்த வண்டிப்பாளையம் கிராமத்தைச் சேர்ந்தவர் செல்வராஜ். இவரது மனைவி பாக்கியம் (53). இவருக்கு நீண்ட நாட்களாக மூட்டு வலி இருந்து வந்துள்ளது. சம்பவத்தன்று பாக்கியம் மட்டும் வீட்டில் தனியாக இருந்தபோது, அங்கு ஒரு வாலிபர் வந்துள்ளார்.

​பாக்கியத்தின் மூட்டு வலிக்குத் தன்னிடம் உடனடி தீர்வு இருப்பதாகக் கூறிய அந்த வாலிபர், அதற்குத் தங்கம் வைத்துத் தோஷம் கழிக்க வேண்டும் என்று நம்பும்படி பேசியுள்ளார். இதனை உண்மை என்று நம்பிய பாக்கியம், தன்னிடம் இருந்த 1 பவுன் தங்க நகையை அவரிடம் கொடுத்துள்ளார். நகையை வாங்கிய அந்த வாலிபர், தந்திரமாகப் பாக்கியத்திடம் குடிக்கத் தண்ணீர் கேட்டுள்ளார். பாக்கியம் தண்ணீர் எடுப்பதற்காக வீட்டிற்குள் சென்ற கண்ணிமைக்கும் நேரத்தில், அந்த வாலிபர் நகையுடன் அங்கிருந்து தப்பியோடிவிட்டார்.

​போலீசாரின் தீவிர தேடுதல் வேட்டை
​தான் ஏமாற்றப்பட்டதை உணர்ந்து அதிர்ச்சியடைந்த பாக்கியம், உடனடியாகத் திருநாவலூர் காவல் நிலையத்தில் புகார் அளித்தார். அதன்பேரில், சப்-இன்ஸ்பெக்டர் ராஜ்குமார் தலைமையிலான போலீசார் தனிப்படை அமைத்துத் தீவிரத் தேடுதல் வேட்டையில் ஈடுபட்டனர்.

​போலீசார் திருநாவலூர் சமத்துவபுரம் பகுதியில் தீவிரக் கண்காணிப்பில் ஈடுபட்டிருந்தபோது, அங்கு சந்தேகத்திற்கிடமான வகையில் நின்று கொண்டிருந்த ஒரு வாலிபரையும், ஒரு பெண்ணையும் பிடித்து விசாரித்தனர். விசாரணையில், அவர்கள்தான் வண்டிப்பாளையத்தில் பாக்கியத்திடம் தோஷம் கழிப்பதாகக் கூறி 1 பவுன் நகையைப் பறித்துச் சென்றவர்கள் என்பது அம்பலமானது.

​கைதான மருமகன் – மாமியார்
​போலீசாரின் தொடர் விசாரணையில் கைது செய்யப்பட்டவர்களின் விபரம் தெரியவந்தது. ​செல்வம் (32)  காட்பாடி அருகே உள்ள திருவலம் பகுதியைச் சேர்ந்த முனியன் மகன். ​ராணி (45) திருவள்ளூர் மாவட்டம் தாமரைப்பாக்கம் பகுதியைச் சேர்ந்த ராஜேந்திரன் மனைவி (செல்வத்தின் மாமியார்).

​கைது செய்யப்பட்ட மருமகன் மற்றும் மாமியாரிடமிருந்து 1 பவுன் தங்க நகையை மீட்ட போலீசார், இருவரையும் சிறையில் அடைத்தனர். மேலும், இவர்கள் இதே பாணியில் வேறு எங்காவது மோசடி சம்பவங்களில் ஈடுபட்டுள்ளார்களா? என்ற கோணத்திலும் போலீசார் தீவிர விசாரணை நடத்தி வருகின்றனர். ​மூட்டு வலி சிகிச்சைக்குத் தோஷம் கழிக்க வேண்டும் எனக் கூறி பெண்ணிடம் தங்கம் பறிக்கப்பட்ட இச்சம்பவம் உளுந்தூர்பேட்டை பகுதியில் பெரும் பரபரப்பை ஏற்படுத்தியுள்ளது.

​https://www.apcnewstamil.com/news/crime-news/cocaine-worth-%e2%82%b915-crore-smuggled-ayan-style-kenyan-woman-arrested-with-70-capsules-in-her-stomach/206011