கள்ளக்குறிச்சி மாவட்டம் சங்கராபுரம் அருகே சுடுகாட்டிற்குச் செல்ல முறையான பாதை வசதி இல்லாததால், சடலத்தை எடுத்துச் செல்வதில் இருதரப்புக்கு இடையே மோதல் வெடித்தது. இதனைத் தொடர்ந்து, நில உரிமையாளரைக் காவல்துறையினர் வலுக்கட்டாயமாகக் கைது செய்து, பலத்த போலீஸ் பாதுகாப்புடன் கரும்புத் தோட்டத்தின் வழியே சடலம் எடுத்துச் செல்லப்பட்டு அடக்கம் செய்யப்பட்ட சம்பவம் அப்பகுதியில் பெரும் பரபரப்பை ஏற்படுத்தியுள்ளது.
பாதை இல்லாததால் வந்த வினை
சங்கராபுரம் அருகே உள்ள மேலப்பட்டு கிராமத்தில் வசித்து வரும் பொதுமக்கள், தங்களது பகுதியில் யாராவது இறந்தால் சடலத்தை எடுத்துச் செல்ல முறையான பொதுப் பாதை வசதி இல்லாமல் பல ஆண்டுகளாக அவதிப்பட்டு வந்துள்ளனர். இதனால், அங்குள்ள ஒரு தனிநபரின் பட்டா நிலத்தின் வழியாகவே சடலங்களை எடுத்துச் செல்லும் நிலை இருந்து வந்துள்ளது.
இந்நிலையில், அக்கிராமத்தைச் சேர்ந்த ஒருவர் அண்மையில் உயிரிழந்துள்ளார். அவரது உடலை வழக்கம்போல அந்தத் தனிநபர் பட்டா நிலத்தின் வழியாக எடுத்துச் செல்ல உறவினர்களும் கிராம மக்களும் முயன்றனர்.
கம்பிவேலி அமைத்துத் தடுத்த உரிமையாளர்
தொடர்ந்து தனது பட்டா நிலத்தைப் பாதை போலப் பயன்படுத்துவதற்குக் கடும் எதிர்ப்பு தெரிவித்த நிலத்தின் உரிமையாளர், இம்முறை சடலத்தைக் கொண்டு வரக்கூடாது என்பதற்காகத் தனது நிலத்தைச் சுற்றி முள் கம்பிவேலி அமைத்துத் தடுத்து நிறுத்தினார். இதனால் சடலத்துடன் வந்த பொதுமக்களுக்கும், நில உரிமையாளருக்கும் இடையே கடுமையான வாக்குவாதமும், மோதல் சூழலும் ஏற்பட்டு பெரும் பரபரப்பு நிலவியது.
போலீசார் அதிரடி நடவடிக்கை:
இச்சம்பவம் குறித்துத் தகவலறிந்து சம்பவ இடத்திற்கு விரைந்து வந்த சங்கராபுரம் காவல்துறையினர், இருதரப்பினரிடமும் பேச்சுவார்த்தை நடத்தினர். எனினும், உடன்பாடு எட்டப்படாததால் அசம்பாவிதங்களைத் தவிர்க்கும் பொருட்டு, தடுத்த நிறுத்த முயன்ற நிலத்தின் உரிமையாளரைக் காவல்துறையினர் வலுக்கட்டாயமாகக் கைது செய்து அங்கிருந்து அப்புறப்படுத்தினர்.
கரும்புத் தோட்டம் வழியே சென்ற சடலம்
நில உரிமையாளர் கைது செய்யப்பட்டதைத் தொடர்ந்து, அங்கு அமைக்கப்பட்டிருந்த கம்பிவேலியை அகற்றிய காவல்துறையினர், அந்த நிலத்தில் கரும்பு பயிரிடப்பட்டிருந்த பகுதி வழியாகவே சடலத்தை எடுத்துச் செல்ல அனுமதித்தனர். நூற்றுக்கும் மேற்பட்ட போலீசாரின் பலத்த பாதுகாப்புடன், கரும்புத் தோட்டத்தின் ஊடாகச் சடலம் கொண்டு செல்லப்பட்டு, சுடுகாட்டில் வெற்றிகரமாக அடக்கம் செய்யப்பட்டது.
இந்தச் சம்பவத்தால் மேலப்பட்டு கிராமத்தில் சில மணி நேரம் பெரும் பதற்றமும், பரபரப்பும் நிலவியது. “இனிவரும் காலங்களிலாவது இதுபோன்ற சட்டம்-ஒழுங்குப் பிரச்சினைகள் ஏற்படாமல் இருக்க, மேலப்பட்டு கிராம சுடுகாட்டிற்குச் செல்ல மாவட்ட நிர்வாகம் நிரந்தரமான பொதுப் பாதை வசதியை ஏற்படுத்தித் தர வேண்டும்” என அப்பகுதி மக்கள் கோரிக்கை விடுத்துள்ளனர்.