“தவெக அரசின் ‘கனவு உலக’ முதலமைச்சர் வாய் சவடால் அடிப்பது, ரீல்ஸ் போடுவது போன்ற விளம்பர வேலைகளை விட்டுவிட்டு, தமிழக விவசாயிகளின் வாழ்வாதாரத்தையும் குடிநீர் தேவையையும் பூர்த்தி செய்ய ‘நடந்தாய் வாழி காவிரி’ திட்டத்தை உடனடியாகச் செயல்படுத்த வேண்டும்” என்று அதிமுக பொதுச்செயலாளர் எடப்பாடி பழனிசாமி மிகக் கடுமையான வார்த்தைகளால் சாடியுள்ளார்.
இதுகுறித்து அவர் வெளியிட்டுள்ள காரசாரமான அறிக்கையின் விவரம் பின்வருமாறு,
ரீல்ஸ் விவகாரமும் குதிரை பேர அரசியலும்
தமிழகத்தில் தவெக ஆட்சியில் மக்கள் நலப்பணிகள் முற்றிலும் முடங்கிக்கிடப்பதாகக் குற்றம் சாட்டியுள்ள எடப்பாடி பழனிசாமி, “அரசு நிர்வாகத்தைக் கவனிப்பதை விட, வாய் சவடால் அடிப்பதிலும், சமூக வலைதளங்களில் ரீல்ஸ் விடுவதிலும்தான் தற்போதைய ‘கனவு உலக’ முதலமைச்சர் தீவிரமாக இருக்கிறார். அதுமட்டுமின்றி, எப்படியாவது தங்களது ஆட்சியைத் தக்க வைத்துக் கொள்ள வேண்டும் என்பதற்காகத் திரைமறைவில் குதிரை பேரம் நடத்துவது, தகிடுதத்தம் வேலைகளில் ஈடுபடுவது போன்ற செயல்களில் மட்டுமே இந்த அரசு முழு மூச்சாக இயங்கி வருகிறது” எனச் சாடியுள்ளார்.
விவசாயிகள் நலனைப் புறக்கணிக்கும் அரசு
தமிழகத்தின் வாழ்வாதாரப் பிரச்சினைகளில் தவெக அரசு மெத்தனப் போக்குடன் செயல்படுவதாகக் குறிப்பிட்ட அவர், “விவசாயிகளின் மிக முக்கிய கோரிக்கையான காவிரி நீர் விவகாரத்தில் இந்த அரசுக்கு எவ்வித அக்கறையும் இல்லை. வெற்று விளம்பர அரசியல் செய்வதை விடுத்து, தமிழக மக்களின் குடிநீர் தேவையையும், விவசாயிகளின் பாசனத் தேவையையும் பூர்த்தி செய்யக்கூடிய வரலாற்றுச் சிறப்புமிக்க ‘நடந்தாய் வாழி காவிரி’ திட்டத்தை உடனே கையில் எடுத்துச் செயல்படுத்த வேண்டும்” என்று வலியுறுத்தியுள்ளார்.
‘நடந்தாய் வாழி காவிரி‘ ஏன் முக்கியம்?
காவிரி ஆற்றைப் தூய்மைப்படுத்தி, அதன் நீர் வளத்தைப் பெருக்கி, தமிழகத்தின் டெல்டா மாவட்டங்கள் மட்டுமின்றி ஒட்டுமொத்த குடிநீர் ஆதாரத்தையும் பாதுகாக்கும் நோக்கில் கொண்டு வரப்பட்ட இத்திட்டத்தை, தற்போதைய அரசு கிடப்பில் போட்டுள்ளதாக அதிமுக தரப்பில் குற்றம் சாட்டப்படுகிறது. “இனியாவது தகிடுதத்தம் வேலைகளை நிறுத்திவிட்டு, மக்கள் பணிகளில் கவனம் செலுத்துங்கள்” என முதலமைச்சருக்கு எடப்பாடி பழனிசாமி விடுத்துள்ள இந்த காரசாரமான அறிக்கை, தமிழக அரசியல் வட்டாரத்தில் தற்பொழுது பெரும் பரபரப்பை ஏற்படுத்தியுள்ளது.