கோவை மாநகராட்சிக் கூட்டத்தில் செம்மொழிப் பூங்கா திட்டப் பணிகளில் சுமார் 40 கோடி ரூபாய் அளவிற்கு ஊழல் மற்றும் முறைகேடுகள் நடந்திருப்பதாகக் கூறி, காங்கிரஸ் கவுன்சிலர் எழுப்பிய புகாரால், திமுக – காங்கிரஸ் பெண் கவுன்சிலர்களிடையே கடுமையான வாக்குவாதமும், கைகலப்பும் ஏற்பட்டு மாமன்றமே போர்க்களமாக மாறியுள்ளது.
மாமன்றத்திற்கு வெளியே முழங்கிய போராட்டங்கள்
கோவை மாநகராட்சி பிரதான அலுவலகத்தில் மேயர் ரங்கநாயகி தலைமையில் சாதாரண மாமன்றக் கூட்டம் தொடங்கியது. மாநகராட்சி ஆணையர் கட்டா ரவிதேஜா முன்னிலையில் நடைபெற்ற இக்கூட்டம் தொடங்குவதற்கு முன்பே, பல்வேறு வார்டுப் பிரச்சினைகளை முன்வைத்து அதிமுக, இடதுசாரிகள் மற்றும் காங்கிரஸ் உள்ளிட்ட பல்வேறு கட்சிகளைச் சேர்ந்த கவுன்சிலர்கள் மாநகராட்சி அலுவலகத்திற்கு வெளியே வாசலில் அமர்ந்து தர்ணா மற்றும் போராட்டங்களில் ஈடுபட்டதால் வளாகத்தில் பரபரப்பு நிலவியது.
ரூ. 40 கோடி ஊழல் புகாரை வெடித்த காங்கிரஸ் கவுன்சிலர்
கூட்டம் தொடங்கி விவாதங்கள் நடைபெற்றுக் கொண்டிருந்தபோது, கோவை செம்மொழிப் பூங்கா அமைக்கும் பணிகளில் பெரும் முறைகேடு நடந்துள்ளதாகக் குற்றச்சாட்டு எழுந்தது. காங்கிரஸ் கட்சியைச் சேர்ந்த பெண் கவுன்சிலர் காயத்ரி எழுந்து, செம்மொழிப் பூங்கா பணிகளில் சுமார் 40 கோடி ரூபாய் அளவிற்கு முறைகேடுகள் நடந்திருப்பதாக அண்மையில் ஒப்பந்ததாரர்கள் சங்கம் வெளியிட்ட அறிக்கை மற்றும் ஊடகச் செய்திகளைச் சுட்டிக்காட்டினார். இதுதொடர்பாக மேயர் ரங்கநாயகி மற்றும் மாமன்ற அதிகாரிகள் உரிய விளக்கம் அளிக்க வேண்டும் என்றும், முறைகேட்டில் ஈடுபட்டவர்கள் மீது கடும் நடவடிக்கை எடுக்க வேண்டும் என்றும் அவர் ஆக்ரோஷமாக வலியுறுத்தினார்.
திமுக – காங்கிரஸ் இடையே கைகலப்பு: பெண் கவுன்சிலர் கீழே தள்ளப்பட்டதாகப் பரபரப்பு
காங்கிரஸ் கவுன்சிலரின் இந்த அதிரடி புகாரால் அதிர்ச்சியடைந்த திமுக கவுன்சிலர்கள், காயத்ரிக்கு எதிராகக் கடும் எதிர்ப்பு தெரிவித்துக் கூச்சலிட்டனர். இதனால் மாமன்றத்திற்குள் கடுமையான சலசலப்பும் அமளியும் ஏற்பட்டது. வாக்குவாதம் முற்றிய நிலையில், திமுக பெண் கவுன்சிலர்கள் சிலர் காங்கிரஸ் கவுன்சிலர் காயத்ரியை நோக்கிச் சென்று கடுமையான வாக்குவாதத்தில் ஈடுபட்டனர். அப்போது காயத்ரியின் கையைப் பிடித்து இழுத்து, அவரை கீழே தள்ள முயன்றதாகக் கூறப்படுகிறது. இதனால் இருதரப்பு கவுன்சிலர்களுக்கும் இடையே தள்ளுமுள்ளு ஏற்பட்டு மாமன்றக் கூட்டம் கட்டுப்பாட்டை இழந்தது.
திமுக கவுன்சிலர்களின் முழக்கம்
காங்கிரஸ் கவுன்சிலர் காயத்ரியை உடனடியாக கூட்டத்தில் இருந்து சஸ்பெண்ட் செய்து அவையை விட்டு வெளியேற்ற வேண்டும் என்று திமுகவினர் தொடர்ந்து முழக்கமிட்டனர்.
மேயர் எடுத்த அதிரடி நடவடிக்கை: கூட்டம் ஒத்திவைப்பு!
திமுக – காங்கிரஸ் கூட்டணி கட்சிகளுக்கு இடையே ஏற்பட்ட இந்த மோதலால் மாமன்றத்திற்குள் பதற்றமான சூழல் நிலவியதை அடுத்து, மேயர் ரங்கநாயகி கூட்டத்தை ஒரு மணி நேரத்திற்கு ஒத்திவைப்பதாக அறிவித்துவிட்டு அரங்கிலிருந்து வெளியேறினார். அதே நேரத்தில், மாமன்றத்தில் அமளியை ஏற்படுத்தியதாகக் கூறி காங்கிரஸ் கவுன்சிலர் காயத்ரியை சஸ்பெண்ட் செய்து மேயர் ரங்கநாயகி அதிரடி உத்தரவு பிறப்பித்துள்ளார். திமுக மற்றும் காங்கிரஸ் கட்சிகள் மாநில அளவில் கூட்டணியில் இருந்தாலும், கோவையில் 40 கோடி ரூபாய் ஊழல் புகாரை முன்வைத்து இரு கட்சி கவுன்சிலர்களும் மாமன்றத்திற்குள்ளேயே ஒருவரையொருவர் தாக்க முயன்ற சம்பவம் தமிழக அரசியல் வட்டாரத்தில் பெரும் பரபரப்பையும் அதிர்ச்சியையும் ஏற்படுத்தியுள்ளது.