ஒப்பந்ததாரர் ஒருவரை மிரட்டி ஒரு லட்சத்து 30 ஆயிரம் ரூபாய் பணம் பறித்த புகாரில், தமிழக வெற்றிக் கழகத்தில் (தவெக) இருந்து அதிரடியாக நீக்கப்பட்ட ஊராட்சி மன்றத் தலைவர் வீராசாமி என்பவரை காவல்துறையினர் கைது செய்துள்ளனர்.
கட்சியிலிருந்து அதிரடி நீக்கம்
செங்கல்பட்டு மாவட்டம், திருப்போரூர் சட்டமன்றத் தொகுதிக்கு உட்பட்ட மாம்பாக்கம் ஊராட்சி மன்றத் தலைவராக இருப்பவர் வீரா என்கின்ற வீராசாமி. இவர் தமிழக வெற்றிக் கழகத்தின் (தவெக) செங்கல்பட்டு கிழக்கு மாவட்ட இணைச் செயலாளராகவும் பொறுப்பு வகித்து வந்தார். இந்நிலையில், வீராசாமி ஒப்பந்ததாரர் ஒருவரிடம் லஞ்சம் வாங்கும் வீடியோ காட்சி சமூக வலைத்தளங்களில் வெளியாகி பெரும் பரபரப்பை ஏற்படுத்தியது.
இதனைத் தொடர்ந்து, கட்சியின் ஒழுங்கு நடவடிக்கையாக, வீராசாமியை மாவட்ட இணைச் செயலாளர் உள்ளிட்ட அனைத்துப் பொறுப்புகளிலிருந்தும், கட்சியின் அடிப்படை உறுப்பினரிலிருந்தும் நீக்குவதாக தவெக செங்கல்பட்டு கிழக்கு மாவட்டச் செயலாளர் தீனா என்கின்ற தினகரன் இன்று அதிகாரப்பூர்வ அறிக்கை வெளியிட்டார்.
தாழம்பூர் போலீசில் புகார் & தனிப்படை கைது
கட்சியிலிருந்து நீக்கப்பட்டதைத் தொடர்ந்து, பாதிக்கப்பட்ட ஒப்பந்ததாரரான நவீன் என்பவர் தாழம்பூர் காவல் நிலையத்தில் வீராசாமி மீது புகார் அளித்தார். தனது ஒப்பந்தப் பணிகளுக்காக வீராசாமி தன்னை மிரட்டி ஒரு லட்சத்து 30 ஆயிரம் ரூபாய் பணம் கேட்டதாக அந்தப் புகாரில் அவர் குறிப்பிட்டிருந்தார். இப்புகாரின் அடிப்படையில், தாழம்பூர் காவல் துணை ஆணையர் ரகுபதி அவர்களின் உத்தரவின் பேரில், ஆய்வாளர் பிரவீன் ராஜேஷ் மற்றும் உதவி ஆய்வாளர் சுரேஷ் ஆகியோர் அடங்கிய தனிப்படை அமைக்கப்பட்டது. வழக்குப்பதிவு செய்த தனிப்படை போலீசார், தலைமறைவாக இருந்த வீராசாமியை அதிரடியாகக் கைது செய்தனர்.
நீதிமன்றத்தில் ஆஜர்
கைது செய்யப்பட்ட முன்னாள் தவெக பிரமுகரும், ஊராட்சி மன்றத் தலைவருமான வீராசாமி, காவல்துறையினரால் திருப்போரூர் நீதிமன்றத்தில் ஆஜர்படுத்தப்பட்டு, அடுத்தகட்ட சட்ட நடவடிக்கைக்கு உட்படுத்தப்பட்டுள்ளார். இந்தச் சம்பவம் அப்பகுதியில் பெரும் பரபரப்பை ஏற்படுத்தியுள்ளது.