காவிரி அணைகளில் 60 டி.எம்.சி நீர் இருப்பு: தமிழகத்திற்குக் காவிரி நீரைத் திறக்க அன்புமணி ராமதாஸ் வலியுறுத்தல். ’நாளை நடைபெறும் மேலாண்மை ஆணையக் கூட்டத்தில் அழுத்தம் தருக’: தமிழக அரசுக்கு பாமக தலைவர் கோரிக்கை.
கர்நாடக காவிரி அணைகளில் நீர் இருப்பு 60 டி.எம்.சியாக உயர்ந்துள்ள நிலையிலும், தமிழகத்திற்குத் தண்ணீர் திறக்க மறுக்கும் கர்நாடக அரசைக் கண்டித்துள்ள பாமக தலைவர் மருத்துவர் அன்புமணி ராமதாஸ், நாளை டெல்லியில் நடைபெறும் காவிரி மேலாண்மை ஆணையக் கூட்டத்தில் தமிழக அரசு உரிய நீரைப் பெற உறுதியான நடவடிக்கை எடுக்க வேண்டும் என வலியுறுத்தியுள்ளார்.
கர்நாடக அணைகளில் 60 டி.எம்.சி நீர் இருப்பு
இதுகுறித்து பாமக தலைவர் மருத்துவர் அன்புமணி ராமதாஸ் வெளியிட்டுள்ள அறிக்கையில் தெரிவித்துள்ளதாவது, ”கர்நாடகத்தில் காவிரி மற்றும் அதன் துணை ஆறுகளின் குறுக்கே அமைந்துள்ள கிருஷ்ணராஜசாகர், கபினி, ஹாரங்கி, ஹேமாவதி ஆகிய 4 அணைகளின் மொத்த நீர் இருப்பு இன்று பிற்பகல் நிலவரப்படி 60 டி.எம்.சியாக உயர்ந்துள்ளது. இந்த அணைகளுக்குத் தொடர்ந்து வினாடிக்கு 9,000 கன அடிக்கும் கூடுதலாகத் தண்ணீர் வந்து கொண்டிருக்கிறது.
கடந்த 20 நாட்களில் மட்டும் கர்நாடக அணைகளுக்கு 35 டி.எம்.சி தண்ணீர் வந்துள்ளதுடன், தற்போதும் தினமும் சுமார் 0.8 டி.எம்.சி அளவிற்கு நீர்வரத்து உள்ளது. அணைகளில் 50 சதவீதத்திற்கும் கூடுதலாகத் தண்ணீர் இருந்தும், தமிழகத்திற்குக் காவிரி நீரைத் திறக்க கர்நாடக அரசு தொடர்ச்சியாக மறுத்து வருவது வன்மையான கண்டனத்திற்குரியது மற்றும் மனிதநேயமற்ற செயலாகும்.”
28.63 டி.எம்.சி நீரை பாக்கி வைத்துள்ள கர்நாடகா!
உச்ச நீதிமன்றம் மற்றும் காவிரி நடுவர் மன்றத் தீர்ப்புகளின்படி தமிழகத்திற்கு வழங்க வேண்டிய நீரின் அளவைச் சுட்டிக்காட்டிய அவர், ஜூன் மற்றும் ஜூலை மாதங்களில் ஒட்டுமொத்தமாக 41.15 டி.எம்.சி தண்ணீர் தமிழகத்திற்கு வழங்கப்பட வேண்டும். அதனடிப்படையில், ஜூன் 1 முதல் இன்று வரையிலான காலக்கட்டத்தில் 31.07 டி.எம்.சி நீரை கர்நாடகம் வழங்கியிருக்க வேண்டும். ஆனால், கடந்த 50 நாட்களில் வெறும் 3.44 டி.எம்.சி நீரை மட்டுமே வழங்கிவிட்டு, இன்னும் 28.63 டி.எம்.சி நீரை கர்நாடக அரசு பாக்கி வைத்துள்ளது.
கருகும் குறுவைப் பயிர்கள் – மேட்டூர் நீர்மட்டம் சரிவு
தமிழக காவிரி பாசனப் பகுதிகளின் தற்போதைய அவலநிலையைக் குறிப்பிட்ட அன்புமணி ராமதாஸ், ”மேட்டூர் அணையின் நீர்மட்டம் இன்று காலை நிலவரப்படி 74.7 அடியாக (நீர் இருப்பு 36.87 டி.எம்.சி) குறைந்துவிட்டது. காவிரியில் நீர் திறக்கப்படாததாலும், நிலத்தடி நீர்மட்டம் சரிந்துவிட்டதாலும் டெல்டா மாவட்டங்களில் பயிரிடப்பட்டுள்ள குறுவைப் பயிர்கள் கருகத் தொடங்கிவிட்டன. இதன்பிறகும் கர்நாடக அரசு தண்ணீர் திறக்காததை தமிழக அரசு வேடிக்கை பார்த்துக் கொண்டிருந்தால், அது தமிழக உழவர்களுக்கு இழைக்கப்படும் பெரும் துரோகமாகும்.”
நாளை டெல்லி கூட்டத்தில் நடவடிக்கை தேவை!
டெல்லியில் நாளை (ஜூலை 22) நடைபெறவுள்ள காவிரி மேலாண்மை ஆணையக் கூட்டத்தில், கர்நாடக அணைகளின் தற்போதைய நீர்வரத்து மற்றும் தமிழகத்தில் குறுவைப் பயிர்கள் கருகும் நிலையைத் தமிழக அரசு பிரதிநிதிகள் வலுவாக எடுத்துரைக்க வேண்டும். காவிரி மேலாண்மை ஆணையக் கூட்டத்தைப் பயன்படுத்தி, தமிழகத்திற்குச் சட்டப்பூர்வமாகக் கிடைக்க வேண்டிய பாக்கி நீரைப் பெறுவதற்குத் தமிழக அரசு உடனடியாகத் தீர்க்கமான நடவடிக்கை எடுக்க வேண்டும் என அன்புமணி ராமதாஸ் தனது அறிக்கையில் கோரியுள்ளார்.
மேகதாது அணை விவகாரம்: நாடாளுமன்ற வளாகத்தில் திமுக, தேமுதிக எம்பிக்கள் அதிரடி ஆர்ப்பாட்டம்!