டெல்லி ஜந்தர் மந்தரில் கடந்த 20 நாட்களுக்கும் மேலாக மாணவர்கள் மற்றும் இளைஞர்கள் நடத்தி வரும் தீவிர போராட்டம் குறித்தும், போராட்ட களத்தில் காவல்துறை கட்டவிழ்த்துவிட்ட அடக்குமுறைகள் குறித்தும் டெல்லியிலிருந்து மருத்துவர் காயத்ரி விளக்கம் அளித்துள்ளார்.
ஜூலை 20 சன்சத் மார்ச் மற்றும் காவல்துறையின் நடவடிக்கை
ஜூலை 20 அன்று ஜந்தர் மந்தரிலிருந்து பாராளுமன்றம் நோக்கி ‘சன்சத் மார்ச்’ நடத்த திட்டமிடப்பட்டது. ஆனால் அதனைத் தடுப்பதற்காகக் காவல்துறை பல்வேறு நடவடிக்கைகளை மேற்கொண்டது,
- இணைய சேவை முடக்கம்: போராட்டம் நடைபெற்ற இடத்தைச் சுற்றி 2 முதல் 3 கிலோமீட்டர் சுற்றளவிற்கு இணைய சேவை முழுமையாக முடக்கப்பட்டது. சுற்றியுள்ள மெட்ரோ இரயில் நிலையங்களும் மூடப்பட்டன.
- கெடுபிடிகள் மற்றும் லத்தி சார்ஜ்: பேரணியைத் தடுக்கப் பேரிகேட்டுகளை வெல்டிங் செய்து பாதையை அடைத்தனர் . அதைத்தாண்டிச் செல்ல முயன்ற மாணவர்கள் மீது கண்ணீர்ப்புகைக் குண்டுகள், லத்தி சார்ஜ் மற்றும் பெல்லட் துப்பாக்கிகள் பயன்படுத்தப்பட்டன.
- காலாவதியான கண்ணீர்ப்புகைக் குண்டுகள்: போராட்டத்தில் பயன்படுத்தப்பட்ட கண்ணீர்ப்புகைக் குண்டுகள் பல காலாவதியானவை (Expired Shells). இது வெடித்து விபத்து ஏற்படும் அபாயத்தைக் கொண்டது என காயத்ரி சுட்டிக்காட்டினார்.
- அண்டர்கவர் போலீசார் & பெண்கள் மீதான தாக்குதல்: சாதாரண உடையில் வந்த காவல்துறையினர் மற்றும் சிலர் பெண்களைப் பிடித்து இழுத்துத் துன்புறுத்தியுள்ளனர் .
மருத்துவ வசதிகள் இன்மை மற்றும் தார்மீக ஆதரவு
போராட்டக் களத்தில் காவல்துறையின் சார்பில் ஆம்புலன்ஸ் அல்லது மருத்துவப் பணிக்கான எந்த ஏற்பாடுகளும் செய்யப்படவில்லை. சி.ஜே.பி (CJP) தன்னார்வலர்கள் மற்றும் போராட்டத்தில் பங்கேற்ற மருத்துவர்கள் மட்டுமே காயமடைந்த மாணவர்களுக்கு முதலுதவி மற்றும் மருந்துகளை வழங்கியுள்ளனர்.
ராகுல் காந்தியை எதிர்பார்த்த நிலையில் வந்த ஆ.ராசா எம்பி
போராட்டத்தின் தீவிரத்தைக் கண்டு காங்கிரஸ் தலைவர் ராகுல் காந்தி விரைவாக வந்து ஆதரவு தெரிவிப்பார் என்று எதிர்பார்த்ததாக காயத்ரி தெரிவித்தார். ஆனால், ஆரம்ப கட்டத்திலேயே திமுக எம்பி ஆ.ராசா நேரில் வருகை தந்து மாணவர்களுக்குத் தனது ஆதரவைத் தெரிவித்தார். அவரைத் தொடர்ந்து கனிமொழி எம்பி, பீம் ஆர்மி தலைவர் சந்திரசேகர் ஆசாத் மற்றும் அகிலேஷ் யாதவின் மனைவி ஆகியோர் போராட்டக்களத்தில் மாணவர்களைச் சந்தித்தனர். பின்னர்தான் காங்கிரஸ் தலைவர்களும், மற்ற மாநில முதலமைச்சர்களும் வந்து கலந்துகொண்டனர்.
நீட் தேர்வு குறித்த தேசிய அளவிலான பார்வை
தமிழ்நாட்டில் ‘நீட் தேர்வை முழுமையாக ரத்து செய்ய வேண்டும்’ (Ban NEET) என்ற வலுவான கோரிக்கை இருக்கும் நிலையில், டெல்லி போன்ற வடமாநில போராட்டக்காரர்களின் முதன்மை நோக்கம்,
- நீட் தேர்வில் நடக்கும் வினாத்தாள் கசிவு (Paper Leak) மற்றும் முறைகேடுகளைத் தடுப்பது .
- என்.டி.ஏ (NTA) அமைப்பின் வெளிப்படைத்தன்மை.
- ஒன்றிய கல்வி அமைச்சரின் ராஜினாமா.
ஆகிய கோரிக்கைகளை மையப்படுத்தியே இப்போராட்டம் நடைபெற்று வருவதாக அவர் குறிப்பிட்டார். காவல்துறையின் ஒடுக்குமுறைகள், தடியடிகள் மற்றும் கைது நடவடிக்கைகளுக்கு மத்தியிலும், காயம் அடைந்த மாணவர்கள் மறுநாளே தலை மற்றும் கைகளில் கட்டுடன் மீண்டும் வந்து அமைதியான முறையில் தங்களது போராட்டத்தைத் தொடர்ந்து நடத்தி வருகின்றனர்.