தமிழகம் மற்றும் புதுச்சேரியில் மக்கள் தொகை கணக்கெடுப்பின் முதல் கட்டக் களப்பணிகள் இன்று முதல் அதிகாரப்பூர்வமாகத் தொடங்கியுள்ளன. இப்பணிகளுக்கு பொதுமக்கள் அனைவரும் முழுமையான ஒத்துழைப்பு நல்க வேண்டும் என தமிழ்நாடு மற்றும் புதுச்சேரி மக்கள் தொகை கணக்கெடுப்பு இயக்குனர் சுந்தரேஷ்பாபு கேட்டுக்கொண்டுள்ளார்.
சென்னை போயஸ் கார்டன் பகுதியில் நடைபெற்று வரும் மக்கள் தொகை கணக்கெடுப்புப் பணிகளை அவர் நேரில் பார்வையிட்டு ஆய்வு செய்தார். அதனைத் தொடர்ந்து செய்தியாளர்களைச் சந்தித்துப் பேசிய அவர் கூறியதாவது:
ஆகஸ்ட் 30 வரை கணக்கெடுப்புப் பணிகள்:
மாநிலம் முழுவதும் இன்று (ஆகஸ்ட் 1) தொடங்கி வரும் ஆகஸ்ட் 30-ஆம் தேதி வரை முதல் கட்டக் கணக்கெடுப்பு நடைபெற உள்ளது. இக்காலக்கட்டத்தில், மாநிலம் முழுவதும் உள்ள அனைத்து வீடுகளுக்கும் கணக்கெடுப்பாளர்கள் நேரில் சென்று உரிய தகவல்களைச் சேகரிக்க உள்ளனர்.
முதல் கட்டத்தில் கேட்கப்படும் 33 கேள்விகள்:
முதல் கட்ட மக்கள் தொகை கணக்கெடுப்பின்போது, வீடு மற்றும் வீட்டு வசதிகள் தொடர்பான மொத்தம் 33 கேள்விகள் எழுப்பப்படும். இதில் வீட்டின் வகை, குடிநீர் மற்றும் கழிப்பறை வசதிகள், சமையலுக்குப் பயன்படுத்தப்படும் எரிபொருள், வீட்டின் அறைகளின் எண்ணிக்கை, மின்சார வசதி, மொபைல் போன், லேப்டாப் மற்றும் இணைய வசதி உள்ளிட்ட பல்வேறு அடிப்படை விவரங்கள் துல்லியமாகப் பதிவு செய்யப்படவுள்ளன.
டிஜிட்டல் முறை மற்றும் தரவு பாதுகாப்பு:
இம்முறை மக்கள் தொகை கணக்கெடுப்புப் பணிகள் முழுமையாக டிஜிட்டல் முறையில் மேற்கொள்ளப்படுகின்றன.
முந்தைய கணக்கெடுப்புகளைப் போல காகிதப் படிவங்கள் பயன்படுத்தப்படாமல், கணக்கெடுப்பாளர்கள் தங்களது பிரத்யேக மொபைல் செயலியை (Mobile App) பயன்படுத்தித் தகவல்களைப் பதிவு செய்கின்றனர்.
இந்தத் தரவுகள் அனைத்தும் பாதுகாப்பாக நேரடியாக மத்திய தரவுத்தளத்தில் சேமிக்கப்படுகின்றன.
வீடுகள் மட்டுமின்றி பள்ளிகள், கல்லூரிகள், மருத்துவமனைகள், விடுதிகள் மற்றும் பிற கட்டிடங்களும் கணக்கெடுக்கப்படும். இருப்பினும், 33 கேள்விகள் கொண்ட கணக்கெடுப்பு வீடுகளுக்கு மட்டுமே பொருந்தும்.
திட்டமிடலுக்கு உதவும் புள்ளிவிவரங்கள்:
இந்தத் தகவல்கள் வெறும் புள்ளிவிவரங்களுக்காக மட்டும் சேகரிக்கப்படவில்லை. எதிர்கால அரசுத் திட்டங்கள், அடிப்படை கட்டமைப்பு வசதிகள், குடிநீர், சுகாதாரம், தொலைத்தொடர்பு மற்றும் எரிவாயு விநியோகம் உள்ளிட்ட பல்வேறு துறைகளில் கொள்கைகளை உருவாக்கவும், புதிய நலத்திட்டங்களை வெற்றிகரமாகத் திட்டமிடவும் இந்தத் தரவுகள் மிக முக்கிய ஆதாரமாக விளங்கும் என்று அதிகாரிகள் தெரிவிக்கின்றனர்.
பெருமளவில் களப்பணியாளர்கள் நியமனம்:
தமிழகம் முழுவதும் இப்பணிகளைச் சிறப்பாக மேற்கொள்ள 1 லட்சத்து 15 ஆயிரம் கணக்கெடுப்பாளர்கள், 19 ஆயிரம் மேற்பார்வையாளர்கள் மற்றும் 1,260 சார்ஜ் சென்சஸ் அதிகாரிகள் பணியில் அமர்த்தப்பட்டுள்ளனர். இப்பணிகள் அனைத்தும் அந்தந்த மாவட்ட ஆட்சியர்கள் மற்றும் மாநகராட்சி ஆணையர்களின் நேரடி மேற்பார்வையின் கீழ் தீவிரமாக நடைபெற்று வருகின்றன.
இரண்டாம் கட்டம் அடுத்த ஆண்டு பிப்ரவரியில்:
மக்கள் தொகை கணக்கெடுப்பின் இரண்டாம் கட்டப் பணிகள் அடுத்த ஆண்டு பிப்ரவரி மாதம் நடைபெற உள்ளது. அப்போது குடும்ப உறுப்பினர்களின் வயது, கல்வித் தகுதி, தொழில் மற்றும் சமூக-பொருளாதார விவரங்கள் சேகரிக்கப்படும்.
எனவே, வீடுகளுக்குத் தேடி வரும் கணக்கெடுப்பாளர்களிடம் பொதுமக்கள் உரிய விவரங்களை வழங்கி, நாட்டின் முக்கியப் பணியான மக்கள் தொகை கணக்கெடுப்பு வெற்றிகரமாக அமைய முழு ஒத்துழைப்பு வழங்குமாறு மாநில நிர்வாகத்தின் சார்பில் மீண்டும் அன்புடன் கேட்டுக்கொள்ளப்படுகிறார்கள்.