ஆவடி அடுத்த திருமுல்லைவாயிலில் அமைந்துள்ள வரலாற்றுச் சிறப்புமிக்க அரபாத் ஏரியை புனரமைக்கும் பணிகள் தீவிரமாக நடைபெற்று வந்தாலும், ஏரியின் பிரதான நோக்கமான நீர்வளப் பாதுகாப்புப் புறக்கணிக்கப்பட்டுள்ளதாகப் பொதுமக்கள் மற்றும் ஏரி பாதுகாப்பு அமைப்பினர் கடும் குற்றச்சாட்டுகளை முன்வைத்துள்ளனர்.
குறிப்பாக, மழைநீர் வடிகால் மற்றும் மதகுகளில் (Shutters) ஷெட்டர்கள் அமைக்கப்படாததால், வரும் பருவமழை காலத்தில் லட்சக்கணக்கான லிட்டர் மழைநீர் வீணாகும் அபாயம் ஏற்பட்டுள்ளது.
ஏரியின் வரலாற்றுப் பின்னணியும் தற்போதைய நிலையும்:
சி.டி.எச். சாலை மற்றும் சோழம்பேடு பிரதான சாலையை ஒட்டி அமைந்துள்ள இந்த அரபாத் ஏரி, கடந்த காலத்தில் இப்பகுதியின் மிக முக்கியக் குடிநீர் ஆதாரமாகவும், விவசாயத் தேவைகளைப் பூர்த்தி செய்யும் அட்சயபாத்திரமாகவும் திகழ்ந்தது. காலப்போக்கில் போதிய பராமரிப்பின்மை, ஆக்கிரமிப்புகள் மற்றும் கழிவுநீர் கலப்பு காரணமாக சுமார் 60 ஏக்கர் பரப்பளவு கொண்ட இந்த ஏரி, தற்போது சுருங்கி 26.40 ஏக்கராக மாறிவிட்டது. இதனை மீட்கக் கோரி பொதுமக்கள் விடுத்த நீண்ட கால கோரிக்கையை ஏற்று, ஆவடி மாநகராட்சி சார்பில் ஆரம்பத்தில் 10 கோடி ரூபாய் மதிப்பீட்டில் ஏரியை புனரமைத்து பசுமை பூங்காவாக மாற்றத் திட்டமிடப்பட்டது.
தற்போது 7 கோடி ரூபாய் மதிப்பீட்டில் இப்பணிகள் நடந்து வருகின்றன. திட்டத்தின்படி ஏரியில் 3 கி.மீ தொலைவிற்கு நடைபாதை, விளையாட்டு உபகரணங்கள், உடற்பயிற்சிக் கூடம், உணவு அரங்கம், நூலகம் மற்றும் யோகா மையம் போன்ற உட்கட்டமைப்பு வசதிகள் அமைக்கப்பட உள்ளன.
அழகுபடுத்துவதில் ஆர்வம்; நீர்வளப் பாதுகாப்பில் அலட்சியம்:
பூங்கா அமைக்கும் பணிகள் ஒருபுறம் வரவேற்பைப் பெற்றாலும், மறுபுறம் ஏரியின் ஆழம் மற்றும் நீர் சேமிப்புத் திறன் முற்றிலுமாகக் கிடப்பில் போடப்பட்டுள்ளதாகப் புகார்கள் எழுந்துள்ளன. இதுகுறித்து ஏரி பாதுகாப்பு அமைப்பின் தலைவர் சுந்தரமூர்த்தி கூறுகையில், “ஆக்கிரமிப்புகளை முழுமையாக அகற்றாமல் பணிகள் நடப்பதோடு, சாலை விரிவாக்கம் மற்றும் மெட்ரோ பணிகளுக்காக ஏரியின் கரையானது 100 மீட்டர் வரை மாற்றப்பட்டுள்ளது. மேலும், ஏரியிலிருந்து அகற்றப்படும் வண்டல் மண் மற்றும் ஆகாயத்தாமரைகளை ஏரிக்குளேயே கொட்டுவதால், ஏரியின் ஆழம் அதிகரிக்காமல் மேடாகி வருகிறது” என்றார்.
ஷெட்டர் இல்லாததால் வீணாகும் மழைநீர்:
தற்போது பருவமழைக்காலம் நெருங்கி வரும் சூழலில், ஏரியில் உபரி நீர் சீராக வெளியேறவும், நீரைத் தேக்கிவைக்கவும் முன்பு இருந்த ஷெட்டர்கள் (Shutters) புனரமைப்புப் பணிகளின் பெயரில் அகற்றப்பட்டுள்ளன. ஆனால், இதுவரை புதிய ஷெட்டர்கள் பொருத்தப்படவில்லை. இதனால் மழைக்காலங்களில் ஏரியில் தண்ணீர் நிரம்பினாலும் அது சேகரிக்கப்படாமல் வீணாகிவிடும் அபாயம் ஏற்பட்டுள்ளது.
பொதுமக்களின் எச்சரிக்கை:
“அகற்றப்பட்ட ஷெட்டர்களை உடனடியாகப் பொருத்த வேண்டும்; ஏரியை முழுமையாக ஆழப்படுத்தி நீர்மட்டக் கொள்ளளவை அதிகரிக்க வேண்டும். ஏரியில் இருந்து அகற்றப்படும் மண் மற்றும் குப்பைகளைக் கரைகளுக்கு வெளியே கொட்ட வேண்டுமே தவிர, ஏரிக்குள் கொட்டக் கூடாது. இந்த நிலை தொடர்ந்தால், வரும் கோடைகாலத்தில் இப்பகுதியில் கடுமையான நிலத்தடி நீர் தட்டுப்பாடு ஏற்பட்டு மக்கள் குடிநீருக்காகத் திண்டாட நேரிடும்.”
புனரமைப்பு என்ற பெயரில் அழகுபடுத்தும் பணிகளுக்குக் கொடுக்கப்படும் முக்கியத்துவம், நீர்வளப் பாதுகாப்பிற்கும் ஏரியின் ஆழத்தை அதிகரிப்பதற்கும் வழங்கப்படவில்லை என்பதே இப்பகுதி மக்களின் தற்போதைய ஆதங்கமாகும். எனவே, ஆவடி மாநகராட்சி நிர்வாகம் உடனடியாகத் தலையிட்டு, அரபாத் ஏரியின் பாதுகாப்புப் பணிகளைச் சீரமைத்து, மழைநீரை முழுமையாகச் சேமிக்கத் தேவையான துரித நடவடிக்கைகளை எடுக்க வேண்டும் என்பதே அனைவரின் எதிர்பார்ப்பாகும்.