பெண் செய்தி வாசிப்பாளருக்குப் பாலியல் தொல்லை அளித்ததாகப் பதிவு செய்யப்பட்ட வழக்கில், பிரபல தொழிலதிபரும் பங்குச்சந்தை நிபுணருமான பி.ஆர். சுந்தர் மற்றும் அவரது மனைவியை நீதிமன்றக் காவலில் வைக்கச் சென்னை சைதாப்பேட்டை நீதிமன்றம் மறுப்பு தெரிவித்து, இருவரையும் உடனடியாக விடுவிக்க உத்தரவிட்டுள்ளது. பெங்களூரில் கைது & இரவில் ஆஜர்
முன்னதாக, வழக்கின் அடிப்படையில் பெங்களூரில் வைத்து கைது செய்யப்பட்ட பி.ஆர். சுந்தர் மற்றும் அவரது மனைவி இருவரும், நேற்று இரவு சென்னைக்குக் கொண்டு வரப்பட்டு சைதாப்பேட்டை 18-வது மாஜிஸ்திரேட் நீதிமன்றத்தில் ஆஜர்படுத்தப்பட்டனர். அப்போது காவல்துறை தரப்பில் இருவரையும் நீதிமன்றக் காவலில் சிறையில் அடைக்க மனு தாக்கல் செய்யப்பட்டது.
நடைமுறை மீறல்: வழக்கறிஞரின் காரசார வாதம், பி.ஆர். சுந்தர் தரப்பில் ஆஜரான மூத்த வழக்கறிஞர் ஏ. சரவணன் நீதிமன்றத்தில் கடுமையான வாதங்களை முன்வைத்தார்.
கைது நடைமுறை மீறல்: காவல்துறையினர் இந்த கைதை மேற்கொண்ட விதத்தில் சட்டப்பூர்வமான கைதுக்கான நடைமுறைகள் முற்றிலும் மீறப்பட்டுள்ளன. இந்த நடவடிக்கை முழுக்க முழுக்க அரசியல் காழ்ப்புணர்ச்சியோடு எடுக்கப்பட்ட ஒன்றாகும். பி.ஆர். சுந்தரின் மனைவி மீது சுமத்தப்பட்டுள்ள குற்றச்சாட்டுகளுக்கு எவ்வித அடிப்படை முகாந்திரமும் இல்லை. எனவே, இருவரையும் நீதிமன்றக் காவலில் வைக்கக் கூடாது என்று அவர் வலுவாக வாதிட்டார். மாஜிஸ்திரேட் உத்தரவு, இருவரும் உடனடியாக விடுதலை
இருதரப்பு வாதங்களையும் கேட்ட 18-வது மாஜிஸ்திரேட் செந்தில், கைது நடைமுறைகளில் உள்ள குறைபாடுகள் மற்றும் முகாந்திரமின்மையைக் கருத்தில் கொண்டு, பி.ஆர். சுந்தர் மற்றும் அவரது மனைவியை நீதிமன்றக் காவலில் சிறையில் அடைக்க முடியாது எனத் திட்டவட்டமாக மறுத்துவிட்டார்.
மேலும், இருவரையும் உடனடியாக விடுவிக்க உத்தரவிட்டதைத் தொடர்ந்து, அவர்கள் இருவரும் நேற்றிரவே தங்களது இல்லத்திற்குத் திரும்பினர். இச்சம்பவம் அரசியல் மற்றும் பங்குச்சந்தை வட்டாரங்களில் பெரும் பரபரப்பை ஏற்படுத்தியுள்ளது.