உலகப் புகழ்பெற்ற மதுரை மீனாட்சி சுந்தரேஸ்வரர் திருக்கோயில் குடமுழுக்கு நன்னீராட்டு விழாவில், வேள்விச்சாலை, கருவறை மற்றும் கோபுரங்களில் தமிழில் திருமுறை பாட ஓதுவார்களுக்கு அனுமதி மறுக்கப்பட்டதாகக் கூறி, சென்னை நுங்கம்பாக்கத்தில் உள்ள இந்து சமய அறநிலையத்துறை ஆணையர் அலுவலகத்தில் தமிழ் ஓதுவார்கள் அமைப்பினர் திடீர் உள்ளிருப்புப் போராட்டத்தில் ஈடுபட்டதால் பெரும் பரபரப்பு ஏற்பட்டது.
தமிழுக்கு முன்னுரிமை இல்லை என குற்றச்சாட்டு
மதுரை மீனாட்சி அம்மன் திருக்கோயில் கும்பாபிஷேகத்திற்கான ஏற்பாடுகள் தீவிரமாக நடைபெற்று வருகின்றன. இந்நிலையில், குடமுழுக்கின் போது வேள்விச்சாலை, கருவறை மற்றும் கோபுரப் பகுதிகளில் தமிழ் ஓதுவார்கள் தேவாரம், திருவாசகம் உள்ளிட்ட திருமுறைகளைப் பாடுவதற்குக் கட்டுப்பாடுகள் விதிக்கப்பட்டுள்ளதாகவும், போதிய அனுமதி வழங்கப்படவில்லை என்றும் தமிழ் ஓதுவார்கள் அமைப்பினர் குற்றம்சாட்டியுள்ளனர்.
‘தமிழ்நாட்டில் உள்ள முதன்மைத் திருக்கோயில்களில் ஒன்றான மதுரை மீனாட்சியம்மன் கோயிலில், அன்னை தமிழுக்கும் திருமுறைகளுக்கும் உரிய முக்கியத்துவமும் முன்னுரிமையும் அளிக்கப்பட வேண்டும்’ என்பது அவர்களின் முதன்மையான கோரிக்கையாக உள்ளது.
அறநிலையத்துறை அலுவலகத்தில் குவிந்த ஓதுவார்கள்
இந்த அனுமதி மறுப்பைக் கண்டித்தும், குடமுழுக்கு நிகழ்வுகளின் அனைத்துப் பகுதிகளிலும் தமிழ் ஓதுவார்கள் தடங்கலின்றி திருமுறை விண்ணப்பம் செய்ய உடனடியாக அனுமதி வழங்கக் கோரியும், தமிழ் ஓதுவார்கள் அமைப்பைச் சேர்ந்த ஏராளமானோர் நுங்கம்பாக்கத்தில் உள்ள இந்து சமய அறநிலையத்துறை தலைமை ஆணையர் அலுவலகத்தில் திரண்டனர்.
அலுவலக வளாகத்திற்குள் அமர்ந்து, கோரிக்கைகளை வலியுறுத்தி முழக்கங்களை எழுப்பியவாறு அவர்கள் உள்ளிருப்புப் போராட்டத்தில் ஈடுபட்டனர். போராட்டத்தின் போது பன்னிரு திருமுறைகளைப் பாடி தங்கள் எதிர்ப்பை வெளிப்படுத்தினர்.
போலீசார் குவிப்பு & அதிகாரிகளுடன் பேச்சுவார்த்தை
ஓதுவார்களின் திடீர் போராட்டத்தால் அறநிலையத்துறை அலுவலக வளாகத்தில் கூடுதல் போலீசார் பாதுகாப்புப் பணியில் ஈடுபடுத்தப்பட்டனர். போராட்டத்தை அடுத்து, இந்து சமய அறநிலையத்துறை உயர் அதிகாரிகள் சம்பவ இடத்திற்கு வந்து போராட்டத்தில் ஈடுபட்ட ஓதுவார்கள் அமைப்பின் பிரதிநிதிகளுடன் அவசரப் பேச்சுவார்த்தை நடத்தினர்.
தமிழில் குடமுழுக்கு நடத்தப்பட வேண்டும் என்றும், அனைத்து நிலைகளிலும் ஓதுவார்கள் திருமுறை பாட உறுதியான அரசாணை மற்றும் வழிகாட்டுதல்களை உடனடியாக வெளியிடுமாறு அமைப்பினர் வலியுறுத்தினர். இந்தச் சம்பவம் ஆன்மீக மற்றும் தமிழ் ஆர்வலர்களிடையே பெரும் விவாதத்தைக் கிளப்பியுள்ளது.