நடிகர் சூர்யா – ஜோதிகா தம்பதி தங்களது 20-வது திருமண நாளை முன்னிட்டு ஸ்காட்லாந்தில் மீண்டும் திருமண உறுதிமொழி எடுத்துக்கொண்டனர். இந்த சிறப்பு நிகழ்வுக்காக ஸ்காட்லாந்தை தேர்வு செய்ததற்கான காரணத்தையும் சூர்யா தற்போது தெரிவித்துள்ளார்.
20 ஆண்டுகளை நிறைவு செய்த சூர்யா – ஜோதிகா
சூர்யா மற்றும் ஜோதிகா கடந்த 2006-ம் ஆண்டு செப்டம்பர் 11-ம் தேதி திருமணம் செய்து கொண்டனர். 20 ஆண்டுகள் நிறைவடைந்ததை முன்னிட்டு, குடும்பத்தினர் மற்றும் நெருங்கிய நண்பர்கள் முன்னிலையில் ஸ்காட்லாந்தில் உள்ள தேவாலயத்தில் இருவரும் மீண்டும் திருமண உறுதிமொழி எடுத்துக்கொண்டனர்.
இந்த நிகழ்வில் அவர்களது குழந்தைகள் தியா மற்றும் தேவ் முக்கிய பங்கு வகித்தனர். தொடர்ந்து குடும்பத்தினர் மற்றும் நண்பர்களுடன் இணைந்து படகு பயணத்திலும் அவர்கள் கொண்டாட்டத்தை தொடர்ந்தனர்.
‘தி சீக்குவல்’ என பெயரிட்ட கொண்டாட்டம்
சூர்யா – ஜோதிகா தம்பதி தங்களது 20 ஆண்டுகால திருமண வாழ்க்கை கொண்டாட்டத்தை ‘தி சீக்குவல்’ என குறிப்பிட்டுள்ளனர். ஜோதிகா வெளியிட்ட பதிவில், இந்த நிகழ்வு திருமண வாழ்க்கையை மட்டும் கொண்டாடுவதற்கானது அல்ல என்றும், தங்களுக்குள் ஏற்பட்ட புரிந்துணர்வு, விட்டுக்கொடுத்தல், தியாகம் மற்றும் அன்பையும் கொண்டாடுவதாக குறிப்பிட்டிருந்தார்.
ஸ்காட்லாந்தை தேர்வு செய்தது ஏன்?
திருமண நாள் கொண்டாட்டத்திற்காக ஸ்காட்லாந்தை தேர்வு செய்ததற்கான காரணத்தை சூர்யா தனது பதிவில் விளக்கியுள்ளார்.
ஸ்காட்லாந்தின் பனிமூட்டம் சூழ்ந்த மலைப்பகுதிகளும் அழகிய ஏரிகளும் தங்களது காதல் கதையை பிரதிபலிப்பதாக உணர்ந்ததால் அந்த இடத்தை தேர்வு செய்ததாக அவர் தெரிவித்துள்ளார்.
மேலும், ஸ்காட்லாந்தில் சந்தித்த மக்களின் அன்பும், பரந்த மனப்பான்மையும் தங்களது பயணத்தை மேலும் சிறப்பானதாக மாற்றியதாக சூர்யா தெரிவித்துள்ளார். நினைவுகளுடன் மட்டுமல்லாமல், அங்குள்ள மக்களின் அன்பையும் மனதில் சுமந்து கொண்டு வீடு திரும்பியதாகவும் அவர் குறிப்பிட்டுள்ளார்.
குடும்பத்துடன் நெகிழ்ச்சியான தருணங்கள்
தேவாலயத்தில் நடைபெற்ற உறுதிமொழி நிகழ்ச்சியில் சூர்யா வெள்ளை நிற டக்ஸீடோவும், ஜோதிகா வெள்ளை நிற திருமண ஆடையும் அணிந்திருந்தனர். அவர்களது குழந்தைகள் தியா மற்றும் தேவ் பெற்றோருடன் நிகழ்ச்சியில் பங்கேற்றனர். சூர்யாவின் சகோதரர் கார்த்தியும் அவரது மனைவி ரஞ்சனியும் உள்ளிட்ட குடும்பத்தினர் இந்த நிகழ்வில் கலந்து கொண்டனர்.
இந்த சிறப்பு தருணங்களின் புகைப்படங்கள் மற்றும் வீடியோக்களை சூர்யா – ஜோதிகா சமூக வலைதளங்களில் பகிர்ந்த நிலையில், அவை ரசிகர்கள் மத்தியில் கவனம் பெற்றுள்ளன.
“ஊர் வாயை அடைக்க முடியாது.. யார் என்ன சொன்னாலும் கேட்காதீர்கள்!” – அட்லீ சொன்ன முக்கிய அட்வைஸ்