ஆந்திர மாநிலத்தில் பள்ளி வகுப்பறைக்குள் புகுந்து மின்சார ரம்பத்தால் 10-ம் வகுப்பு மாணவியை கொடூரமாகத் தாக்கிய வழக்கில் கைது செய்யப்பட்ட இளைஞரின் வலது கால் அறுவை சிகிச்சை மூலம் அகற்றப்பட்டுள்ளது.
ஆந்திர மாநிலம் அனந்தபூர் மாவட்டம் ராப்தாடு பகுதியில் உள்ள அரசு உயர்நிலைப் பள்ளியில் கடந்த அக்டோபர் 31-ம் தேதி இந்த அதிர்ச்சிகரமான சம்பவம் நடைபெற்றது.
வகுப்பறைக்குள் புகுந்து தாக்குதல்
பள்ளியில் 10-ம் வகுப்பு மாணவ, மாணவிகள் பாடம் கவனித்துக் கொண்டிருந்தபோது, மின்சார மரம் அறுக்கும் ரம்பத்துடன் வகுப்பறைக்குள் நுழைந்த ஹேமந்த் (21) என்ற இளைஞர், அங்கிருந்த மாணவி ஒருவரை சரமாரியாகத் தாக்கினார்.
இதனைத் தடுக்க முயன்ற மற்றொரு மாணவியையும் அவர் தாக்கியதில் இருவரும் படுகாயமடைந்தனர். பின்னர் அங்கிருந்து தப்பிச் சென்ற ஹேமந்தை போலீசார் தேடி வந்தனர்.
விசாரணையில், படுகாயமடைந்த மாணவி ஹேமந்தின் உறவினர் என்பதும், அவர் அந்த மாணவியை ஒருதலையாகக் காதலித்து வந்ததாகவும் தெரியவந்தது.
போலீசார் துப்பாக்கிச்சூடு
தாக்குதலுக்குப் பிறகு ஆத்மக்கூர் வனப்பகுதிக்குத் தப்பிச் சென்ற ஹேமந்தை போலீசார் கண்டுபிடித்தனர். அப்போது அவர் காவல் ஆய்வாளர் வெங்கடேஸ்வரலுவை கத்தியால் தாக்க முயன்றதாகக் கூறப்படுகிறது.
இதையடுத்து தற்காப்புக்காக போலீசார் துப்பாக்கிச்சூடு நடத்தியதில் ஹேமந்தின் இரு கால்களிலும் பலத்த காயம் ஏற்பட்டது. பின்னர் அவர் அனந்தபூர் அரசு பொது மருத்துவமனையில் சிகிச்சைக்காக அனுமதிக்கப்பட்டார்.
வலது கால் அகற்றம்
துப்பாக்கிக் குண்டு காயங்களால் ஹேமந்தின் வலது காலுக்குச் செல்லும் ரத்த ஓட்டம் கடுமையாகப் பாதிக்கப்பட்டது. இதனால் காலில் உள்ள திசுக்கள் அழுகத் தொடங்கியதாக மருத்துவர்கள் தெரிவித்தனர்.
தொற்று உடலின் மற்ற பகுதிகளுக்குப் பரவுவதைத் தடுக்கும் வகையில், மருத்துவர்கள் அவசர அறுவை சிகிச்சை மேற்கொண்டு அவரது வலது காலை முழங்காலுக்கு மேலே அகற்றினர்.
அவரது இடது காலிலும் ஏற்பட்ட காயங்களுக்கு அறுவை சிகிச்சை செய்து சிகிச்சை அளிக்கப்பட்டு வருகிறது. தற்போது அவர் பலத்த போலீஸ் பாதுகாப்புடன் மருத்துவமனையில் சிகிச்சை பெற்று வருகிறார்.
பள்ளி வகுப்பறைக்குள் புகுந்து மாணவிகள் மீது நடத்தப்பட்ட இந்தக் கொடூரத் தாக்குதல் ஆந்திர மாநிலத்தில் பெரும் அதிர்ச்சியை ஏற்படுத்தியுள்ளது.