திருமலைக்கு வரும் பக்தர்களுக்கு ஆன்மீக அனுபவத்துடன் வரலாறு, கலை, அறிவியல் மற்றும் நவீன தொழில்நுட்பத்தையும் ஒருங்கே அறிந்துகொள்ளும் வகையில், புதுப்பிக்கப்பட்ட ஸ்ரீ வெங்கடேஸ்வரா (எஸ்.வி.) அருங்காட்சியகம் இன்று (நவம்பர் 16) முதல் பொதுமக்களின் பார்வைக்கு திறக்கப்பட்டுள்ளது.

ஆந்திரப் பிரதேச முதல்வர் சந்திரபாபு நாயுடு கடந்த செப்டம்பர் 16-ஆம் தேதி இந்த அருங்காட்சியகத்தைத் திறந்து வைத்தார். தற்போது சோதனை ஓட்டம் நிறைவடைந்ததைத் தொடர்ந்து, பக்தர்கள் பார்வையிட அனுமதி வழங்கப்பட்டுள்ளது.
ஒரு லட்சம் சதுர அடி பரப்பளவில் 14 காட்சியரங்குகள்!
திருமலையில் சுமார் ஒரு லட்சம் சதுர அடி பரப்பளவில் நான்கு தளங்களாக இந்த அருங்காட்சியகம் அமைக்கப்பட்டுள்ளது. டாடா கன்சல்டன்சி சர்வீசஸ் (TCS) நிறுவனத்தின் தொழில்நுட்ப உதவியுடன் நவீனமயமாக்கப்பட்டுள்ள இதில், 14 சிறப்பு காட்சியரங்குகள் இடம்பெற்றுள்ளன.
8,000-க்கும் மேற்பட்ட பழங்காலப் பொருட்கள், வரலாற்றுச் சின்னங்கள், அரிய சிற்பங்கள் மற்றும் கலைப்பொருட்கள் இங்கு காட்சிப்படுத்தப்பட்டுள்ளன.
ஸ்ரீ வெங்கடேஸ்வரரின் திருவுருவம், திருமலை கோயிலின் வரலாறு, இந்திய சிற்பக்கலை, கோயில் கட்டடக்கலை, பழங்கால ஆயுதங்கள், இசை, நடனம் மற்றும் வழிபாட்டு மரபுகள் உள்ளிட்ட பல்வேறு அம்சங்களைப் பக்தர்கள் இங்கு அறிந்துகொள்ளலாம்.
பிரம்மாண்டம் அரங்கம் – நவீன தொழில்நுட்ப அனுபவம்!
இந்த அருங்காட்சியகத்தின் முக்கிய ஈர்ப்பாக ‘பிரம்மாண்டம்’ என்ற காட்சியரங்கம் அமைந்துள்ளது. ஹாலோகிராபிக் காட்சிகள், 360 டிகிரி ஒலி அமைப்பு மற்றும் டிஜிட்டல் காட்சித் தொழில்நுட்பங்கள் மூலம் பிரபஞ்சம், படைப்பின் ரகசியங்கள் மற்றும் அண்டத்தின் விரிவாக்கம் போன்றவற்றை பார்வையாளர்கள் காட்சிகளின் வாயிலாக அனுபவிக்கலாம்.
மேலும், கல் சிற்பங்கள், வெண்கலச் சிலைகள், பாரம்பரிய இசைக்கருவிகள் மற்றும் அன்னமாச்சார்யரின் பக்திப் பாடல் மரபு தொடர்பான காட்சிகளும் இடம்பெற்றுள்ளன.
நுழைவுக் கட்டணம் மற்றும் பார்வை நேரம்
இந்த அருங்காட்சியகத்தைப் பார்வையிட ஒருவருக்கு ரூ.50 நுழைவுக் கட்டணமாக நிர்ணயிக்கப்பட்டுள்ளது. தினமும் காலை 10 மணி முதல் மாலை 5 மணி வரை பக்தர்கள் பார்வையிடலாம். நுழைவுச் சீட்டுகள் மாலை 4 மணி வரை மட்டுமே வழங்கப்படும் என திருமலை திருப்பதி தேவஸ்தானம் அறிவித்துள்ளது.
திருமலைக்கு வரும் பக்தர்கள் ஏழுமலையானை தரிசிப்பதுடன், திருக்கோயிலின் வரலாறு, பாரம்பரியம் மற்றும் கலைச் செல்வங்களை நவீன தொழில்நுட்பத்தின் உதவியுடன் அறிந்துகொள்ள இந்த அருங்காட்சியகம் புதிய வாய்ப்பை வழங்குகிறது.
