ஏலச்சீட்டு நடத்தி 4 கோடி மோசடி செய்த தம்பதி தலைமறைவு – பாதிக்கப்பட்ட மக்கள் ஆவடி காவல் ஆணையர் அலுவலகத்தில் புகார்
திருவள்ளூர் அருகே வேப்பம்பட்டில் கணவன், மனைவி இருவர் சுமார் 4 கோடி ரூபாய்க்கு மேல் சீட்டு பணம் மோசடி செய்ததாக ஆவடி காவல் ஆணையர் அலுவலகத்தில் பாதிக்கப்பட்ட மக்கள் புகார் அளித்துள்ளனர்.
திருவள்ளூர் மாவட்டம் வேப்பம்பட்டு, பெருமாள்பட்டு பகுதியைச் சேர்ந்தவர்கள் மஞ்சுளா- பிரேம் ஆனந்த். இவர்கள் இருவரும் கணவன் மனைவி. இவர்கள் ஏலச்சீட்டு, தீபாவளி பண்டு சீட்டு, மளிகை பொருட்கள் சீட்டு, நகை பண்டுசீட்டு என்று கடந்த 10 ஆண்டுகளாக நடத்தி வந்துள்ளனர்.
இந்நிலையில் இன்று 100-க்கும் மேற்பட்டோர் ஆவடி காவல் ஆணையரகத்தில் சீட்டு நடத்திய தம்பதியர் பிரேம் ஆனந்த்-45 மஞ்சுளா-40 மற்றும் இவரது உறவினர் விக்னேஸ்வரி என்கிற (அம்மு)-31 ஆகிய மூவர் மீது மோசடி செய்தாக புகார் அளித்தனர்.
அந்த புகாரில் ஏலச்சீட்டு மற்றும் நகை பண்டுசீட்டு தம்பதியரிடம் பணம் கட்டியவர்கள், மஞ்சுளாவிடம் பணத்தை திருப்பி தருமாறு கடந்த ஆகஸ்ட் 24-ஆம் தேதி அவரது இல்லத்தில் சென்று கேட்டுள்ளனர். அவரும் பணத்தை திருப்பி தருவதாகவும், தன் மேல் புகார் எதுவும் அளிக்க வேண்டாம் எனவும், கேட்டுக் கொண்டதால் இதுவரை புகார் அளிக்கவில்லை.
இன்று காலை சீட்டு நடத்திய தம்பதியர் வீட்டிற்கு சென்று பார்த்தபோது வீட்டை வேறொருவருக்கு விற்றுவிட்டு வீட்டை காலி செய்து தலைமறைவாகியுள்ளது தெரியவந்தது.
இதனை பார்த்து அதிர்ச்சி அடைந்த பொதுமக்கள் அனைவரும் ஒன்று திரண்டு ஆவடி காவல் ஆணையரகத்தில் பண மோசடி செய்த கணவன், மனைவி மீது உரிய நடவடிக்கை எடுக்கக் கோரியும், பணத்தை மீட்டு தருமாறும் ஆவடி காவல் ஆணையரகத்தில் நூற்றுக்கும் மேற்பட்ட மக்கள் புகார் அளித்துள்ளனர்.