தமிழக அரசின் உயர் கல்வித்துறை விதித்த நிபந்தனைகளால் 25 கிறிஸ்தவ கல்லூரிகளில் முதல்வர்களை நியமிக்க முடியாத நிலை ஏற்பட்டிருப்பதாக ஜெகத் கஸ்பர் தெரிவித்துள்ளார்.
2026 சட்டமன்றத் தேர்தலில் சிறுபான்மை மக்களின் ஆதரவு யாருக்கு என்பது குறித்து பேராயர் ஜெகத் கஸ்பர யூடியூப் சேனலுக்கு அளித்த நேர்காணலில் தெரிவித்துள்ளதாவது:- தமிழ்நாட்டில் உள்ள சிறுபான்மையினர் மக்களின் வாக்களிக்கும் போக்கு என்பது மிகவும் தெளிவாக இருக்கும். தமிழகத்தில் இஸ்லாமியர்கள், கிறிஸ்தவர்கள் மற்றும் மொழிவழி சிறுபான்மை மக்கள் உள்ளனர். இதில் ரெட்டியார், நாயுடு, அருந்ததியர் போன்ற மொழி வழி சிறுபான்மை மக்கள், 80 முதல் 90 சதவீதம் வரை திமுகவுக்கு தான் வாக்களிப்பார்கள். காரணம் அந்த சமூகத்தை சேர்ந்தவர்களின் நலன் நன்றாகவே பேணப்படுகிறது. அந்த சமூகத்தை சேர்ந்தவர்கள் மிக வலிமையான அமைச்சர்களாக இருக்கிறார்கள். அவர்களுக்கு உளவியல் ரீதியான பாதுகாப்பு இருக்கிறது. மதவழி சிறுபான்மையினர் என்று வரும்போது இஸ்லாமியர்களில் வாக்களிப்பவர்களில் 95 சதவீதம் திமுக கூட்டணிக்கு தான் வாக்களிப்பார்கள். என்னுடைய ஆய்வுகள் அடிப்படையில் பார்த்தால் அதில் எந்த மாற்றமும் வராது. அவர்களுக்கு இன்றைக்கு தேவை என்பது அரசியல் பாதுகாப்புதான் முதன்மையாக இருக்கிறது. மதவழி சிறுபான்மையினருக்கு அரசியல் பாதுகாப்பை உறுதி செய்வதில் திமுக 100 சதவீதம் உறுதியாக தான் இருந்திருக்கிறது.
கிறிஸ்தவ மக்களின் நிலை என்பது, விஜய் ஒரு கிறிஸ்தவர் என்பதால் ஈர்க்கப்பட்டு அதிகபட்சமாக 20 சதவீதம் பேர் அவருக்கு வாக்களிக்கலாம். ஒரு 10 சதவீதம் பேர் நாம் தமிழர் கட்சிக்கு வாக்களிக்கும் நிலை உள்ளது. நாம் தமிழர் கட்சிக்கு ஒரு தொகுப்பு ஆதரவு இருக்கிறது. அதற்கு காரணம் கிறிஸ்தவ கல்வியால் மேலே வந்தவர்களின் அடுத்த தலைமுறையினர் தமிழ் மீது அதிக பற்றும், வேட்கையும் கொண்டவர்களாக உள்ளனர். மற்றபடி 70 சதவீதம் பேர் திமுக கூட்டணிக்கு ஆதரவாக தான் இருக்கிறது. அரசியல் பாதுகாப்பு தேவை கருதி ஆதரவு அளிக்கிறார்கள். ஆனால், கிறிஸ்தவ வாக்காளர்கள் மற்றும் முடிவு எடுக்கும் தலைவர்கள் மத்தியில் ஒரு அதீத சலிப்பு இருக்கிறது. கிறிஸ்தவர்களை பொருத்தவரை அவர்களுடைய கல்வி சார்ந்த நிறுவனங்களின் நலன்கள் மிகவும் முக்கியமான உள்ளது. அவற்றை ஒரு பொருட்டாக எடுத்துக்கொண்டு, அவற்றை பேணுவதில் திமுக அரசு முற்றாக தவறிதுவிட்டது. அதற்கு காரணம் பள்ளிக்கல்வித் துறை, உயர் கல்வித்துறை, நிதி மற்றும் சட்டத்துறை ஆகிய 4 துறைகள் ஆகும்.
கடந்த 4.5 ஆண்டுகால திமுக ஆட்சியில், கிறிஸ்தவ கல்வி நிறுவனங்களில் 12,000 போஸ்ட்டுகள் சரண்டர் செய்ய வேண்டிய நிலை ஏற்பட்டது. தமிழ்நாட்டில் அரசுப் பள்ளிகளுக்கு அடுத்த படியாக தாய்வழி தமிழ் கல்வியை விடமால் நடத்திக் கொண்டிருப்பது கிறிஸ்தவ கல்வி நிறுவனங்கள் தான். திமுக, அதிமுகவின் ஆட்சிக் காலத்தில் தான் கல்வியில் இருந்து தமிழ் அகற்றப்பட்டது. புதுடெல்லி சர்வாதிகாரம் தொடக்க கல்வி, நடுநிலைக் கல்வி மற்றும் உயர் கல்வியை படிப்படியாக கபளீகரம் செய்ததை, தடுத்து நிறுத்துவதற்கு எந்த முயற்சியும் நீங்கள் எடுக்க வில்லை. எனவே இன்னும் 10 ஆண்டுகளில் தமிழ்நாட்டில் தமிழ் பேச தெரியும். ஆனால் எழுதவும், படிக்கவும் தெரியாது என்கிற ஒரு தலைமுறைதான் வரும் என்கிற நிலை நிலவுகிறது. அத்தகைய கால கட்டத்தில் நீங்கள் தமிழ் மொழி, தமிழ் இன அடையாளத்தின் அடிப்படையில்தான் ஆட்சிக்கு வந்தீர்கள். அப்போது தமிழ்மொழியை காப்பாற்ற நீங்கள் எவ்வளவு பெரிய கொள்கை முடிவை எடுத்திருக்க வேண்டும். ஆனால் செய்யாதது மட்டுமின்றி, அதை செய்து வந்த கிறிஸ்தவ கல்வி நிறுவனங்களின் மரணத்திற்கு பள்ளி கல்வித்துறை, உயர் கல்வித்துறை காரணமாக அமைந்துள்ளது.
உயர் கல்வித்துறை கொண்டு வந்துள்ள நிபந்தனைகளை நிறைவேற்ற முடியாததால் இன்றைக்கு 25 கிறிஸ்தவ கல்லூரிகளில் முதல்வர்களை நியமிக்க முடியாத நிலை உள்ளது. நிதித்துறையிலும் சட்டத்துறையிலும் தான் பெரிய பெரிய ஆர்எஸ்எஸ்-காரர்கள் உட்கார்ந்திருக்கிறார்கள். திமுக தலைமை மற்றும் தலைமையை சார்ந்த அறிவுசார் சமூகத்தினர் மீது கடுமையான சலிப்பு உள்ளது. அதன் காரணமாக 70 சதவீத கிறிஸ்தவ வாக்காளர்கள் உணர்வுப்பூர்வமாக வாக்களிக்க முன்வருவார்களா? என்பது தேர்தல் நெருங்குகிறபோது தான் தெரியும். திமுக ஆட்சி அமைய உறுதுணையாக நின்ற சிறுபான்மை மக்களுக்கு அரசியல் பாதுகாப்பு வழங்கி இருக்கிறார்கள். நடுவழி கடந்த பிறகு தலித் மக்கள் மீது அக்கறை காட்டப்பட்டது. தென் தமிழ்நாட்டில் தேவேந்திர குல வேளாளர் சமூகத்திற்கு வலுவான 2 அமைச்சர் பொறுப்பு கொடுத்து அவர்களுக்கு ஒரு முகத்தை உருவாக்கி இருக்கலாம். அதை செய்யவில்லை. அதேபோல் மதவழி சிறுபான்மையினருக்கும் அவர்கள் செய்திருக்கலாம். ஆனால் செய்யவில்லை.
திமுகவினுடைய இன்றைய மிகப்பெரிய பலம் என்பது, அதிமுக பிளவுபட்டிருப்பது தான். கூட்டணி கட்சிகளை கையாளும் விதத்தில் மு.க.ஸ்டாலின் பக்குமான அணுகுமுறையை வெளிப்படுத்துகிறார். நன்றாகவே கையாண்டு இருக்கிறார். எடப்பாடி பழனிசாமியின் முதிர்ச்சி இன்மைதான் இத்தனை பேர் கட்சியை விட்டு செல்வதற்கு காரணமாக உள்ளது. எந்த காலத்திலும் கட்சி தன்னுடைய கட்டுப்பாட்டில் இருந்து அகன்றுவிடக் கூடாது என்பது தான் அவருடைய நோக்கம். அதிமுக மீண்டும் ஆட்சிக்கு வந்தால் தான் நீண்ட காலத்திற்கு இரண்டாம் கட்ட தலைவர்களும், தொண்டர்களும் தன்னோடு உடனிருப்பார்கள் என்று எண்ணம் அவருக்கு இல்லை. காங்கிரஸ் கட்சிக்கு தமிழ்நாடு கைகொடுக்கும் நிலை உள்ளது. தேசிய அளவில் இரு முறை 39 தொகுதிகளை வென்ற காரணத்தால் தான் எதிர்க்கட்சி என்கிற பலமே காங்கிரசுக்கு கிடைத்தது. எந்த விதமான பிசுரும் இல்லாத கூட்டணி கட்சியாக திமுக இருந்துள்ளது. காங்கிரசுக்கு எந்த எந்த தொகுதிகளை திமுக வழங்கியதோ, அந்த தொகுதிகளில் அவர்கள் வெல்கிறார்கள் என்பதையும் உறுதி செய்தது. ஜோதிமணி, கார்த்தி சிதம்பரம் போன்றவரகள் திமுகவின் உதவி இல்லாமல் வெற்றி பெற்றுவிடுவார்களா?
என்னை பொருத்தவரை 2026 தேர்தலில் திமுக கடுமையாக போராடிதான் வெற்றி பெறும். 2006 தேர்தலின்போது வந்த சூழ்நிலை ஏற்படுமா? என்று சிறு ஆய்வு செய்தேன். அதில் விஜய்க்கு பின்னால் வருகிற அணி திறளல் என்பது திரைக் கவர்ச்சியால் வந்தது அல்ல. அரசுக்கு எதிரான மனநிலையில் உள்ள வாக்காளர்கள் தான் விஜயிடம் இடம் மாறுகிறார்கள். எஸ்.ஐ.ஆர், ஆளுநரின் அத்துமீறல்கள் போன்றவை மக்களிடம் பற்றி எரிய செய்திருக்க வேண்டும். ஆனால் திமுக அப்படி செய்ய தவறிவிட்டது. ஆதனால் விஜய் தரப்பு குடும்ப அரசியல், அமைச்சர்களின் ஆடம்பர போக்கிற்கு எதிரான மனநிலையாக இளைஞர்கள் மற்றும் படித்த ஒரு தொகுப்பிடம் எதிரொலிக்கிறது. எனவே விஜய்க்கு பின்னால் இருக்கும் அரசுக்கு எதிரான வாக்காளர்களை, திமுகவினர் பார்க்க தவறுகிறார்கள். அந்த காரணத்தால் இந்த தேர்தல் திமுகவுக்கு சவால் மிகுந்ததாக இருக்கும். அது கூட்டணி கட்சிகளின் பேர வலிமையையும் அதிகரிக்கும். கூட்டணி ஆட்சி அமைகிற சூழ்நிலை தான் ஏற்படும் என்பது போன்ற தோற்றம் ஏற்படுகிறது. தேர்தல் நெருக்கத்தில் ஆய்வு செய்கிறபோது அது தெளிவாக தெரியும், இவ்வாறு அவர் தெரிவித்தார்.