தமிழக வெற்றிக் கழகத்தின் (தவெக) தலைவரும் நடிகருமான விஜய் மற்றும் அக்கட்சியின் ஆதரவாளர்கள் தன்னை சமூக வலைதளங்களில் கடுமையாக இழிவுபடுத்துவதாகவும், உயிருக்கு அச்சுறுத்தல் விடுப்பதாகவும் கூறி நடிகை ஜூலி (மரியா ஜூலியானா) சென்னை காவல் ஆணையர் அலுவலகத்தில் இன்று புகார் அளித்துள்ளார்.
சமீபத்தில் வேலூரில் நடைபெற்ற தவெக தேர்தல் பரப்புரை கூட்டத்தில், அக்கட்சியின் தலைவர் விஜய் ஜல்லிக்கட்டுப் போட்டியை அரசியல் களத்துடன் ஒப்பிட்டு ஒரு ‘குட்டிக்கதை’ கூறினார். இந்த கதையை விமர்சித்து ஜூலி சமூக வலைதளங்களில் வீடியோ ஒன்றை வெளியிட்டிருந்தார். அதில் விஜய்யின் அரசியல் நிலைப்பாடுகள் மற்றும் பேச்சுக்களை அவர் கடுமையாகச் சாடியிருந்தார்.
ஜூலி அளித்துள்ள புகாரில் குறிப்பிட்டுள்ள முக்கிய விவரங்கள்:
தனது விமர்சனத்திற்குப் பிறகு, தவெக ஆதரவாளர்கள் மற்றும் விஜய் ரசிகர்கள் திட்டமிட்டு தன்னை குறிவைத்து அவதூறு பரப்பி வருவதாக ஜூலி தெரிவித்துள்ளார்.
தான் ‘கிட்னி விற்பனை’ போன்ற சட்டவிரோத செயல்களில் ஈடுபடுவதாகச் சில சமூக வலைதளப் பக்கங்களில் ஆதாரமற்ற பொய்க் குற்றச்சாட்டுகளைப் பரப்புவதாகவும் அவர் குறிப்பிட்டுள்ளார்.
தனது குடும்பத்தினரை இழுத்து ஆபாசமாகவும், இழிவாகவும் பேசுவதோடு, தனக்குத் தொடர்ச்சியாகக் கொலை மிரட்டல்கள் வருவதாகவும் அவர் புகார் மனுவில் கூறியுள்ளார்.
போலி வீடியோக்கள் மற்றும் ஆடியோக்கள் மூலம் தனது நற்பெயருக்குக் களம் விளைவிப்பவர்கள் மீது சைபர் கிரைம் சட்டத்தின் கீழ் கடும் நடவடிக்கை எடுக்க வேண்டும் என அவர் கோரிக்கை விடுத்துள்ளார்.
ஜூலியின் கருத்து:
காவல் ஆணையர் அலுவலகத்தில் புகார் அளித்த பின் செய்தியாளர்களிடம் பேசிய ஜூலி, “ஒரு கருத்தைச் சொன்னால் அதைக் கருத்தால்தான் எதிர்கொள்ள வேண்டும். அதை விடுத்து, ஒரு பெண்ணின் தனிப்பட்ட வாழ்க்கையைச் சிதைக்கும் வகையில் அவதூறு பரப்புவதும், மிரட்டுவதும் கண்டிக்கத்தக்கது. சட்டத்தின் மீது எனக்கு நம்பிக்கை உள்ளது,” என்று தெரிவித்தார்.
தற்போது இந்த விவகாரம் சமூக வலைதளங்களில் பெரும் விவாதத்தை ஏற்படுத்தியுள்ளது. ஜூலியின் புகாரைப் பெற்றுக்கொண்ட போலீசார், இது குறித்து விசாரணை நடத்தி உரிய நடவடிக்கை எடுக்கப்படும் என்று தெரிவித்துள்ளனர்.