சென்னை ராயப்பேட்டையில் உள்ள அதிமுக தலைமை அலுவலகத்தில், அக்கட்சியின் எம்.ஜி.ஆர். இளைஞரணி நிர்வாகிகள் ஆலோசனைக் கூட்டம் இன்று நடைபெற்றது. அணியின் மாநிலச் செயலாளர் விஜயகுமார் தலைமையில் நடைபெற்ற இக்கூட்டத்தில், கட்சியின் தலைமைக்கு எதிராக நிர்வாகிகள் பலரும் தங்களது குமுறல்களையும், காரசாரமான குற்றச்சாட்டுகளையும் பகிரங்கமாக முன்வைத்ததால் பெரும் பரபரப்பு ஏற்பட்டது. இக்கூட்டத்தில் முன்னாள் அமைச்சர்கள் கோகுல இந்திரா, வளர்மதி, மாவட்டச் செயலாளர் ஆதிராஜாராம், ஜெமிலா மற்றும் ராயபுரம் மனோ உள்ளிட்ட முக்கிய நிர்வாகிகள் கலந்துகொண்டனர்.
”கட்டமைப்பு அதிமுக-விடம் தான் உள்ளது” – மாநிலச் செயலாளர் விஜயகுமார்:
கூட்டத்தில் பேசிய எம்.ஜி.ஆர். இளைஞரணி மாநிலச் செயலாளர் விஜயகுமார் தெரிவித்ததாவது:
எனக்கு இந்த மாநிலப் பொறுப்பை வழங்கிய கழகப் பொதுச்செயலாளர் இபிஎஸ் (எடப்பாடி பழனிசாமி) அவர்களுக்கு நன்றி. இந்த அணியைச் சிறப்பான முறையில் வழிநடத்தி, வரும் காலத்தை அதிமுக-வின் வெற்றிக் காலமாக மாற்ற முழு உழைப்பையும் தருவோம்.
தவெக-வுக்கு (தமிழக வெற்றிக் கழகம்) இளைஞர்கள் கட்டமைப்பு இருப்பதாக ஒரு மாயத்தோற்றம் மட்டுமே உருவாக்கப்பட்டுள்ளது. ஆனால், உண்மையான அடிமட்டக் கட்டமைப்பு அதிமுக-விடம் மட்டுமே உள்ளது. சமூக வலைத்தளங்களில் ‘ரீல்ஸ்’ போட்டு சிலர் ஆட்சிக்கு வந்துவிட்டார்கள். அது வெறும் தற்காலிக வெற்றிதான். அதிமுகவை மக்களின் மனதிலிருந்து என்றைக்கும் நீக்க முடியாது.
சுயநலத்திற்காக மட்டுமே சிலர் அதிமுகவிலிருந்து விலகி தவெக-வில் இணைந்துள்ளனர். முன்னாள் அமைச்சர் எம்.ஆர்.விஜயபாஸ்கர் தனது சுயநலத்திற்காகவே தவெக சென்றுள்ளார். தலைவர்கள் சுயநலத்திற்காகச் சென்றாலும், தொண்டர்கள் என்றும் இந்த இயக்கத்தில்தான் இருக்கிறார்கள்.
அதிமுக தலைமைக்கு எதிராக நிர்வாகிகள் கொந்தளிப்பு!
விஜயகுமாரின் உரை ஒருபுறமிருக்க, இக்கூட்டத்தில் கலந்துகொண்ட மாவட்ட மற்றும் அடிமட்ட இளைஞரணி நிர்வாகிகள், கட்சியின் தற்போதைய செயல்பாடுகள் குறித்துத் தலைமை அலுவலகத்திலேயே பரபரப்புக் குற்றச்சாட்டுகளை அடுக்கினர்.
அங்கீகாரம் இல்லை: “கட்சிக்காக இரவு பகலாக, உண்மையாக உழைப்பவர்களுக்கு அதிமுக-வில் பதவியோ, உரிய முக்கியத்துவமோ அளிக்கப்படுவது கிடையாது. உழைப்பவர்களுக்கு உரிய அங்கீகாரம் அளித்திருந்தால், கட்சியை விட்டுச் செல்லும் ‘ஓடுகாலிகள்’ இருந்திருக்க மாட்டார்கள்.”
தேர்தல் தோல்விக்குக் காரணம்: “நடந்து முடிந்த பொதுத்தேர்தலில் இளைஞரணி நிர்வாகிகளுக்கு எந்த முக்கியத்துவமும் தரப்படவில்லை. பூத் கமிட்டி (Booth Committee) அமைப்பதில் கூட இளைஞரணி நிர்வாகிகளின் பெயர்கள் திட்டமிட்டுப் புறக்கணிக்கப்பட்டுள்ளன. முக்கியப் பொறுப்புகளில் இருப்பவர்கள் யாரையும் அரவணைத்துச் செல்வதில்லை; அதுதான் இந்தத் தேர்தல் தோல்விக்கு மிக முக்கியக் காரணம்.”
தலைமைக்குக் கோரிக்கை: “இனிமேலாவது யார் கட்சிக்கு விசுவாசமாக இருக்கிறார்கள், யார் உழைக்கிறார்கள் என்று பார்த்து அவர்களுக்குப் பொறுப்புகளை வழங்க வேண்டும்” என நிர்வாகிகள் தங்களது ஆதங்கத்தை வெளிப்படுத்தினர்.
முன்னாள் அமைச்சர்கள் முன்னிலையிலேயே, தேர்தல் தோல்வி மற்றும் கட்சிப் பதவிப் பங்கீடு குறித்து இளைஞரணி நிர்வாகிகள் காரசாரமாகப் பேசியது அதிமுக வட்டாரத்தில் பெரும் அதிர்வலைகளை ஏற்படுத்தியுள்ளது.