சென்னை சர்வதேச திரைப்பட விழா இன்று தொடக்கம்

சென்னை சர்வதேச திரைப்பட விழா இன்று கோலாகலமாக தொடங்குகிறது.

இந்தோ சினி அப்ரிசியேசன் பவுண்டேசன் சார்பில் நடக்கும் 21-வது சென்னை சர்வதேச திரைப்பட விழா இன்று தொடங்குகிறது. கடந்த 2003-ம் ஆண்டு முதல் ஒவ்வொரு ஆண்டும் தவறாமல் சென்னை சர்வதேச திரைப்பட விழாவானது தொடர்ந்து நடைபெற்று வருகிறது. இந்த விழாவில் சர்வதேச அளவிலும், இந்திய அளவிலும் சிறந்த திரைப்படங்கள் தேர்வு செய்யப்பட்டு திரையிடப்படும். குறிப்பாக 57 நாடுகளைச் சேர்ந்த 126 படங்கள் திரையிடப்பட உள்ளன. அதுமட்டுமன்றி தேர்வாகும் சிறந்த திரைப்படங்களுக்கு சிறப்பு விருதுகள் வழங்கப்பட உள்ளன.

இந்த விழாவில் அர்ஜூன் தாஸ் நடித்த அநீதி, சசிகுமார் நடிப்பில் உருவான அயோத்தி, பாரதிராஜாவின் கருமேகங்கள் கலைகின்றன, உதயநிதி ஸ்டாலின் மற்றும் வடிவேலு நடித்த மாமன்னன், அசோக் செல்வனின் போர் தொழில், கோவை சரளா நடித்த செம்பி ஆகிய திரைப்படங்கள் திரையிடப்பட உள்ளன. அது மட்டுமன்றி விந்தியா விக்டிம் வெர்டிக்ட் வி3 மற்றும் வெற்றிமாறனின் விடுதலை முதல் பாகம் ஆகிய படங்களும் திரையிடப்பட உள்ளன.

இன்று தொடங்கும் திரைப்பட விழா வரும் டிசம்பர் 21-ம் தேதி வரை நடைபெற உள்ளது. இதில், கோலிவுட் நடிகர், நடிகைகள் இயக்குநர்கள் மற்றும் தயாரிப்பாளர்கள் என பல நட்சத்திரங்கள் பங்கேற்க உள்ளனர். சிறப்பு விருந்தினர்களாக மற்ற மொழி நட்சத்திரங்களும் பங்கேற்பார்கள் என்று எதிர்பார்க்கப்படுகிறது.