நடிகர் தனுஷ் தனது கேப்டன் மில்லர் படத்திற்கு பிறகு தனது ஐம்பதாவது திரைப்படத்தை தானே இயக்கி நடித்து முடித்துள்ளார். அதைத் தொடர்ந்து சேகர் கம்முலா இயக்கி வரும் D51 படத்திலும் நடித்து வருகிறார். இந்த படத்தின் படப்பிடிப்புகள் தற்போது விறுவிறுப்பாக நடைபெற்று வருகிறது. இதைத் தொடர்ந்து நடிகர் தனுஷ், எச் வினோத் இயக்கத்தில் நடிக்க இருப்பதாக ஏற்கனவே தகவல் வெளியாகி இருந்தது குறிப்பிடத்தக்கது.
எச்.வினோத் கடைசியாக அஜித் நடிப்பில் துணிவு திரைப்படத்தை இயக்கியிருந்தார். இந்த படத்தின் மாபெரும் வெற்றிக்கு பிறகு கமல் நடிப்பில் புதிய படம் ஒன்றை இயக்க இருப்பதாகவும் இந்த படத்தை ராஜ்கமல் பிலிம்ஸ் இன்டர்நேஷனல் நிறுவனம் தயாரிக்க இருப்பதாகவும் கடந்த சில மாதங்களுக்கு முன்பாகவே அதிகாரப்பூர்வ அறிவிப்பு வெளியானது. இருந்த போதிலும் கமல்ஹாசன், இந்தியன், கல்கி, தக் லைஃப் உள்ளிட்ட படங்களில் பிசியாக நடித்து வருவதால் KH233 படத்தின் படப்பிடிப்பு தொடங்குவதில் தாமதம் ஏற்படுகிறது.
எனவே இதற்கிடையில் எச்.வினோத், தீரன் அதிகாரம் 2 அல்லது யோகி பாபு நடிப்பில் புதிய படம் ஒன்றை இயக்குவார் என்று எதிர்பார்க்கப்பட்டது. ஆனால் எச் வினோத் இந்த இரண்டு படங்களையும் ஓரம் கட்டி விட்டு தனுஷ் நடிப்பில் புதிய படத்தை இயக்கும் அதிரடி முடிவை எடுத்தார். அதன்படி தனுஷ், எச் வினோத் கூட்டணியில் உருவாக உள்ள புதிய படத்தின் படப்பிடிப்பு 2024 ஜூன் மாதத்தில் தொடங்க இருப்பதாகவும், அதற்காக தனுஷ், எச் வினோத்திற்கு ஜூன் மற்றும் ஜூலை மாதங்களில் கால்ஷீட் கொடுத்துள்ளதாகவும் நம்பத் தகுந்த வட்டாரங்கள் தெரிவிக்கின்றன. எனினும் இது சம்பந்தமான அறிவிப்பு விரைவில் வெளியாகும் என்று எதிர்பார்க்கப்படுகிறது.