பிரதீப் ரங்கநாதன் நடிக்கும் புதிய படத்தின் பர்ஸ்ட் லுக் போஸ்டர் வெளியாகி உள்ளது.
தமிழ் சினிமாவில் ரவி மோகன் நடிப்பில் வெளியான கோமாளி படத்தின் மூலம் இயக்குனராக காலடி எடுத்து வைத்தவர் பிரதீப் ரங்கநாதன். அதை தொடர்ந்து இவர் லவ் டுடே எனும் திரைப்படத்தை தானே இயக்கி, நடித்திருந்தார். இந்த படம் இளைஞர்களை வெகுவாக கவர்ந்து இந்திய அளவில் சூப்பர் டூப்பர் ஹிட் அடித்தது. இதைத்தொடர்ந்து டிராகன் எனும் வெற்றி படத்தையும் கொடுத்தார் பிரதீப். இவ்வாறு இவர், தொடர்ந்து அடுத்தடுத்த வெற்றி படங்களை கொடுத்து ரசிகர்கள் மனதில் முக்கியமான இடத்தை பிடித்துள்ளார். இதற்கிடையில் இவர் விக்னேஷ் சிவன் இயக்கத்தில் எல்ஐகே எனும் திரைப்படத்திலும் நடித்து முடித்துள்ளார். மேலும் மைத்ரி மூவி மேக்கர்ஸ் நிறுவனத்தின் தயாரிப்பில் புதிய படம் ஒன்றில் நடிக்கிறார். இந்த படத்தை சுதா கொங்கராவின் உதவி இயக்குனர் கீர்த்தீஸ்வரன் இயக்குகிறார். சாய் அபியங்கர் இந்த படத்திற்கு இசையமைக்கிறார். 
இதில் பிரதீப் ரங்கநாதன் இணைந்து மமிதா பைஜூ முக்கிய கதாபாத்திரத்தில் நடிக்கிறார். ஏற்கனவே படப்பிடிப்புகள் தொடங்கி விறுவிறுப்பாக நடைபெற்று வரும் நிலையில் தற்போது இந்த படத்தின் ஃபர்ஸ்ட் லுக் போஸ்டரை படக்குழு வெளியிட்டுள்ளனர். அதன்படி இந்த படத்திற்கு டியூட்- DUDE என்று தலைப்பு வைக்கப்பட்டிருப்பதாக தெரிவிக்கப்பட்டுள்ளது. மேலும் இந்த போஸ்டரில் இப்படம் 2025 தீபாவளி தினத்தை முன்னிட்டு உலகம் முழுவதும் வெளியாகும் எனவும் அறிவிக்கப்பட்டுள்ளது.