ஆன்லைன் மோசடிகள் மூலம் பொதுமக்களிடம் இருந்து ரூ.400 கோடிக்கும் அதிகமான பணத்தைப் பெற்று, போலி வங்கிக் கணக்குகள் மற்றும் கிரிப்டோ கரன்சி வாயிலாகப் பரிமாற்றம் செய்த வழக்கில் முக்கிய குற்றவாளிகள் இருவரை சென்னை மண்டல அமலாக்கத்துறையினர் கைது செய்துள்ளனர்.
மேலும், இந்த மோசடி வலையமைப்புடன் தொடர்புடைய 600-க்கும் மேற்பட்ட சைபர் கிரைம் புகார்கள் குறித்து விசாரணை நடைபெற்று வருகிறது.
அமலாக்கத்துறை அதிரடி நடவடிக்கை!
சென்னை மண்டல அமலாக்கத்துறை அலுவலகம்-2 சார்பில், பணமோசடி தடுப்புச் சட்டத்தின் (PMLA) கீழ் கடந்த அக்டோபர் 30-ஆம் தேதி ரோஷன் ஃபியாஸ் மற்றும் அம்மார் ஆகிய இருவரும் கைது செய்யப்பட்டனர்.
தமிழக சைபர் கிரைம் பிரிவு மற்றும் தெலங்கானா மாநிலம் ஹைதராபாத் சைபர் கிரைம் காவல் நிலையத்தில் பதிவு செய்யப்பட்ட இரண்டு முதல் தகவல் அறிக்கைகளின் அடிப்படையில் அமலாக்கத்துறை இந்த விசாரணையைத் தொடங்கியது.
முதலீடு, வேலைவாய்ப்பு ஆசை காட்டி மோசடி!
முதலீட்டுத் திட்டங்கள், வேலைவாய்ப்புகள், பங்குச்சந்தை முதலீடுகள் உள்ளிட்ட பல்வேறு வாய்ப்புகளை வழங்குவதாகக் கூறி, சமூக வலைதளங்கள் மூலம் பொதுமக்களை மோசடி கும்பல் அணுகியுள்ளது.
அவர்களை நம்பவைத்து பணத்தைப் பெற்ற பின்னர், அந்தத் தொகையைப் போலி வங்கிக் கணக்குகளுக்கு மாற்றியுள்ளனர்.
தொடர்ந்து, பணத்தைப் பல்வேறு வங்கிக் கணக்குகளுக்குச் சிறு சிறு தொகைகளாகப் பிரித்து அனுப்பியுள்ளனர்.
அதில் ஒரு பகுதியை ரொக்கமாக எடுத்ததுடன், மற்றொரு பகுதியை USDT எனப்படும் கிரிப்டோ கரன்சியாக மாற்றிப் பரிமாற்றம் செய்ததும் அமலாக்கத்துறை விசாரணையில் தெரியவந்துள்ளது.
600-க்கும் மேற்பட்ட சைபர் கிரைம் புகார்கள்!
தமிழ்நாடு மட்டுமின்றி தெலங்கானா, கர்நாடகா, மேற்கு வங்கம் ஆகிய மாநிலங்களிலும் இதே மோசடி வலையமைப்புடன் தொடர்புடைய மேலும் 10 வழக்குகள் கண்டறியப்பட்டுள்ளன.
இதுவரை 600-க்கும் மேற்பட்ட சைபர் கிரைம் புகார்கள் இந்தக் கும்பலுடன் தொடர்புடையதாகக் கண்டறியப்பட்டுள்ளன. இதன் மூலம் பொதுமக்களிடம் இருந்து ரூ.400 கோடிக்கும் அதிகமான பணம் மோசடி செய்யப்பட்டு, பல்வேறு வங்கிக் கணக்குகள் மற்றும் கிரிப்டோ கரன்சி பரிமாற்றங்கள் வாயிலாக மாற்றப்பட்டுள்ளது.
31 வங்கிக் கணக்குகளில் ரூ.300 கோடிக்கும் அதிகமான பரிவர்த்தனை!
இந்த மோசடி வலையமைப்பின் முக்கிய நபராக ரோஷன் ஃபியாஸ் செயல்பட்டு வந்ததாக அமலாக்கத்துறை விசாரணையில் தெரியவந்துள்ளது. தனது பெயரிலும், மனைவியின் பெயரிலும், தனது கட்டுப்பாட்டில் இருந்த பல்வேறு நிறுவனங்கள் மற்றும் தனிநபர்களின் பெயர்களிலும் உள்ள வங்கிக் கணக்குகளைப் பயன்படுத்தி மோசடிப் பணத்தைப் பரிமாற்றம் செய்துள்ளார்.
இதுபோன்று 31 வங்கிக் கணக்குகளில் ரூ.300 கோடிக்கும் அதிகமான பண வரவு மற்றும் செலவுப் பரிவர்த்தனைகள் நடைபெற்றிருப்பது கண்டறியப்பட்டுள்ளது. பாதிக்கப்பட்டவர்களிடம் இருந்து பெறப்பட்ட பணம் பல்வேறு வங்கிக் கணக்குகள் வழியாக மாற்றப்பட்டு, பின்னர் கிரிப்டோ வாலெட்டுகள் மூலம் USDT ஆக மாற்றப்பட்டுள்ளது.
மோசடிக்கு உதவிய அம்மார்!
இந்த மோசடிக்கு உதவிய அம்மார், பல்வேறு நபர்கள் மற்றும் நிறுவனங்களின் வங்கிக் கணக்குகள், ஏடிஎம் கார்டுகள், நெட் பேங்கிங் விவரங்கள், சிம் கார்டுகள், செல்போன்கள் மற்றும் மின்னஞ்சல் முகவரிகளை ரோஷன் ஃபியாஸுக்கு வழங்கியதாகக் கூறப்படுகிறது. மேலும், கிரிப்டோ கரன்சி வாங்குபவர்களிடம் இருந்து இந்திய ரூபாயைப் பெறுவதற்கும் அவர் உதவியுள்ளார்.
ரூ.3.26 கோடி கிரிப்டோ கரன்சி பறிமுதல்!
ஏற்கனவே, ரோஷன் ஃபியாஸ், அம்மார் மற்றும் அவர்களுடன் தொடர்புடைய நிறுவனங்களுக்குச் சொந்தமான இடங்களில் அமலாக்கத்துறையினர் சோதனை நடத்தினர்.
இந்தச் சோதனையில் ரூ.14.50 லட்சம் ரொக்கப் பணமும், ரூ.3.26 கோடி மதிப்பிலான கிரிப்டோ கரன்சியும் பறிமுதல் செய்யப்பட்டன. மேலும், பல்வேறு வங்கிக் கணக்குகளில் இருந்த சுமார் ரூ.88.28 லட்சம் பணமும் முடக்கப்பட்டது.
ஆன்லைன் மோசடிகள் மூலம் ரூ.400 கோடிக்கும் அதிகமான பணம் கைமாறியதாகக் கூறப்படும் இந்த வழக்கில், முக்கிய குற்றவாளிகள் இருவர் கைது செய்யப்பட்டுள்ள நிலையில், மோசடி வலையமைப்பில் தொடர்புடைய மற்ற நபர்கள் மற்றும் பணப் பரிமாற்றங்கள் குறித்து அமலாக்கத்துறையினர் தொடர்ந்து விசாரணை நடத்தி வருகின்றனர்.