தீபாவளிக்கு சொந்த ஊர் சென்றதைப் பயன்படுத்தி மர்ம நபர்கள் கைவரிசை
திருவாரூரில் தமிழ்நாடு மத்திய பல்கலைக்கழக வளாகத்தில் உள்ள குடியிருப்புகளில், 7 பேராசிரியர்களின் வீடுகளின் பூட்டுகளை உடைத்து நகை, பணம் மற்றும் வெள்ளிப் பொருட்கள் கொள்ளையடிக்கப்பட்ட சம்பவம் அதிர்ச்சியை ஏற்படுத்தியுள்ளது.
தீபாவளி விடுமுறையைப் பயன்படுத்தி கொள்ளை
தமிழ்நாடு மத்திய பல்கலைக்கழகத்தில் பணியாற்றும் பேராசிரியர்கள் 7 பேர், தீபாவளி பண்டிகையை முன்னிட்டு தங்களது சொந்த ஊர்களுக்குச் சென்றுள்ளனர்.
இதனை நோட்டமிட்ட மர்ம நபர்கள், பல்கலைக்கழக வளாகத்தில் உள்ள அவர்களது குடியிருப்புகளின் பூட்டுகளை உடைத்து உள்ளே புகுந்துள்ளனர். பின்னர் வீடுகளில் இருந்த நகைகள், பணம் மற்றும் வெள்ளிப் பொருட்களைக் கொள்ளையடித்துவிட்டு அங்கிருந்து தப்பிச் சென்றதாகக் கூறப்படுகிறது.
போலீசார் விசாரணை
சொந்த ஊர்களிலிருந்து திரும்பிய பேராசிரியர்கள், தங்களது வீடுகளின் பூட்டுகள் உடைக்கப்பட்டு பொருட்கள் கொள்ளையடிக்கப்பட்டிருப்பதைக் கண்டு அதிர்ச்சியடைந்தனர்.
இதுகுறித்து காவல்துறையினருக்குத் தகவல் தெரிவிக்கப்பட்டதைத் தொடர்ந்து, சம்பவம் தொடர்பாக விசாரணை மேற்கொள்ளப்பட்டு வருகிறது. ஒரே வளாகத்தில் உள்ள 7 பேராசிரியர்களின் வீடுகளில் கொள்ளை நடந்துள்ள சம்பவம் பல்கலைக்கழக வட்டாரத்தில் பரபரப்பை ஏற்படுத்தியுள்ளது.
கொள்ளையில் ஈடுபட்ட மர்ம நபர்கள் யார், எவ்வளவு மதிப்பிலான பொருட்கள் திருடப்பட்டுள்ளன என்பது குறித்து விசாரணைக்குப் பிறகே முழுமையான விவரங்கள் தெரியவரும்.