திண்டுக்கல் மாவட்டம், உலகப் புகழ்பெற்ற பழனி தண்டாயுதபாணி சுவாமி கோயிலுக்குச் சொந்தமான சுமார் ரூ.100 கோடி மதிப்புள்ள நிலத்தை, போலி ஆவணங்கள் மூலம் வெறும் ரூ.2 கோடிக்கு பத்திரப்பதிவு செய்து மோசடி செய்த விவகாரம் தமிழகம் முழுவதும் பெரும் அதிர்ச்சியை ஏற்படுத்தியுள்ளது. இந்த வழக்கில் தற்பொழுது நெல்லையில் சிபிசிஐடி காவல்துறையினர் அதிரடி சோதனையில் ஈடுபட்டு வருகின்றனர்.
வழக்கின் பின்னணி:
பழனி கோயில் நிலங்கள் பிரிவு கண்காணிப்பாளர் முருகானந்தம் அளித்த புகாரின் பேரில், சார்பதிவாளர் ஜஸ்டின் மணிகண்டன் மற்றும் போலி பிரமுகர் முருகதாஸ் உள்ளிட்ட நான்கு பேர் மீது பழனி அடிவாரம் காவல் நிலையத்தில் 5 பிரிவுகளின் கீழ் வழக்குப்பதிவு செய்யப்பட்டது. வழக்கின் தீவிரத்தன்மை காரணமாக, கடந்த 15-ஆம் தேதி இந்த வழக்கு சிபிசிஐடி (CBCID) பிரிவுக்கு மாற்றப்பட்டது. இதனைத் தொடர்ந்து பழனி, உடுமலைப்பேட்டை, திண்டுக்கல் உள்ளிட்ட பல்வேறு இடங்களில் தொடர்புடையவர்களின் வீடுகளில் சிபிசிஐடி போலீஸார் அதிரடி சோதனை நடத்தி வருகின்றனர்.
நெல்லையில் தொடரும் சிபிசிஐடி வேட்டை:
திண்டுக்கல் மாவட்டத்தைத் தொடர்ந்து, நெல்லையிலும் இந்த வழக்கு தொடர்பாக சிபிசிஐடி போலீஸார் தங்களது சோதனையை விரிவுபடுத்தியுள்ளனர்.
1. மேடை அலங்கார ஊழியர் வீட்டில் 3 மணி நேர சோதனை: நெல்லை டவுன் சாலியர் தெரு பகுதியில் வசிக்கும் மேடை அலங்கார (டெக்கரேஷன்) ஊழியரான சண்முகசுந்தரம் என்பவரது வீட்டிற்குள் நுழைந்த சிபிசிஐடி போலீஸார், கதவு மற்றும் ஜன்னல்களைப் பூட்டிவிட்டு அதிரடி சோதனையில் ஈடுபட்டனர். 3 மணி நேரத்திற்கும் மேலாக நீடித்த இந்த சோதனையின் போது, சண்முகசுந்தரம், அவரது மனைவி மற்றும் 2 குழந்தைகள் உள்ளிட்ட குடும்ப உறுப்பினர்கள் அனைவரிடமும் தனித்தனியாக விசாரணை நடத்தப்பட்டது. சண்முகசுந்தரம் அடிக்கடி வெளியூர்களுக்குச் சென்று கோயில் விழாக்கள் மற்றும் திருமணங்களுக்கு டெக்கரேஷன் வேலைகள் செய்து வந்துள்ளார் என்பது குறிப்பிடத்தக்கது.
2. 2-வதாக சமையல்காரர் வீட்டில் அதிரடி விசாரணை: இதன் தொடர்ச்சியாக, நெல்லை பாளையங்கோட்டை வி.என்.சத்திரம் திருவள்ளுவர் தெரு பகுதியைச் சேர்ந்த சமையலர் குமரகுரு என்பவரது வீட்டிற்கு சிபிசிஐடி காவல்துறையினர் விரைந்தனர். அங்கேயும் குமரகுரு மற்றும் அவரது குடும்பத்தினரிடம் தீவிர விசாரணை மேற்கொள்ளப்பட்டு வருகிறது. இந்த நில மோசடி தொடர்பாக ஏதேனும் முக்கிய ஆவணங்கள் இங்கு மறைத்து வைக்கப்பட்டுள்ளதா என்ற கோணத்தில் வீடு முழுவதும் சிபிசிஐடி போலீஸார் தீவிர சோதனையில் ஈடுபட்டு வருகின்றனர்.
பழனி கோயில் நில மோசடி வழக்கில் நெல்லையைச் சேர்ந்த சமையலர் மற்றும் டெக்கரேஷன் ஊழியர் வீடுகளில் அடுத்தடுத்து சிபிசிஐடி போலீஸார் சோதனை நடத்தி வருவது அரசியல் மற்றும் ஆன்மீக வட்டாரத்தில் பெரும் பரபரப்பை ஏற்படுத்தியுள்ளது.