மத்திய அரசின் கொள்கைக்கு எதிர்ப்பு தெரிவித்து மத்திய தொழிற்சங்கங்கள் நாளை நாடு தழுவிய பொது வேலைநிறுத்த போராட்டத்தை முன்னெடுத்துள்ளன. இதில், 30 கோடி தொழிலாளர்கள் பங்கேற்பார்கள் என எதிர்பார்க்கப்படுகிறது.
மத்திய அரசின் தொழிலாளர் மற்றும் விவசாயக் கொள்கைகளுக்கு எதிர்ப்பு தெரிவித்து, பிப்ரவரி 12, 2026 அன்று நாடு தழுவிய பாரத் பந்த் (Bharat Bandh) மற்றும் பொது வேலைநிறுத்தத்திற்குப் பல்வேறு தொழிற்சங்கங்கள் மற்றும் விவசாய அமைப்புகள் அழைப்பு விடுத்துள்ளன.
சுமார் 10 மத்திய தொழிற்சங்கங்கள் (INTUC, AITUC, HMS, CITU, LPF உள்ளிட்டவை) மற்றும் சம்யுக்த கிசான் மோர்ச்சா (SKM) போன்ற விவசாய அமைப்புகள் இணைந்து இந்தப் போராட்டத்தை முன்னெடுத்துள்ளன. இதில் சுமார் 30 கோடி தொழிலாளர்கள் பங்கேற்பார்கள் என எதிர்பார்க்கப்படுகிறது.
முக்கிய கோரிக்கைகள்:
தொழிலாளர் சட்டங்கள்: மத்திய அரசு கொண்டு வந்துள்ள 4 புதிய தொழிலாளர் சட்டத் தொகுப்புகளை (Labour Codes) ரத்து செய்ய வேண்டும்.
தனியார்மயம்: அணுசக்தி, காப்பீடு உள்ளிட்ட பொதுத்துறை நிறுவனங்களில் தனியார் மற்றும் அந்நிய முதலீடுகளை அனுமதிப்பதை நிறுத்த வேண்டும்.
100 நாள் வேலை உறுதித்திட்டம் : மகாத்மா காந்தி தேசிய ஊரக வேலை வாய்ப்பு உறுதிச் சட்டத்தின் கீழ் (MGNREGA) வழங்கப்பட்ட உரிமைகளை மீட்டெடுக்க வேண்டும்.
விவசாயிகள் நலன்: வரைவு விதைகள் மசோதா மற்றும் மின்சார திருத்த மசோதாவைத் திரும்பப் பெற வேண்டும்.
எவை இயங்கும்? எவை பாதிக்கப்படும்?
பிப்ரவரி 12, 2026 அன்று நடைபெறவுள்ள பாரத் பந்த் போராட்டத்தின் போது, வங்கிச் சேவைகள், பொதுப் போக்குவரத்து மற்றும் அரசு அலுவலகங்களின் செயல்பாடுகள் பெருமளவில் பாதிக்கப்பட வாய்ப்புள்ளது. குறிப்பாக, பொதுத்துறை வங்கிகளின் ஊழியர்கள் சங்கங்கள் இந்தப் போராட்டத்தில் பங்கேற்பதால், காசோலை பரிமாற்றம், பணம் டெபாசிட் செய்தல் மற்றும் எடுத்தல் போன்ற வங்கிப் பணிகள் தடைபடலாம்; இருப்பினும் ஏடிஎம் மற்றும் ஆன்லைன் பேங்கிங் சேவைகள் வழக்கம் போல் இயங்கும் என்று எதிர்பார்க்கப்படுகிறது. போக்குவரத்துத் துறையைப் பொறுத்தவரை, அரசுப் பேருந்துகள் மற்றும் ஆட்டோ தொழிற்சங்கங்கள் பங்கேற்கும் பகுதிகளில் போக்குவரத்து நெரிசல் அல்லது சேவைக் குறைபாடுகள் ஏற்படலாம்.
பள்ளிகள் மற்றும் கல்லூரிகளுக்கு மாநில அளவில் அதிகாரப்பூர்வ விடுமுறை எதுவும் அறிவிக்கப்படவில்லை என்றாலும், அந்தந்த மாவட்ட நிலவரம் மற்றும் போக்குவரத்து பாதிப்புகளைப் பொறுத்து உள்ளூர் நிர்வாகமே முடிவெடுக்கும். அதே நேரத்தில், மருத்துவமனைகள், ஆம்புலன்ஸ் சேவைகள், மருந்தகங்கள் மற்றும் பால் விநியோகம் போன்ற அத்தியாவசியச் சேவைகள் எந்தத் தடையுமின்றி வழக்கம் போல் செயல்படும். தனியார் நிறுவனங்கள் மற்றும் ஐடி அலுவலகங்கள் பெரும்பாலும் இயங்கும் என்றாலும், ஊழியர்கள் பணிக்கு வருவதில் சிக்கல்கள் இருக்கலாம் என்பதால் முன்னெச்சரிக்கை நடவடிக்கைகளை மேற்கொள்ள அறிவுறுத்தப்படுகிறார்கள்.
தமிழ்நாட்டில் ஆளும் திமுக மற்றும் அதன் கூட்டணிக் கட்சிகள் (இடதுசாரிகள், விசிக) இந்த வேலைநிறுத்தப் போராட்டத்திற்கு ஆதரவு தெரிவித்துள்ளன. பிப்ரவரி 12 அன்று மாலை தமிழகத்தின் பல்வேறு இடங்களில் கண்டன ஆர்ப்பாட்டங்கள் நடைபெறும் என்று அறிவிக்கப்பட்டுள்ளது.
பொது மக்கள் பயணங்களை மேற்கொள்வதற்கு முன் உள்ளூர் போக்குவரத்து நிலவரத்தை சரிபார்த்துக் கொள்ள அறிவுறுத்தப்படுகிறார்கள்.
”பொருளாதாரம் ஆயுதமாக்கப்பட்டதற்கான சிறந்த உதாரணம்” இந்த ஒப்பந்தமே – ராகுல் காந்தி சாடல்