ஆப்கானிஸ்தான் வெளியுறவுத்துறை அமைச்சர் கலந்துகொண்ட பத்திரிகையாளர் சந்திப்பில் பெண் நிருபர்களுக்கு அனுமதி மறுக்கப்பட்டுள்ளது சர்ச்சையை ஏற்படுத்தியுள்ளது.
கடந்த 2021ம் ஆண்டு தெற்காசிய நாடான ஆப்கானிஸ்தானில், பயங்கரவாத அமைப்பான தாலிபன் ஆட்சி நிர்வாகத்தை கைப்பற்றியது. அதன்பிறகு ஆப்கன் தலைநகர் காபுலில் செயல்பட்டு இந்திய தூதரகத்தையும் இந்திய அரசு மூடியது. இருப்பினும் மனிதாபிமான அடிப்படையில் அந்நாட்டிற்கு பல்வேறு உதவிகளை இந்தியா செய்து வருகிறது. இந்த நிலையில் ஆப்கானிஸ்தானில் தற்போது ஆட்சிப்பொறுப்பில் உள்ள தாலிபன் அரசின் வெளியுறவுத்துறை அமைச்சர் அமீர்கான் முத்தாகி அரசு முறை பயணமாக நேற்று முன்தினம் இந்தியா வந்தார். வருகிற 16ம் தேதி வரை இந்தியாவில் அரசு முறை பயணம் மேற்கொள்ள இருக்கும் அமீர்கான் முத்தாகி, நேற்று ஒன்றிய வெளியுறவுத்துறை அமைச்சர் ஜெய்சங்கரை சந்தித்துப் பேசினார்.
அதன்பின்னர் தாலிபன் வெளியுறவு அமைச்சர் அமீர்கான் செய்தியாளர்களை சந்தித்தார். இந்த சந்திப்பின் போது சர்வதேச ஊடங்கங்கள் மற்றும் செய்தி நிறுவனங்களின் நிருபர்களுடன் , இந்தியாவின் பல்வேறு செய்தி நிறுவனங்கலின் நிருபர்களும் பங்கேற்றிருந்தனர். ஆனால் இந்த பத்திரிக்கையாளர்கள் சந்திப்பில் ஒரு பெண் நிருபர் கூட பங்கேற்கவில்லை. குறிப்பாக பெண் செய்தியாளர்களுக்கு அனுமதி மற்றுக்கப்பட்டதாக கூறப்படுகிறது.
ஆப்கானிஸ்தானில் தாலிபன்கள் பெண்களுக்கு எதிராக பல்வேறு நடவடிக்கைகளை மேற்கொண்டு சர்வாதிகார ஆட்சியை செய்து வருகிறது. ஆனால் இந்தியாவில் டெல்லியில் நடைபெற்ற செய்தியாளர்கள் சந்திப்பில் பெண் நிருபர்களுக்கு அனுமதி மறுக்கப்பட்ட சம்பவம், நாடு முழுவதும் பெரும் அதிர்வலைகளை ஏற்படுத்தியுள்ளது. இதற்கு பத்திரிக்கையாளர்கள், அரசியல் கட்சித் தலைவர்கள் பல்வேறு தரப்பினரும் கண்டனம் தெரிவித்து வரும் நிலையில், நம் நாட்டில் , விதிமுறைகளை வகுக்க, பெண்களுக்கு எதிரான பாகுபாட்டை திணிக்க தாலிபன்களுக்கு அதிகாரம் கொடுத்தது யார்? என பெண்ணியவாதிகள், சமூக செயற்பாட்டாளர்கள் காட்டமாக கேள்வி எழுப்பி வருகின்றனர்.