புதுடெல்லியில் பிரதமர் மோடி தலைமையில் நடைபெற்ற 18-வது பிரிக்ஸ் மாநாட்டில் பங்கேற்ற ரஷ்ய அதிபர் விளாடிமிர் புதின், மாநாடு நிறைவடைந்ததை தொடர்ந்து டெல்லியில் இருந்து புறப்பட்டார்.
புதுடெல்லியில் உள்ள பாரத் மண்டபத்தில் நடைபெற்ற இந்த மாநாட்டில் ரஷ்ய அதிபர் புதின், சீன அதிபர் ஜி ஜின்பிங், ஈரான் அதிபர் மசூத் பெசஸ்கியான் உள்ளிட்ட பல்வேறு நாடுகளின் தலைவர்கள் பங்கேற்றனர். பிரேசில், எகிப்து, எத்தியோப்பியா, இந்தோனேசியா, தென் ஆப்பிரிக்கா, ஐக்கிய அரபு அமீரகம் உள்ளிட்ட பிரிக்ஸ் உறுப்பு நாடுகளின் தலைவர்களும் மாநாட்டில் கலந்து கொண்டனர்.
மாநாட்டின் போது ரஷ்ய அதிபர் புதின் இரண்டு முக்கிய அமர்வுகளில் பங்கேற்றார். மேலும், பாரத் இன்னோவேட்ஸ் கண்காட்சியையும் அவர் பார்வையிட்டார். தலைவர்கள் பங்கேற்ற அமர்வில் உரையாற்றிய புதின், ரஷ்யா எதிர்கொண்டு வரும் சர்வதேச பொருளாதார தடைகள் குறித்தும் பேசினார்.
ரஷ்யா மீது 30,000-க்கும் மேற்பட்ட தடைகள்
ரஷ்யா மீது 30,000-க்கும் மேற்பட்ட தடைகள் விதிக்கப்பட்டுள்ளதாக புதின் தெரிவித்தார். உலகின் அனைத்து நாடுகள் மீதும் விதிக்கப்பட்டுள்ள ஒட்டுமொத்த தடைகளின் எண்ணிக்கையை விட இது இரண்டு மடங்கு அதிகம் என்றும் அவர் குறிப்பிட்டார்.
உக்ரைன் போர் தொடர்பாகவும் மாநாட்டில் முக்கிய விவாதங்கள் இடம்பெற்றன. கடந்த நான்கரை ஆண்டுகளாக ரஷ்யா மற்றும் உக்ரைன் இடையே நீடித்து வரும் மோதலை பேச்சுவார்த்தை மூலம் முடிவுக்கு கொண்டு வருவதற்கான முயற்சிகள் குறித்து சர்வதேச அளவில் தொடர்ந்து கவனம் செலுத்தப்பட்டு வருகிறது.
மோடி, ஜின்பிங் முயற்சிக்கு ரஷ்யா வரவேற்பு
ரஷ்யா – உக்ரைன் மோதலுக்கு பேச்சுவார்த்தை மூலம் தீர்வு காண பிரதமர் மோடி மற்றும் சீன அதிபர் ஜி ஜின்பிங் மேற்கொண்டு வரும் முயற்சிகளை ரஷ்யா வரவேற்றுள்ளது.
போருக்கு பேச்சுவார்த்தை மூலம் முடிவு காண்பதே நீண்டகால அமைதிக்கு வழிவகுக்கும் என்ற எதிர்பார்ப்பு நிலவி வரும் நிலையில், இந்த விவகாரம் பிரிக்ஸ் மாநாட்டின் முக்கிய கவனப்புள்ளிகளில் ஒன்றாக அமைந்தது.
மாநாடு நிறைவடைந்ததை தொடர்ந்து ரஷ்ய அதிபர் புதின் டெல்லியில் இருந்து புறப்பட்டுச் சென்றார். அவரது இந்திய பயணம் மற்றும் பிரிக்ஸ் மாநாட்டில் நடைபெற்ற உயர்மட்ட ஆலோசனைகள் சர்வதேச அரசியல் வட்டாரத்தில் முக்கியத்துவம் பெற்றுள்ளன.