தமிழகத்தில் பதினொன்றாம் வகுப்பு பொதுத்தேர்வுக்கான முடிவுகள் வெளியாகியுள்ள நிலையில், மாணவர்கள் ஆர்வமுடன் தங்களது மதிப்பெண்களை பார்த்து வருகின்றனர்.
தமிழகம் முழுவதும் கடந்த மார்ச் மாதம் 04ம் தேதி முதல் 25ம் தேதி வரை பதினொன்றாம் வகுப்பு பொதுத்தேர்வு நடைபெற்றது. இந்த தேர்வை தமிழகம் முழுவதும் 8 லட்சத்திற்கும் அதிகமான மாணவர்கள் எழுதினர். தேர்வுகள் முடிவடைந்ததை தொடர்ந்து விடைத்தாள்களை திருத்தும் பணி நடைபெற்றது. இந்த நிலையில், இன்று 11ம் வகுப்பு பொதுத்தேர்வு முடிவுகள் வெளியாகியுள்ளன. மாணவர்கள் http://tnresults.nic.in மற்றும் http://dge.tn.gov.in, https://results.digilocker.gov.in ஆகிய இணையதளங்களில் தங்களது தேர்வு முடிவுகளை தெரிந்துக்கொள்ளலாம் என தெரிவிக்கப்பட்டுள்ளது.
சென்னையில் உள்ள பேராசிரியர் அன்பழகன் கல்வி வளாகத்தில் அரசுத் தேர்வுகள் இயக்கக இயக்குனர் சேதுராமவர்மா, தேர்வு முடிவுகளை வெளியிட்டார்.
அதன்படி 11ம் வகுப்பு பொதுத்தேர்வில் 91.17% மாணவர்கள் தேர்ச்சி பெற்றுள்ளனர். 11ம் வகுப்பு பொது தேர்வில் தமிழ் பாடத்தில் 8 பேர் 100 சதவிகிதம் மதிப்பெண்கள் பெற்றுள்ளனர். அதிகபட்சமாக கணினி அறிவியலில் 3,432 பேர் 100 சதவிகிதம் மதிப்பெண்கள் பெற்றுள்ளனர். 11ம் வகுப்பு பொதுத் தேர்வில் அரசுப் பள்ளிகள் 85.75% தேர்ச்சி பெற்றுள்ளன. அறிவியல் பாடப் பிரிவுகளில் 94.31% மாணவர்கள் தேர்ச்சி பெற்றுள்ளன.