திருச்சி கிழக்கு உள்ளிட்ட தமிழகத்தின் 5 சட்டமன்றத் தொகுதிகளுக்கு இடைத்தேர்தல் நடத்த விதிக்கப்பட்ட தடையை நீக்கக் கோரியும், பொதுநலன் கருதி உடனடியாக இடைத்தேர்தல் நடத்தத் தேர்தல் ஆணையத்திற்கு உத்தரவிடக் கோரியும் தமிழ்நாடு முதலமைச்சர் விஜய் சார்பில் சென்னை உயர் நீதிமன்றத்தில் பதில் மனுத் தாக்கல் செய்யப்பட்டுள்ளது.
சமீபத்தில் நடைபெற்ற தமிழ்நாடு சட்டமன்றத் தேர்தலில் திருச்சி கிழக்குத் தொகுதியில் போட்டியிட்டு வெற்றி பெற்ற தமிழக வெற்றிக் கழகத் தலைவரும் முதலமைச்சருமான விஜய், தனது சட்டமன்ற உறுப்பினர் பதவியை ராஜினாமா செய்தார். இதனைத் தொடர்ந்து திருச்சி கிழக்குத் தொகுதி காலியானதாக அறிவிக்கப்பட்டது. இதற்கிடையே, அதிமுகவைச் சேர்ந்த எம்.எல்.ஏ-க்களான மரகதம் குமாரவேல் (மதுராந்தகம்), எஸ். ஜெயக்குமார் (பெருந்துறை), பி. சத்தியபாமா (தாராபுரம்), இசக்கி சுப்பையா (அம்பாசமுத்திரம்), எம்.ஆர். விஜயபாஸ்கர் (கரூர்) மற்றும் சி. விஜயபாஸ்கர் (விராலிமலை) ஆகியோர் தங்களது பதவிகளை ராஜினாமா செய்துவிட்டு தவெகவில் இணைந்தனர்.
இதன் காரணமாகத் தமிழகத்தில் திருச்சி கிழக்கு உள்ளிட்ட 7 தொகுதிகளுக்கு இடைத்தேர்தல் களம் சூடுபிடிக்கும் என எதிர்பார்க்கப்பட்ட சூழலில், திருநெல்வேலியைச் சேர்ந்த வெங்கடாசலபதி என்பவர் சென்னை உயர் நீதிமன்றத்தில் பொதுநல மனு ஒன்றைத் தாக்கல் செய்தார். அதில், வேட்பாளர்களின் வெற்றியை எதிர்த்த தேர்தல் வழக்குகள் நிலுவையில் உள்ளதால் திருச்சி கிழக்கு, கரூர், விராலிமலை, பெருந்துறை, அம்பாசமுத்திரம் ஆகிய 5 தொகுதிகளுக்கு இடைத்தேர்தல் நடத்தத் தடை விதிக்க வேண்டும் எனக் கோரியிருந்தார்.
நீதிமன்றத்தின் இடைக்காலத் தடை
இந்த மனுவை விசாரித்த உயர் நீதிமன்ற அமர்வு, உச்ச நீதிமன்ற உத்தரவுகளைச் சுட்டிக்காட்டி 5 தொகுதிகளுக்கும் இடைத்தேர்தல் அறிவிக்க இடைக்காலத் தடை விதித்தது. தலைமை நீதிபதி மற்றும் நீதிபதி அருள்முருகன் ஆகியோர் அடங்கிய அமர்வில் கடந்த ஆகஸ்ட் 24 அன்று இந்த வழக்கு மீண்டும் விசாரணைக்கு வந்தபோது, “தற்போது இடைத்தேர்தல் அறிவிக்கும் திட்டம் எதுவும் இல்லை” எனத் தேர்தல் ஆணையம் தரப்பில் தெரிவிக்கப்பட்டது. இதையடுத்து இடைத்தேர்தலுக்கான தடையைச் செப்டம்பர் 8-ஆம் தேதி வரை நீட்டித்து நீதிபதிகள் உத்தரவிட்டனர்.
முதலமைச்சர் விஜய் தாக்கல் செய்த அதிர்ச்சி பதில் மனு
இந்நிலையில், இந்த வழக்கு தொடர்பாக முதலமைச்சர் விஜய் தரப்பில் உயர் நீதிமன்றத்தில் விரிவான பதில் மனு தாக்கல் செய்யப்பட்டுள்ளது. அதில் குறிப்பிடப்பட்டுள்ள முக்கிய அம்சங்கள்:
தேர்தல் வழக்கு நிலுவையில் இல்லை: “திருச்சி கிழக்குத் தொகுதி வெற்றியை எதிர்த்து ஜூன் 17-ஆம் தேதி தான் தேர்தல் வழக்கு தாக்கல் செய்யப்பட்டது. ஆனால், அதற்கு முன்பாகவே மே 10-ஆம் தேதியே நான் எம்.எல்.ஏ பதவியை ராஜினாமா செய்துவிட்டேன். அதனை பேரவைச் சபாநாயகரும் ஏற்றுக்கொண்டார். எனவே, முறைப்படி ராஜினாமா செய்து காலியான தொகுதிக்கு எதிராகத் தேர்தல் வழக்கு நிலுவையில் இருக்க முடியாது.”
உள்நோக்கம் கொண்ட வழக்கு: “இடைத்தேர்தலுக்குத் தடை கோரி வழக்கு தொடர்ந்தவர் அந்தத் தொகுதியின் வாக்காளரும் அல்ல; தேர்தல் வழக்கை தாக்கல் செய்தவரும் அல்ல. உள்நோக்கத்துடனும் சட்டப்பூர்வ உரிமை இல்லாமலும் இந்த மனுத் தாக்கல் செய்யப்பட்டுள்ளது.”
மக்களின் பிரதிநிதித்துவம் பாதிப்பு: “தேர்தல் நிறுத்தி வைக்கப்பட்டிருப்பதால் லட்சக்கணக்கான பொதுமக்கள் தங்களது தொகுதிக்கான எம்.எல்.ஏ இல்லாமல் கடுமையாகப் பாதிக்கப்பட்டுள்ளனர். எனவே, பொதுநலனுக்கு எதிரான இந்த மனு விசாரணைக்கே உகந்ததல்ல.”
இடைத்தேர்தலே தீர்வு: “திருச்சி கிழக்கில் 20 பேர் போட்டியிட்ட நிலையில், தேர்தல் வழக்கை தொடர்ந்தவரை மட்டும் வெற்றி பெற்றவராக அறிவித்துவிட முடியாது. எனவே, மக்கள் பிரதிநிதித்துவச் சட்டப்படி காலியாக உள்ள தொகுதிகளுக்குத் தேர்தல் ஆணையம் உடனடியாக இடைத்தேர்தலை நடத்த வேண்டும். இடைத்தேர்தலுக்கு விதிக்கப்பட்ட தடையை நீக்குவதோடு, நீதிமன்ற நேரத்தை வீடித்த இந்த மனுதாரருக்குக் கடுமையான அபராதம் விதித்து வழக்கைத் தள்ளுபடி செய்ய வேண்டும்.”
முதலமைச்சர் விஜய் தாக்கல் செய்துள்ள இந்த அதிரடி பதில் மனுவால், தமிழக இடைத்தேர்தல் விவகாரம் மீண்டும் சூடுபிடித்துள்ளது. செப்டம்பர் 8-ஆம் தேதி இந்த வழக்கு மீண்டும் விசாரணைக்கு வரும்போது நீதிமன்றத்தின் முடிவு என்னவாக இருக்கும் என்ற எதிர்பார்ப்பு அரசியல் வட்டாரத்தில் எழுந்துள்ளது.