புதுச்சேரியில் நடைபெற்ற தனியார் பள்ளி நிகழ்ச்சி ஒன்றில், மாற்றுக்கட்சியினரை இழுப்பது தொடர்பாகப் புதுச்சேரி தற்காலிக சபாநாயகர் அன்பழகன் (அதிமுக) மற்றும் தமிழக அமைச்சர் புஸ்ஸி ஆனந்த் ஆகிய இருவருக்கும் இடையே மேடையிலேயே அரங்கேறிய சுவாரசியமான அரசியல் விவாதம் பெரும் பரபரப்பை ஏற்படுத்தியுள்ளது.
”விசுவாசமாக இருப்பவர்களை மனமாற்றம் செய்ய வேண்டாம்!” – சபாநாயகர் அன்பழகன்
புதுச்சேரி வாணரப்பேட்டையில் உள்ள ஒரு தனியார் பள்ளி நிகழ்ச்சியில் தமிழக அமைச்சர் புஸ்ஸி ஆனந்த் மற்றும் புதுச்சேரி தற்காலிக சபாநாயகர் அன்பழகன் ஆகியோர் சிறப்பு விருந்தினர்களாகக் கலந்துகொண்டனர். மேடையில் சபாநாயகர் அன்பழகன் பேசத் தொடங்கியபோது, அங்கிருந்த கூட்டத்தினரை நோக்கிச் சுட்டிக்காட்டி சுவாரசியமாகப் பேசினார். அவர் கூறுகையில், ”இந்தப் பள்ளியின் முதல்வர் பெயரை அறிவித்தபோது உங்களில் யாரும் கைதட்டவில்லை, அமைதியாக இருந்தீர்கள். ஆனால், தமிழக அமைச்சர் ஆனந்த் பெயரைச் சொன்னவுடனேயே பலத்த கைதட்டல் எழுகிறது. நீங்கள் விசுவாசத்தை மறந்துவிட்டீர்கள். அமைச்சர் ஆனந்தின் இன்றைய மாபெரும் வளர்ச்சிக்கு, அவரிடம் இருக்கும் விசுவாசம்தான் மிக முக்கியக் காரணம். அவர் தன் தலைமைக்கு அத்தனை துணையாக விசுவாசத்துடன் இருந்தார். அதேபோல, மற்ற கட்சிகளில் விசுவாசமாக இருப்பவர்களை, நீங்கள் (தவெக தரப்பினர்) உங்களது பக்கம் இழுத்து அவர்களின் மனதை மாற்றிவிட வேண்டாம் என்று அன்போடு கேட்டுக்கொள்கிறேன்,” என அண்மைய அரசியல் கட்சித் தாவல்களைக் குறிப்பிட்டுப் பேசினார்.
”அவர்கள் ஒழுங்காக இருந்தால் ஏன் வருகிறார்கள்?” – அமைச்சர் புஸ்ஸி ஆனந்த் பதிலடி
சபாநாயகர் அன்பழகனின் இந்தச் சாடலுக்கு, அடுத்துப் பேசிய தமிழக அமைச்சர் புஸ்ஸி ஆனந்த் மேடையிலேயே புன்னகையுடன் அதிரடியான பதிலடியைக் கொடுத்தார். அவர் பேசுகையில், ”புதுச்சேரியின் மிகச் சிறந்த, உண்மையான அரசியல்வாதி அண்ணன் அன்பழகன் அவர்கள்தான். அவரிடம் எப்போதும் போராடும் குணம் மிக அதிகமாகவே இருக்கும். அவர் இங்கே ஒரு கருத்தை முன்வைத்தார். அதற்கு நான் ஒரே ஒரு பதிலை மட்டும் சொல்லிக்கொள்கிறேன்… மற்ற கட்சிகள் அனைத்தும் ஒழுங்காக, முறையாக இருந்தால், அங்கிருக்கும் தொண்டர்களும் நிர்வாகிகளும் எங்களை நோக்கி ஏன் வருகிறார்கள்?” என்று கேள்வி எழுப்பினார்.
மேடையில் நிலவிய அரசியல் பரபரப்பு
தமிழகத்தில் தவெக ஆட்சிப் பொறுப்பேற்றது முதல், அதிமுக உள்ளிட்ட பிற கட்சிகளில் இருந்து பல்வேறு நிர்வாகிகள் தவெக-வை நோக்கி நகர்ந்து வரும் சூழலில், புதுச்சேரி மேடையில் சபாநாயகர் அன்பழகன் மற்றும் அமைச்சர் புஸ்ஸி ஆனந்த் ஆகிய இரு மூத்த தலைவர்களுக்கிடையே நடைபெற்ற இந்த நேரடி ‘பஞ்ச்’ வார்த்தை மோதல், அங்கு கூடியிருந்த தொண்டர்கள் மற்றும் பொதுமக்கள் மத்தியில் பெரும் கைதட்டலையும், அரசியல் வட்டாரத்தில் சுவாரசியமான விவாதத்தையும் ஏற்படுத்தியுள்ளது.
திருமாவளவனின் மாஸ்டர் பிளான்… டி.டி.வி.தினகரன் கொடுத்த புதிய அரசியல் கமெண்ட்!