கடந்த ஆட்சிக் காலத்தில் தங்கள் வாழ்வாதாரம் மற்றும் உரிமைகளுக்காகப் போராடிய விவசாயிகள் மற்றும் ஆசிரியர்கள் மீது பதிவு செய்யப்பட்ட அனைத்து வழக்குகளையும் திரும்பப் பெற அரசு முடிவு செய்துள்ளதாகத் தமிழக சட்டப்பேரவையில் முதலமைச்சர் விஜய் அறிவித்தார்.
மானியக் கோரிக்கை மற்றும் 110-வது விதி அறிவிப்பு
மிழக சட்டப்பேரவையில் பட்ஜெட் கூட்டத்தொடர் நடைபெற்று வரும் நிலையில், இன்று (02-09-2026) பால்வளம், மீன்வளம் மற்றும் கால்நடை பராமரிப்புத் துறை ஆகிய துறைகளின் மானியக் கோரிக்கை தாக்கல் செய்யப்பட்டு விவாதம் நடைபெற்றது. முன்னதாக, பேரவை கூடியதும் விதி எண் 110-ன் கீழ் முதலமைச்சர் விஜய் பல்வேறு முக்கிய அறிவிப்புகளை வெளியிட்டு உரை நிகழ்த்தினார்.
முதலமைச்சர் விஜய் உரையின் விவரம்
பேரவையில் முதலமைச்சர் விஜய் பேசியதாவது, “நமது அரசு பொறுப்பேற்ற மே 10-ஆம் தேதி முதல் சமுதாயத்தின் அனைத்துத் தரப்பு மக்களுக்கும் ஜனநாயக நெறிமுறைகளின் அடிப்படையில், வெளிப்படைத்தன்மை மற்றும் ஊழலற்ற நேர்மையான அரசாகச் சேவையாற்றி வருகிறது. மக்களின் கருத்துரிமை, போராட்ட உரிமை மற்றும் ஜனநாயக உரிமைகளை மதித்து, சட்டத்திற்கு உட்பட்டு மக்கள் தங்கள் கோரிக்கைகளை முன்வைப்பதற்கான சூழலை இந்த அரசு உறுதிப்படுத்தி வருகிறது.
ஆனால், கடந்த ஆட்சிக் காலங்களில் தங்களது வாழ்வாதாரம், உரிமைகள் மற்றும் சமூக நலன் தொடர்பான கோரிக்கைகளை முன்வைத்து போராடிய விவசாயிகள் மற்றும் ஆசிரியர்கள் மீது, 2016-ஆம் ஆண்டு மே மாதம் முதல் 2021-ஆம் ஆண்டு ஏப்ரல் மாதம் வரை ஏராளமான வழக்குகள் பதிவு செய்யப்பட்டன.” முதலமைச்சர் இவ்வாறு பேசியபோது, திமுக சட்டமன்ற உறுப்பினர்கள் கடும் எதிர்ப்பு தெரிவித்து கூச்சலிட்டதால் அவையில் பரபரப்பு ஏற்பட்டது. உடனே சபாநாயகர் தலையிட்டு, உறுப்பினர்களை அமைதியாக அமருமாறு அறிவுறுத்தினார்.
கூச்சலுக்கு இடையே தொடர்ந்த உரை
அதன்பின்னர் தொடர்ந்து பேசிய முதலமைச்சர் விஜய், “ஜனநாயக முறையில் குரல் கொடுத்த மக்களுக்கு உரிய அனுமதிகள் மறுக்கப்பட்டதோடு, இன்று வரையிலும் அவர்கள் மீது பதியப்பட்ட வழக்குகளால் மிகுந்த சிரமத்திற்கு ஆளாகியுள்ளனர். நாட்டின் பொருளாதார முன்னேற்றத்திற்கும் உணவுப் பாதுகாப்பிற்கும் அடிப்படையாக விளங்கும் உழவர்கள், சமூகத்தின் முதுகெலும்பாகப் போற்றப்பட வேண்டியவர்கள்.
அவ்வாறான உழவர்கள் தங்களது கோரிக்கைகளை வலியுறுத்தி நடத்திய போராட்டங்களுக்காக அவர்கள் மீது பதிவு செய்யப்பட்ட வழக்குகள் இன்னும் நிலுவையில் உள்ளன. குறிப்பாக, திருவண்ணாமலை மாவட்டத்தில் சிப்காட் தொழிற்பேட்டை எதிர்ப்புப் போராட்டங்களில் ஈடுபட்ட விவசாயிகள் மீது வழக்குகள் பதிவு செய்யப்பட்டதுடன், சிலர் மீது குண்டர் தடுப்புச் சட்டமும் பாய்ந்தது. அதேபோன்று, பரந்தூரில் புதிய விமான நிலையம் அமைக்கும் திட்டத்திற்கு எதிராக, விளைநிலங்கள் மற்றும் வாழ்வாதாரம் பாதிக்கப்படும் என்பதால் திட்டத்தைக் கைவிடக் கோரிப் போராடிய விவசாயிகள் மீதும் முந்தைய அரசால் மனிதநேயமற்ற முறையில் பதிவு செய்யப்பட்ட வழக்குகள் நிலுவையில் உள்ளன.”
ஆசிரியர்களின் கோரிக்கையும் வழக்குகள் ரத்தும்
ஆசிரியர்கள் குறித்துப் பேசிய முதலமைச்சர், “கல்வியின் ஒளியை ஏற்றிச் சமூக முன்னேற்றத்திற்கு வழிகாட்டும் ஆசிரியர்கள் நாட்டின் வளர்ச்சியின் அடித்தளமாக உள்ளனர். அவர்கள் தங்களது நியாயமான கோரிக்கைகளுக்காக ஜனநாயக முறையில் போராடியபோதும், அவர்கள் மீது வழக்குகள் பதிவு செய்யப்பட்டு நிலுவையில் வைக்கப்பட்டுள்ளன. இதனால் அவர்கள் மிகுந்த மன உளைச்சலுக்கு ஆளாகியுள்ளனர்.
எனவே, ஜனநாயக உரிமைகளை மதிக்கும் நமது அரசு, கடந்த ஆட்சியாளர்களால் விவசாயிகள் மற்றும் ஆசிரியர்கள் அமைதியான முறையில் போராடியபோது அவர்கள் மீது பதிவு செய்யப்பட்ட அனைத்து வழக்குகளையும் மனிதநேய அடிப்படையிலும், ஜனநாயகக் கொள்கைகளின் அடிப்படையிலும் முழுமையாகத் திரும்பப் பெற முடிவு செய்துள்ளது. விவசாயிகள் மற்றும் ஆசிரியர்களின் நியாயமான கோரிக்கைகளுக்கு இந்த அரசு எப்போதும் உறுதுணையாக நிற்கும். இந்த நடவடிக்கை சாமானிய மக்களுக்கும் அரசுக்கும் இடையிலான நம்பிக்கையை மேலும் வலுப்படுத்தும்” எனத் தெரிவித்தார். முதலமைச்சரின் இந்த அறிவிப்பிற்கு விவசாயிகள் மற்றும் ஆசிரியர் அமைப்புகள் வரவேற்பு தெரிவித்துள்ளன.