தமிழக அரசியலில் அதிரடி திருப்பங்களை ஏற்படுத்துவதாகக் கூறி இயங்கி வரும் தமிழக வெற்றிக் கழகத்தின் (தவெக) பின்னணியில், மூடநம்பிக்கைகளும் ஜோதிடமும் ஆதிக்கம் செலுத்தி வருவதாக எழுந்துள்ள குற்றச்சாட்டுகள் அரசியல் அரங்கில் பெரும் கொந்தளிப்பை ஏற்படுத்தியுள்ளன. தவெக தலைவர் நடிகர் விஜயின் ஆஸ்தான ஜோதிடராக அறியப்படும் ‘ரக்கி ரத்தன் பண்டித்’ குறித்து அரசியல் விமர்சகர் ராஜகம்பரன் வெளியிட்டுள்ள அதிரடியான தகவல்கள் சமூக வலைதளங்களில் தீவிரமாக விவாதிக்கப்பட்டு வருகின்றன.
ஜோதிடரின் பின்னணியும், அடிமைத்தன அரசியலும்
மக்கள் மத்தியில் பகுத்தறிவையும் சுய சிந்தனையையும் வளர்க்க வேண்டிய அரசியல் களத்தில், ஒரு கட்சித் தலைவர் ஜோதிடர்களின் வழிகாட்டுதலில் இயங்குவது குறித்து ராஜகம்பரன் கடுமையாகச் சாடியுள்ளார். “மாலை 6 மணிக்கு மேல் திமுகவின் பெயரை உச்சரிக்கக் கூடாது; உச்சரித்தால் அவர்களின் பவர் அதிகரித்துவிடும்” என்பது போன்ற அறிவியல் அற்ற வாதங்களை முன்வைக்கும் ரத்தன் பண்டிட், தன்னை ஒரு வேளாண் விஞ்ஞானியைப் போல காட்டிக்கொள்வது வேடிக்கையானது என அவர் சுட்டிக்காட்டியுள்ளார். மனிதர்களின் இயலாமையையும் தோல்விகளையும் வியாபாரமாக்கும் ஜோதிடர்களின் வலையில் ஒரு அரசியல் கட்சித் தலைவர் வீழ்ந்திருப்பது, பகுத்தறிவு மிகுந்த தமிழக மண்ணிற்கு விடுக்கப்பட்ட சவால் என்று அரசியல் பார்வையாளர்கள் கருதுகின்றனர்.
ஜெயலலிதாவால் விரட்டப்பட்ட பின்னணி
கடந்த கால வரலாற்றை நினைவுகூர்ந்த ராஜகம்பரன், இதே ரத்தன் பண்டிட் முன்னாள் முதலமைச்சர் ஜெயலலிதாவின் பெயரைக் கூறி பிழைப்பு நடத்த முயன்றதாகவும், அவரது போலியான கணிப்புகளைக் கண்டறிந்த ஜெயலலிதா அவரைத் தனது வட்டாரத்தில் இருந்தே விரட்டியடித்ததாகவும் பகிரங்கமாகத் தெரிவித்துள்ளார். தற்போது அதே நபர் தவெகவைச் சுற்றித் தனது ஆதிக்கத்தைச் செலுத்தத் தொடங்கியுள்ளார். புழல் சிறை செல்வது முதல் மேட்டூர் அணைக்கு ரகசியப் பயணம் செல்வது வரை கட்சி சார்ந்த பல நகர்வுகள் இந்த ஜோதிடரின் பரிகார நாடகங்களாகவே அரங்கேறி வருவதாக நம்பத்தகுந்த வட்டாரங்கள் கூறுகின்றன.
கொள்கை முரண்பாடும் இரட்டை வேடமும்
ஒருபுறம் தந்தை பெரியாரைக் கட்சியின் கொள்கை வழிகாட்டி என மேடைதோறும் முழங்கிக்கொண்டு, மறுபுறம் ஜோதிடரின் காலில் விழுந்து கிடக்கும் இந்த இரட்டை வேட அரசியல் எங்கு போய் முடியப் போகிறது என்ற கேள்வி வலுத்துள்ளது. விஜய் முதலமைச்சராகிவிடுவார், அதற்கடுத்து பிரதமர் நாற்காலியைக் கைப்பற்றுவார் என ஜோதிடர்கள் எழுப்பும் கட்டுக் கதைகள், வருங்காலத்தில் எத்தகைய அரசியல் பேரழிவையும் மக்கள் மத்தியில் கேலிப்பொருளையும் உருவாக்கும் என்பதைப் பொறுத்திருந்தே பார்க்க வேண்டும். பெரியார் மண்ணில் மூடநம்பிக்கைகளுக்கு இடம்கொடுக்கும் இந்தக் கூட்டத்தின் தந்திரங்களை மக்கள் உரிய நேரத்தில் அடையாளம் கண்டு கேள்வி கேட்கத் தவறினால், அது ஒட்டுமொத்த தமிழக அரசியலுக்கே பெரும் பின்னடைவாக அமையும் என்பதே சமூக ஆர்வலர்களின் நிதர்சனமான எச்சரிக்கையாக உள்ளது.