தவறான மருத்துவச் சிகிச்சையால் தனது பள்ளிச் சிறுமி மகளின் கால் பாதம் அகற்றப்பட்டதாகக் கூறி, அதற்கு காரணமான மருத்துவர்கள் மீது கடுமையான நடவடிக்கை எடுக்க வலியுறுத்தி ஆவடி டேங்க் ஃபேக்டரி காவல் நிலையத்தின் தலைமைக் காவலர் கோதண்டபாணி, சென்னை ஆளுநர் மாளிகை (ராஜ்பவன்) முன்பு இன்று தொடர் போராட்டத்தில் ஈடுபட்டுள்ளார். இப்போராட்ட அறிவிப்பால் ஆளுநர் மாளிகையைச் சுற்றி பலத்த போலீஸ் பாதுகாப்பு போடப்பட்டுள்ளது.
ஆவடி டேங்க் ஃபேக்டரி காவல் நிலையத்தில் தலைமைக் காவலராகப் பணியாற்றி வருபவர் கோதண்டபாணி. இவரின் பள்ளிச் சிறுமியான மகளுக்கு கடந்த நான்கு ஆண்டுகளுக்கு முன்பு திடீரென உடல்நலக்குறைவு ஏற்பட்டுள்ளது. இதனால் உடனடியாக அவர் சென்னை எழும்பூர் குழந்தைகள் அரசு மருத்துவமனையில் அனுமதிக்கப்பட்டார். அங்கு அளிக்கப்பட்ட சிகிச்சையின் போது, சிறுமியின் உயிரைக் காப்பாற்றுவதாகக் கூறி மருத்துவக் குழுவினர் அவரது வலது கால் பாதத்தை முழுமையாக அகற்றியுள்ளனர். ஆனால், மருத்துவக் குழுவினரின் முறையற்ற மற்றும் தவறான சிகிச்சையின் காரணமாகவே தன் மகளுக்கு இந்த நிலை ஏற்பட்டதாகக் கோதண்டபாணி குற்றம் சாட்டுகிறார்.
தொடரும் போராட்டங்களும் நீதிக்கான குரலும்
தனது மகளின் எதிர்காலத்தைக் கேள்விக்குள்ளாக்கிய மருத்துவர்கள் மீது உரிய விசாரணை நடத்தி கடுமையான நடவடிக்கை எடுக்க வேண்டும் என்பதை வலியுறுத்திக் கோதண்டபாணி தொடர்ந்து சட்டப்போராட்டங்களையும், பல்வேறு கட்டப் போராட்டங்களையும் முன்னெடுத்து வருகிறார். ஏற்கெனவே தலைமைச் செயலகம், சென்னை மாநகர காவல் ஆணையர் அலுவலகம் மற்றும் ஆளுநர் மாளிகை வாயில் உள்ளிட்ட முக்கியப் பகுதிகளில் அவர் பலமுறை கோரிக்கை வைத்துப் போராட்டம் நடத்தியுள்ளார்.
ராஜ்பவன் முன்பு குவிந்த பாதுகாப்புப் படை
இந்த நிலையில், தனது மகளுக்கு உரிய நீதி கிடைக்கும் வரை போராட்டத்தைக் கைவிடுவதில்லை என்ற முடிவோடு, இன்று கோதண்டபாணி ஆளுநர் மாளிகை முன்பு திடீர் போராட்டத்தில் ஈடுபட்டுள்ளார். தலைமைக் காவலரே தனது குடும்பத்திற்குக் நீதி கேட்டு அரசிடமும் நிர்வாகத்திடமும் போராட்டத்தில் குதித்துள்ள சம்பவம் காவல்துறை வட்டாரத்திலும் பொதுமக்களிடையேயும் பெரும் பரபரப்பை ஏற்படுத்தியுள்ளது. இதனைக் கருத்தில் கொண்டு, ஆளுநர் மாளிகையைச் சுற்றியுள்ள பகுதிகளில் கூடுதல் காவல் துறையினர் குவிக்கப்பட்டு தீவிர பாதுகாப்புப் பணிகள் மேற்கொள்ளப்பட்டு வருகின்றன.
கலைஞரின் சாதனைகளை வரலாற்றிலிருந்து நீக்க முடியாது: ஆளூர் ஷானவாஸ் திட்டவட்டம்!