கிளைக் கழகம் முதல் தலைமைக் கழகம் வரை ஒரே சீரான மாற்றங்களை மேற்கொள்ள திமுக தலைவர் மு.க.ஸ்டாலின் 9 பேர் கொண்ட ஆலோசனைக் குழுவை அமைத்துள்ள அறிவிப்பு, அக்கட்சியின் மாவட்டச் செயலாளர்கள் மற்றும் முக்கிய நிர்வாகிகள் மத்தியில் பெரும் அதிர்வலைகளை ஏற்படுத்தியுள்ளது. ஆகஸ்ட் முதல் வாரத்தில் இக்குழு அறிக்கை தாக்கல் செய்ய உள்ள நிலையில், பல மாவட்டச் செயலாளர்களின் பதவிகள் பறிக்கப்படலாம் என்ற தகவல் தற்போதே அறிவாலய வட்டாரத்தில் கசியத் தொடங்கியுள்ளது.
’கள ஆய்வும்’ ஏ.ஐ. (AI) கொடுத்த ரிப்போர்ட்டும்!
நடந்து முடிந்த சட்டமன்றத் தேர்தல் தோல்வி குறித்து ஆராய 38 பேர் கொண்ட குழுவினர் ஒவ்வொரு தொகுதிக்கும் நேரடியாகச் சென்று தொண்டர்களிடம் கருத்துகளைப் பெற்றனர். இதுமட்டுமன்றி, ‘உடன்பிறப்பு’ செயலி மூலம் ஆன்லைனில் பெறப்பட்ட லட்சக்கணக்கான தொண்டர்களின் கருத்துகளும் ஏ.ஐ. (AI) தொழில்நுட்பம் மூலம் துல்லியமாகப் பகுப்பாய்வு செய்யப்பட்டுள்ளன. இந்த ஏ.ஐ. ரிப்போர்ட் மற்றும் கள ஆய்வு முடிவுகளின் அடிப்படையில், திமுக தலைவர் மு.க.ஸ்டாலின் ஒரு ரகசியப் பட்டியலைத் தயார் செய்து வைத்துள்ளதாகக் கூறப்படுகிறது.
யாருக்கெல்லாம் பதவி பறிபோகும்?
கட்சியின் உள்கட்டமைப்பைத் தூய்மைப்படுத்தும் நோக்கில், பின்வரும் காரணங்களின் அடிப்படையில் பல முக்கிய தலைகளின் பதவிகள் பறிக்கப்பட வாய்ப்புகள் அதிகம் எனத் தெரிகிறது. திமுக ஆட்சியில் இருந்தபோது, தங்களது அதிகாரத்தை வற்புறுத்தித் தவறாகப் பயன்படுத்திய மாவட்டச் செயலாளர்கள் மற்றும் நிர்வாகிகள். மக்கள் நலனையோ, கட்சி வளர்ச்சியையோ பொருட்படுத்தாமல், தங்களது சுயநலத்திற்காகப் பணத்தை மட்டுமே பிரதான நோக்கமாகக் கொண்டு செயல்பட்டவர்கள். கட்சியின் தூண்களாக விளங்கும் அடிமட்டத் தொண்டர்களைத் துச்சமாகக் மதித்து, அவர்களைத் தங்களுக்குக் கீழே அடிமைகளாக நடத்த முயன்ற தலைவர்கள்.
ஆகஸ்டில் பாயும் அதிரடி நடவடிக்கை!
தற்போது அமைக்கப்பட்டுள்ள 9 பேர் கொண்ட உயர்மட்டக் குழு, இந்த புகார்களுக்கு உள்ளான நிர்வாகிகளின் பட்டியலையும், அவர்களுக்கு மாற்றாகக் கொண்டுவரப்பட வேண்டிய இள ரத்தங்களின் பெயர்களையும் இறுதி செய்யவுள்ளது. ஆகஸ்ட் முதல் வாரத்தில் இந்த அறிக்கை தாக்கல் செய்யப்பட்டவுடன், திமுக உயர்நிலைச் செயல்திட்டக் குழுவின் ஒப்புதலோடு அதிரடி நீக்கங்களும், புதிய நியமனங்களும் வெளியாகும் என எதிர்பார்க்கப்படுகிறது. ”அடுத்த நூறாண்டுகளுக்குக் கட்சியை வழிநடத்த, களையெடுக்க வேண்டியவர்களைக் களைந்தே தீர வேண்டும் என்பதில் தலைமை உறுதியாக இருக்கிறது” என்கிறார்கள் விபரம் அறிந்த உடன்பிறப்புகள். இதனால், தங்களது பதவி தப்புமா, பறிபோகுமா என்ற கவலையில் பல மாவட்டச் செயலாளர்கள் தற்போதே தங்களது தூக்கத்தை இழந்து தவித்து வருகின்றனர்.