மதிமுக பொதுச்செயலாளர் வைகோ அவர்கள் நெல்லையில் செய்தியாளர்களைச் சந்தித்தார். அப்போது, மதிமுக சட்டமன்ற உறுப்பினர்கள் விலகியது, திமுக-வின் அரசியல் நகர்வுகள் மற்றும் தற்போதைய தவெக தலைவர் விஜய் தலைமையிலான அரசுக்குத் தனது ஆதரவு குறித்துப் பல்வேறு அதிரடி கருத்துகளைப் பகிர்ந்து கொண்டார். செய்தியாளர்கள் சந்திப்பில் வைகோ பேசியதாவது:
“என் நெஞ்சில் குத்திவிட்டார்கள்”
”மதிமுக-விலிருந்து விலகிச் சென்ற சட்டமன்ற உறுப்பினர்கள் செல்வன் மற்றும் ராஜேந்திரன் ஆகியோர் நன்றாக வாழட்டும். விலகிச் சென்றவர்களை வசைபாடுவது என் வழக்கமல்ல. ஆனால், அவர்கள் என் முதுகில் குத்தவில்லை; நேரடியாக எனது நெஞ்சிலேயே குத்திவிட்டார்கள். இருப்பினும், கட்சிக்காக உயிரைக் கொடுக்கும் லட்சக்கணக்கான தொண்டர்கள் இன்னும் என்னோடுதான் இருக்கிறார்கள். அவர்கள் இந்த இயக்கத்தைக் காப்பாற்றுவார்கள். வரவிருக்கும் இடைத்தேர்தலில் மதிமுக போட்டியிடாது (Contest செய்யாது).”
திமுக மீது கடுமையான குதிரை பேரக் குற்றச்சாட்டு:
”கடந்த தேர்தலில் எங்களை பிளாக் மெயில் செய்வது போல செய்துதான், திமுக கூட்டணியில் 4 தொகுதிகளை ஒதுக்கினார்கள். அதிலும் உதயசூரியன் சின்னத்தில்தான் நிற்க வேண்டும் என்று கடும் பிடிவாதம் பிடித்தார்கள், நிர்பந்தம் செய்தார்கள்.
தற்போது திமுகவினர் ‘குதிரை பேரம்’ பற்றிப் பேசுகிறார்கள். ஆனால், தமிழ்நாட்டில் குதிரை பேரத்தை ஆரம்பித்து வைத்ததே திமுக தான். எங்களது கட்சியைச் சேர்ந்த ராமகிருஷ்ணனைப் பதவியை ராஜினாமா செய்ய வைத்து, நான்காவது நாளே அவரைத் தங்களோடு சேர்க்க வைத்து குதிரை பேரம் நடத்தியது திமுக. எங்களை அவர்கள் மிகவும் மோசமாக நடத்தினார்கள், அதனால்தான் கூட்டணியை விட்டு வெளியே வந்தோம்.
அப்போதே ஏன் கூட்டணியில் இருக்கும்போது இதையெல்லாம் கூறவில்லை எனக் கேட்கிறார்கள். நான் அப்போது பேசியிருந்தால் மறுநாளே எங்களை வெளியில் அனுப்பியிருப்பார்கள். நாங்கள் வேறு கூட்டணிக்குச் சென்றால், ‘இவருக்கு இதுதான் வேலை’ என்று பழிசுமத்தியிருப்பார்கள். கட்சி ஆரம்பித்துப் பலரும் மூடிவிட்டுச் சென்றுவிட்ட சூழலிலும், நாங்கள் கடந்த 32 ஆண்டுகளாக இந்த இயக்கத்தை வெற்றிகரமாக நடத்தி வருகிறோம்.”
”முதலமைச்சர் விஜய் ஆட்சியில் ஊழல் இல்லை”
”நேற்று முதலமைச்சர் விஜய் அவர்கள் தலைமையில் நடைபெற்ற தோழமைக் கட்சிகளின் கூட்டம் மிகவும் கண்ணியமாக நடைபெற்றது. அனைவரையும் மனமுstatus விட்டுப் பேச முதலமைச்சர் கூறினார். அங்கு நான் பேசிய ரகசியங்களை வெளியே கூறமாட்டேன், அது முறையல்ல.
திமுக ஆட்சியில் ஊழல் கொடிகட்டிப் பறந்தது. ஆனால், இன்று அதனை முதலமைச்சர் விஜய் இல்லாமல் ஆக்கிவிட்டார். தற்போது தமிழ்நாட்டில் ஊழல் இல்லாத அரசாங்கம் நல்முறையில் நடைபெற்று வருகிறது. முன்பை விட இப்போது முதலமைச்சருக்கு மக்கள் ஆதரவு பெருகியுள்ளது. மதச்சார்பின்மை, சமூக நீதி, கூட்டாட்சிக் கொள்கைகளில் விஜய் உறுதியாக இருக்கிறார். இந்த 5 ஆண்டுகள் விஜய் ஆட்சிதான் நடக்கும், அடுத்த தேர்தலிலும் அவரே வெல்வார். விஜயிடம் ஒரு தனி வசீகரம் இருக்கிறது; பெண்கள், ஆண்கள், இளைஞர்கள் என அனைவரும் அவரை ஆதரிக்கிறார்கள். தமிழக வெற்றிக் கழகத்தையும் நான் திராவிட இயக்கத்தின் ஒரு கூறாகவே பார்க்கிறேன்.”
நாடாளுமன்றத் தேர்தல் வியூகம்:
”அதிமுக ஆட்சிக்காலத்தில் எடப்பாடி பழனிசாமி முதலமைச்சர் ஆக வேண்டும் என்று அவர்கள் எப்படியெல்லாம் குட்டிக்கரணம் போட்டார்கள் என்பதைப் பார்த்தோம். எனக்கு ராஜ்யசபா சீட் கொடுத்தார்கள், அதற்கு நன்றி. அதேநேரம், தற்போது விலகிச் சென்றவர்கள் எல்லாம் மீண்டும் தாய் கழகம் நோக்கி வருவதால் அதிமுக-வும் நாளுக்கு நாள் வலுப்பெற்று வருகிறது.
வரும் நாடாளுமன்றத் தேர்தலில் நாங்கள் சுயேட்சை சின்னத்திலும் நிற்கலாம், தீப்பெட்டி சின்னத்திலும் நிற்கலாம் அல்லது எங்களது பம்பர சின்னத்திலும் போட்டியிடலாம். அதைத் தேர்தல் நேரத்தில் முடிவு செய்வோம்” என்று
மதிமுக பொதுச்செயலாளர் வைகோ உணர்ச்சிப் பெருக்குடன் பத்திரிகையாளர் சந்திப்பில் தெரிவித்தார். முன்னதாக, செய்தியாளர் ஒருவரிடம் கடினமாக நடந்துகொண்டது குறித்த கேள்விக்கு, தான் பத்திரிகையாளர்களை மதிப்பவன் என்றும், அதற்கு ஏற்கனவே வருத்தம் தெரிவித்துவிட்டதாகவும் அவர் குறிப்பிட்டார்.