“தவெக-வில் இணைந்தாலும் ஊழல் அதிமுக எம்.எல்.ஏ-க்கள் மீது நடவடிக்கை எடுக்க வேண்டும்!” என கோவையில் சிபிஎம் மாநிலச் செயலாளர் பெ.சண்முகம் தெரிவித்துள்ளார்.
கோவையில் செய்தியாளர்களைச் சந்தித்த மார்க்சிஸ்ட் கம்யூனிஸ்ட் கட்சியின் மாநில செயலாளர் பெ.சண்முகம் பேசியதாவது :
”எம்.எல்.ஏ-க்களை விலை பேசுவது ஜனநாயக விரோதம்”
”சட்டமன்ற உறுப்பினர்கள் தங்களது சொந்த விருப்பத்தின் பேரில் ஒரு கட்சியில் இருந்து மற்றொரு கட்சிக்கு மாறுவது ஜனநாயகத்தில் இயல்பான ஒன்றுதான். ஆனால், குதிரை பேரம் பேசி, விலை கொடுத்து எம்.எல்.ஏ-க்களை வாங்குவது சற்றும் ஏற்றுக்கொள்ள முடியாதது. இதுபோன்ற சட்டவிரோத செயல்களில் ஈடுபடுபவர்கள் மீது தமிழ்நாடு அரசு கடுமையான சட்டப்படியான நடவடிக்கை எடுக்க வேண்டும்.
ஏற்கனவே அதிமுகவில் இருந்து நான்கு எம்.எல்.ஏ-க்கள் விலகியபோதே சிபிஎம் தனது பலத்த அதிருப்தியைத் தெரிவித்திருந்தது. அப்போது அவர்கள் தாமாகவே முன்வந்து இணைந்ததாகத் தவெக தரப்பில் கூறப்பட்டது. தற்போதும் அதே நிலைப்பாட்டில்தான் சிபிஎம் நீடிக்கிறது. அதிமுகவில் நிலவி வரும் கடுமையான உட்கட்சிப் பூசல்தான், அக்கட்சியின் முக்கிய நிர்வாகிகள் தவெக-வை நோக்கிச் செல்ல முதன்மைக் காரணம்.”
விஜய் அரசு மீதான விமர்சனமும்… ஆதரவும்…
”விஜய் எங்களிடம் ஆதரவு கேட்டபோது, தமிழ்நாட்டில் ‘மதச்சார்பற்ற’ ஆட்சியை நடத்துவதாக உறுதியளித்தார். அந்த கொள்கை அடிப்படையில்தான் தவெக-வுக்கு நாங்கள் ஆதரவு அளித்தோம். தற்போதைய தமிழ்நாடு அரசின் செயல்பாடுகள் மற்றும் தேர்தல் வாக்குறுதிகள் படிப்படியாக நடைமுறைக்குக் கொண்டு வரப்பட்டு வருகின்றன.
சமீபத்தில் முதலமைச்சரைச் சந்தித்தபோது பல்வேறு மக்கள் கோரிக்கைகளை முன்வைத்துள்ளோம். இந்த மாத இறுதியில் தமிழ்நாடு அரசின் புதிய நிதிநிலை அறிக்கை (பட்ஜெட்) தாக்கல் செய்யப்படும் என்று முதலமைச்சர் தெரிவித்துள்ளார்.
அதேநேரம், கன்னியாகுமரியில் அணுக் கனிமச் சுரங்கத்திற்குத் தற்போதைய அரசு கால நீட்டிப்பு வழங்கியிருப்பது முற்றிலும் தவறானது. கனிம வளக் கொள்ளையைத் தடுத்து நிறுத்துவோம் என்று கூறி ஆட்சிக்கு வந்த தவெக அரசு, தற்போது அதற்கு மாறான நடவடிக்கையில் ஈடுபடுவது ஏற்புடையதல்ல.”
திமுக மற்றும் அரசியல் கட்சிகளின் அணுகுமுறை:
”ஆட்சி மாற்றம் வேண்டும் என்ற எண்ணத்தில்தான் தமிழக மக்கள் திமுக, அதிமுக உள்ளிட்ட கட்சிகளுக்கு வாக்களித்தனர். ஆனால், ஆட்சியில் இருந்து வெளியேறிய திமுக-வினர், அதிகாரத்தில் இல்லாத நிலையை ஏற்க முடியாமல் தவித்து வருகின்றனர். ‘ஆட்சி மாற்றம் வரும்’ என்று முன்பு மு.க.ஸ்டாலின் பேசியதன் பின்னணியை இப்போதுதான் புரிந்து கொள்ள முடிகிறது.
பொதுவாக ஒரு கட்சி தங்களது கூட்டணியில் இருக்கும் வரை ஒரு அணுகுமுறையையும், கூட்டணியை விட்டு வெளியேறிய பிறகு அவதூறுகளைப் பரப்புவதையும், கடுமையான சொற்களைப் பயன்படுத்துவதையும் திமுக நீண்டகாலமாகவே வாடிக்கையாகக் கொண்டுள்ளது; இது ஒன்றும் புதிய விஷயம் அல்ல. ஆனால், சிபிஎம் எப்போதும் தனிநபர் விமர்சனங்களைச் செய்யாது, தூய அரசியல் நிலைப்பாட்டின் அடிப்படையிலேயே தனது ஆதரவையும் எதிர்ப்பையும் வெளிப்படுத்தும்.”
கல்விக் கட்டணக் கொள்ளை & இடைத்தேர்தல் நிலைப்பாடு:
கல்விக் கட்டணம்: தமிழ்நாட்டில் உள்ள தனியார் பள்ளிகளில் அரசு நிர்ணயித்த கல்விக் கட்டண விவரங்கள், அந்தந்த பள்ளி நுழைவாயில்களில் பொதுமக்களுக்குத் தெரியும்படி வெளிப்படையாக ஒட்டப்பட வேண்டும். அரசு விதியை மீறி கூடுதல் கட்டணம் வசூலிக்கும் பள்ளிகள் மீது அரசு இரக்கமின்றி நடவடிக்கை எடுக்க வேண்டும்.
மும்மொழிக் கொள்கை:
மும்மொழிக் கொள்கையை மார்க்சிஸ்ட் கம்யூனிஸ்ட் கட்சி ஒருபோதும் ஏற்காது; இருமொழிக் கொள்கையிலேயே உறுதியாக இருக்கும்.
இடைத்தேர்தல்: வரவிருக்கும் இடைத்தேர்தல் குறித்து சிபிஎம் இதுவரை எந்த முடிவும் எடுக்கவில்லை. யாருக்கு ஆதரவு அளிப்பது என்பது குறித்தும் ஆலோசிக்கவில்லை. இடதுசாரிகள் எப்போதும் மக்களின் பிரச்சினைகளுக்காகத் தொடர்ந்து களத்தில் நிற்பார்கள். தற்போதைக்கு எந்த அணியிலும் இல்லாமல், மக்கள் நலனுக்காகத் தனி அணியாகவே செயல்படுவோம்” என்று தெரிவித்தார்.