தமிழகத்தில் பயிர் கடன் முழுமையாக தள்ளுபடி? முதல்வர் விரைவில் அறிவிப்பார் – அமைச்சர் வினோத்

​கள்ளக்குறிச்சி மாவட்டம் மூங்கில்துறைப்பட்டு கூட்டுறவு சர்க்கரை ஆலையின் 2025–2026ஆம் ஆண்டு சிறப்பு பருவம் மற்றும் 2026–2027ஆம் ஆண்டிற்கான முதன்மை அரவை துவக்க விழா இன்று நடைபெற்றது. இதில் தமிழக வேளாண்மை மற்றும் விவசாயிகள் நலத்துறை அமைச்சர் வினோத் அவர்கள் கலந்துகொண்டு, கரும்பு அரவை பணியினை முறைப்படி தொடங்கி வைத்தார். இந்த சர்க்கரை ஆலையில் இந்த ஆண்டிற்காக மொத்தம் 10,750 ஏக்கர் கரும்பு பதிவு செய்யப்பட்டுள்ளது. இதன் மூலம் நடப்பு பருவத்தில் 4.75 லட்சம் டன் கரும்பு அரவை செய்ய திட்டமிடப்பட்டுள்ளது.

​இயந்திர பயன்பாடு குறித்து அமைச்சர் ஆய்வு:
​முன்னதாக, கூட்டுறவு சர்க்கரை ஆலை வளாகத்தில் அமைக்கப்பட்டிருந்த கரும்பு அரவை மற்றும் நவீன தொழில்நுட்பங்கள் குறித்த கண்காட்சியினை அமைச்சர் வினோத் பார்வையிட்டார். தொடர்ந்து ஆலைக்குள் சென்று கரும்பு அரவை பணிகள், இயந்திரங்களின் செயல்பாடு மற்றும் பயன்பாடு குறித்து அதிகாரிகளிடம் விரிவாகக் கேட்டறிந்து ஆய்வு மேற்கொண்டார்.
​இந்த ஆய்வின்போது கள்ளக்குறிச்சி மாவட்ட ஆட்சியர் பத்மஜா, கள்ளக்குறிச்சி சட்டமன்ற உறுப்பினர் அருள் விக்னேஷ் மற்றும் அரசு உயர் அதிகாரிகள் பலர் உடனிருந்தனர்.
​

செய்தியாளர்கள் சந்திப்பில் அமைச்சர் வினோத் பேசியதாவது:
​பயிர் கடன் முழுமையாக தள்ளுபடி:
“தமிழக விவசாயிகளின் பயிர் கடன்களை முழுமையாக தள்ளுபடி செய்வது குறித்து மாண்புமிகு தமிழ்நாடு முதலமைச்சர் அவர்கள் விரைவில் அதிகாரப்பூர்வ அறிவிப்பை வெளியிடுவார்.”
​

வேளாண் தனி பட்ஜெட் மற்றும் கரும்பு ஆதார விலை:
“கரும்புக்கான ஆதார விலை உள்ளிட்ட விவசாயிகளின் பல்வேறு முக்கிய கோரிக்கைகள் குறித்து தற்போது தீவிரமாக பரிசீலித்து, அதற்கேற்ப பட்ஜெட் (நிதிநிலை அறிக்கை) தயாரிக்கும் பணிகள் நடைபெற்று வருகின்றன. விரைவில் தாக்கல் செய்யப்பட உள்ள வேளாண்மைக்கான தனி பட்ஜெட்டில் இதற்கான அறிவிப்புகள் வெளியாகும்.”
​

மக்களின் கோரிக்கைகளுக்கு முன்னுரிமை:
“தமிழகத்தில் உள்ள ஒவ்வொரு மாவட்டத்திலும் உள்ள விவசாயிகளை நேரில் சந்தித்து அவர்களின் தேவைகளும், கோரிக்கைகளும் கேட்கப்பட்டு வருகின்றன. அந்தந்த பகுதி விவசாயிகளின் வாழ்வாதாரத்தை மேம்படுத்தும் வகையிலான சிறப்பான திட்டங்கள் வரவிருக்கும் பட்ஜெட்டில் நிச்சயம் இடம் பெறும்.”
​

அரவை துவக்க விழாவில் அமைச்சர் வெளியிட்ட இந்த அறிவிப்புகள் டெல்டா மற்றும் கள்ளக்குறிச்சி மாவட்ட கரும்பு மற்றும் நெல் விவசாயிகளிடையே பெரும் மகிழ்ச்சியையும் எதிர்பார்ப்பையும் ஏற்படுத்தியுள்ளது.